Թուրքիա V.S. ԱՄՆ եւ ՆԱՏՕ
ԱՄՆ պետդեպարտամենտը Հայաստանում տեղի ունեցածը պետական հեղաշրջման փորձ չի համարել։ Հակառակ դրան, Թուրքիայի նախագահ Ռեջեփ Թայիփ Էրդոդանի աշխատակազմի հանրային կապերի բաժնի ղեկավար Ալթունը (իմա՝ Էրդոդանը) Հայաստանի ԳՇ-ի հայտարարության կապակցությամբ հայտնել է, որ ստեղծված իրավիճակը համարում են հեղաշրջման փորձ:
Բավական ուշագրավ եւ «նուրբ» հայտարարությամբ է հանդես եկել ՆԱՏՕ-ի պաշտոնական ներկայացուցիչ Օանա Լունգեսկուն՝ նշելով. «Կարեւոր է խուսափել այնպիսի բառերից կամ գործողություններից, որոնք կարող են հանգեցնել հետագա սրման»: Ենթատեքստը կամ «բառերը», անկասկած, վերաբերում են «ռազմական հեղաշրջման փորձ» արտահայտությանը: Իսկ Թուրքիայի՝ ԱՄՆ պետդեպարտամենտին հակասող եւ իրականության հետ որեւէ աղերս չունեցող, ՆԱՏՕ-ի դիվանագիտական նուրբ ուղերձն անտեսող հայտարարությունը կարելի է համարել էյֆորիայի արդյունք՝ կապված Արցախում «Ալթայ» ռազմական օպերացիան (այդ երկրի ԳՇ-ում մշակված) «հաջողությամբ» իրագործելու հետ: Չի կարելի բացառել նաեւ, որ այն դրությունն էլ ավելի սրելու նպատակ է հետապնդում: Այդ էյֆորիան կանցնի, ջրերը կպարզվեն, եւ ամեն ինչ կվերադառնա ի շրջանս յուր:
Ուղղակի զարմանալի է, եթե չասենք՝ զավեշտալի, ռազմավարական երկու դաշնակից երկրների հակասական դիրքորոշումը: Սակայն, նկատի ունենալով այն, որ ԱՄՆ-ն ՄԱԿ-ի անվտանգության խորհրդի մշտական անդամ է, ինչպես նաեւ այն, որ տիրապետում է անգամ աշխարհի բոլոր մոծակների թռիչք-վայրեջքներին, ապա որեւէ հիմք չկա ԱՄՆ պետդեպարտամենտի հայտարարությունը կասկածի տակ դնելու համար:
Եթե նոյեմբերի 10-ին չհաջորդեր հայ հասարակության արդարացի ընդվզումը պատերազմի ելքի կապակցությամբ, ապա համաշխարհային հանրությունը մեզ չէր հասկանա ու կկորցներ փոքրիշատե գոյություն ունեցող հարգանքը մեր պետության ու ժողովրդի նկատմամբ: Պատերազմի ողջ ընթացքում այդ հանրությունը, բերանը ջուր առած, լռում էր, չէր նկատում արգելված զինատեսակների կիրառումը, չէր նկատում, որ Թուրքիան ամենաակտիվ մասնակցությունն է ունենում մարտական գործողություններում՝ իր մի քանի հարյուր զինվորականներով, որոնք ոչ կոնտակտային գործողություններով էին զբաղված (ԱԹՍ-ների եւ, ընդհանրապես՝ հրետանա-հրթիռային կրակի կառավարման, օդատիեզերական հետախուզության եւ այլն), իր F-16-ներով ու վարձկան հազարավոր ահաբեկիչներով:
Այժմ, կարծես թե, համաշխարհային հանրությունն արթնացել է ու նկատել, որ գոյություն ունի Հայաստան պետություն, որը, սակայն, իր ռազմական ողջ ներուժով չներգրավվեց պատերազմական գործողություններում, թեպետ դրա իրավունքն ուներ: Գոյություն ունի պետություն, որի ժողովուրդը, չնայած իրեն պատուհասած անվերջանալի արհավիրքներին, չի կորցրել ազգային արժանապատվությունը, հավատը, որ, ի վերջո, հասնելու է խաղաղության, իր պատմական բնօրրանում ապրելու է բարեկեցիկ ու անվտանգ կյանքով:
ՀԳ. Ժամանակին մենք չկարողացանք Թուրքիային հետ պահել արցախյան հիմնախնդրին միջամտելուց, ինչն էլ, գուցե, նրան իրավունք է վերապահել ավելի առաջանալ ու միջամտել Հայաստանի ներքին գործերին՝ իբրեւ թե մտահոգություն արտահայտելով մեր երկրի ճակատագրի համար: Դա նույնն է, թե մարդասպանը սպանվածի հարազատներին ցավակցություն հայտնի: Ցինիզմ: Այլ կերպ հնարավոր չէ բնութագրել այդ երկրի պահվածքը:
Գագիկ ՎԱՐԴԱՆՅԱՆ
Տնտեսագիտության դոկտոր, պրոֆեսոր
Կարծիքներ