Ռուբեն Թորոսյանը դիմել է Լիլիթ Մակունցին
ՀՀ ԱԺ «Իմ քայլը» խմբակցության ղեկավար
Օրիորդ Լ.Մակունցին
Հարգելի Օրիորդ Մակունց,
Հավանաբար տեղյակ եք, որ ստեղծվել է «Արցախ – Հայաստան և Անվտանգություն» Գլենդելյան Ֆորում («Հրապարակ» 18.01.21), որի նպատակն է աջակցել ԱՄՆ հայանպաստ քաղաքականության արդյունավետության բարձրացմանը: Անց են կացվել Ֆորումի երեք հանդիպումներ, որոնց արդյունքում ձևավորվել է առաջիկա օրակարգը և որոշում է նախապատրաստվում հայ գերիների վերադարձի ուղղությամբ գործնական քայլերի մասին:
Սակայն, ոչ միայն հիշատակված, այլև հաջորդ որոշումների համար լուրջ խոչընդոտ է հանդիսանում ստեղծված իրավիճակից մեր Հայրենիքը դուրս բերելու ՀՀ քաղաքականության մասին մեր անտեղյակությունը և, որպես հետևանք, ոչ համակարգված գործունությունը: Ամեն դեպքում, մեր բոլոր նախաձեռնություններն այդ ուղղությամբ մնացել են անարդյունք և, ավելին, անարձագանք: Ցավոք, պետք է նշենք, որ վերջինիս պատասխանատուներից են նաև ձեր գլխավորած ԱԺ խորհրդարանական մեծամասնության խմբակցության որոշ ղեկավար-անդամներ:
Տեղեկացնում ենք նաև, որ հաջորդ հանդիպումը նվիրված է «Արցախի ամբողջականության ճանաչման և Մինսկի խմբի ակտիվացման» խնդրին: Հաշվի առնելով մի շարք հանգամանքներ, կարևորում ենք լսել ձեր տեսակետը վերջինիս վերաբերյալ և, հենց այդ հիմնավորումով, հրավիրում ենք ձեզ ելույթ ունենալ մեր Ֆորումում:
Ֆորումի հանդիպումները տեղի են ունենում շաբաթ օրերին Երևանի ժամանակով ժամը 22:00-ին, սակայն հաշվի առնելով ձեզ հետ հանդիպելու կարևորությունն, առաջարկում ենք ընտրել ձեզ նախընտրելի ցանկացած ողջամիտ ժամանակ:
Կանխավ շնորհակալ ենք,
Խորին հարգանքով՝
Ռուբեն Թորոսյան
ՀՀ Գերագույն խորհրդի նախագահության անդամ
Գլենդելյան Ֆորումի համակարգող
Հ.Գ. – ձեր և մեր կողմից որդեգրած Ժողովրդավարության, այդ թվում, հրապարակայնության ապահովման նպատակով, սույն գրությունն ուղարկում ենք նաև «Հրապարակ» օրաթերթին, որի հետ պատիվ կունենանք համագործակցել:
Կարծիքներ