«Հրապարակ». Քոչարյանականները տարեվերջյան հավաքույթ են արել

«Հրապարակ». Քոչարյանականները տարեվերջյան հավաքույթ են արել

Պարզվում է՝ դեկտեմբերի 27-ին տարեվերջյան հավաքույթ են արել ոչ միայն իշխանականները, այլեւ նրանց ընդդիմությունը։ Սակայն, ի տարբերություն ՔՊ-ականների քեֆ-ուրախության, որը մի քանի օր է՝ քննարկում են քաղաքական շրջանակներում, քոչարյանականներն իրենց հավաքը վերածել են քաղաքական քննարկման, քանի որ այդ օրը նաեւ երկրորդ նախագահի մամուլի ասուլիսն էր, եւ թիմը հիացած էր առաջնորդի արտահայտած մտքերով։

Հավաքույթը տեղի է ունեցել Դավիթաշենում գտնվող «Փրայմ հոլ» ռեստորանի սրահներից մեկում, որը վերջին շրջանում քաղաքական էլիտայի սիրած վայրերից մեկն է դարձել։ Ներկա են եղել ԱԺ «Հայաստան» խմբակցության պատգամավորները եւ դաշինքի այլ անդամներ։ Մեզ ասացին, որ «երգ, պար, ուրախություն» չի եղել։ Ի դեպ, սա այն ռեստորանն է, որտեղ միջոցառումներ է անցկացնում նաեւ իշխող ՔՊ-ն։