Կանադայում հաղթում է Ջասթին Թրյուդոյի լիբերալ կուսակցությունը

Կանադայում տեղի ունեցած պառլամենտական ընտրություններում հաղթում է գործող վարչապետ Ջասթին Թրյուդոյի Լիբերալ կուսակցությունը։ Այս մասին հայտնում է Կանադայի ԿԸՀ-ն։ 338 ընտրատարածքներից 288-ի տվյալների մշակման արդյունքներով, Թրյուդոն առաջատար է 140 շրջանում, իսկ նրա հիմնական մրցակից Պահպանողական կուսակցությունը՝ միայն 97-ում։ Ընդհանուր առմամբ, լիբերալները հավաքել են 37,5 տոկոս քվե, պահպանողականները՝ 31,1 տոկոս։ Որպեսզի ընտրություններում հաղթող ճանաչվի եւ ձեւավորի կառավարություն, կուսակցությունը պետք է 170 շրջանում լինի առաջատար։

Նշենք, որ անցյալ ընտրություններին, որոնք տեղի են ունեցել 2015 թվականին, Թրյուդոն 184 շրջանում է եղել առաջատար, հավաքելով 39,5 տոկոս, իսկ պահպանողականները հավաքել են 31,9 տոկոս եւ ստացել 99 տեղ։