«Հրապարակ». Ենթադրում եմ` օդում պահում են մի չմասնակցող մանդատ

Արդեն երկու ամիս է՝ «Ալյանս» կուսակցության նախագահ Տիգրան Ուրիխանյանը, ով Երեւանի ավագանու ընտրությունների ժամանակ «Հանրային ձայն» կուսակցության երկրորդ համարն էր, ընտրություններից անմիջապես հետո հայտարարեց, որ դիմում է ներկայացրել` մանդատից հրաժարվելու մասին, սակայն այդ դիմումը դեռ տեղ չի հասել` ԿԸՀ-ն այն չի քննել, նրա մանդատը կուսակցության ցուցակի հաջորդ համարին չի անցել: Ո՞րն է խնդիրը: Մեր տեղեկություններով, ավագանու 6 անդամ ունեցող կուսակցության ցուցակից ցանկացած մեկի հրաժարականի դեպքում ավագանի է անցնում Գրիգոր Հարությունյանը` «Հայրենիք» կուսակցության նախկին անդամ, որին «Հանրային ձայնում» վստահ չեն, որ կկարողանան կառավարել: Նախ, ամեն ինչ արեցին, որ վերջինս հրաժարվի մանդատից, եւ ավագանի մտնի 8-րդ համարը` Միհրան Մովսիսյանի որդին` Ալբերտ Մովսիսյանը: Երբ համոզվեցին, որ Գ. Հարությունյանը չի պատրաստվում մանդատից հրաժարվել, Ուրիխանյանի դիմումը չներկայացվեց ԿԸՀ` նախընտրեցին, որ ավագանու երկու անդամ` Արտակ Գալստյանն ու Տիգրան Ուրիխանյանը, չմասնակցեն նիստերին, քան թե նոր գլխացավանքներ ստեղծեն` առանց այն էլ պրոբլեմատիկ խմբակցությունում: Տիգրան Ուրիխանյանի դիմումը չներկայացնելու պատճառը հենց դա է, թեեւ խմբակցության անդամները հայտարարում են, թե ամեն ինչ անում են, որ նրան բերեն Հայաստան, եւ նա անձամբ մասնակցի նիստերին: 

Ուրիխանյանը մեզ ասել էր, որ իրեն բացառապես իշխանափոխությունն է հետաքրքրում, եւ ինքը Երեւանի ավագանիում իրեն չի պատկերացնում: Երեկ մենք մի քանի հարց ուղղեցինք նրան։

- Դուք դեռ սեպտեմբերին դիմել էիք ԿԸՀ` մանդատից հրաժարվելու համար, սակայն մինչեւ հիմա Ձեզ մանդատից չեն զրկել: Մենք տեղեկություն ունենք, որ խնդիրն այն է, որ թիմում չեն ցանկանում Գրիգոր Հարությունյանին տեսնել:

- Թե ինչու մանդատից չեն զրկում, այդ հարցը պետք է ուղղեք կա՛մ ԿԸՀ-ին, կա՛մ Երեւանի քաղաքապետարանին, կա՛մ էլ խմբակցությանը: ԿԸՀ դիմում ներկայացրել եմ սեպտեմբերի 27-ին: Ինչ վերաբերում է ինձնից հետո եկողին, ես շատ հեռու եմ նման խոսակցություններից, չունեմ նման տեղեկություն, հետեւաբար՝ չեմ կարող մեկնաբանել: Ընդամենը դա կարող եմ ասել: 

- Մենք նաեւ տեղեկացանք, որ Երեւանի քաղաքապետարանի իրավաբանական վարչության պետի հետ եք խոսել` հեռավար կարգով ավագանու նիստերին մասնակցելու հնարավորության մասին:

- Ես ոչ մի առնչություն չունեմ, անգամ չգիտեմ, թե ում մասին է խոսքը, չեմ էլ ցանկանում իմանալ: Որեւէ առնչություն չեմ ցանկանում ունենալ հայաստանյան որեւէ պաշտոնյայի հետ, որեւէ իշխանականի հետ:

- Իսկ չե՞ք փորձում ինքներդ ճշտել, թե ինչու է մանդատից Ձեզ զրկելու հարցն այսքան ձգձգվում:

- Դա ինձ չի հետաքրքրում: Ես ավագանու կազմում չեմ լինելու, բացառված բան է: Քննարկման ենթակա չէ: Նոտարով հաստատված հրաժարականն էլ` թե՛ բացարկի փուլում եւ թե՛ մանդատից հրաժարվելու համար, վաղուց ուղարկված է: Կարող եմ անգամ դիմումի տեքստը Ձեզ ուղարկել: Մնացած ոչ մի հարց իմ տիրույթում չէ:

- Ինչո՞ւ եք որոշել չվերցնել մանդատը:

- Որովհետեւ ինձ նման պրոցեսները չեն հետաքրքրում: Ոչ մի դիրք, ոչ մի պաշտոն ինձ պետք չէ, քանի կա «պրիդուրոկ» Նիկոլը, եւ նրա լակոտական իշխանությունը չի հեռացել: Իմ մասնակցությունն ընտրություններին հետապնդում էր միայն իշխանությունների հեռացման նպատակ:

- «Հանրային ձայն» կուսակցությունից չե՞ն փորձում համոզել, որ վերցնեք մանդատը:

- Մենք ամենասկզբից ունեցել ենք պայմանավորվածություն այն մասին, որ իմ մասնակցությունն ունի միայն հակաիշխանական բնույթ: Ուստի ես ավագանու կազմում լինել չէի կարող:

- Օրենքը նման դեպքերում ի՞նչ է ասում: Փաստորեն, երկու ամիս է՝ ԿԸՀ-ն Ձեր դիմումը չի քննարկում, Ձեզ մանդատից չի զրկում:

- Ենթադրում եմ, որ այդ ամենից օգտվում է քաղաքային իշխանությունը, առանձնապես չի էլ հետաքրքրում: Օդում պահում են մի չմասնակցող մանդատ, սա իմ ենթադրությունն է: Օրենքն ասում է, որ մեկ նստաշրջանի բացակայության դեպքում պետք է զրկել մանդատից ավագանու անդամին:

- Քաղաքային իշխանությունների ինչի՞ն է պետք Ձեր մանդատը:

- Ես չգիտեմ, ենթադրում եմ: Մեկ ընդդիմադիր եթե պակաս լինի, կարող են որոշ նախագծեր հաստատել, այսպիսի հարցեր: