Հիմա սա աջակցությու՞ն է, թե՞…

Ֆեյսբուքյան օգտատերը գրում է, որ Ռոբերտ Քոչարյանին «այսքան քաշքշեցին, տարան, բերեցին, բռնեցին թողեցին, եւ ինչի՞ համար՝ նրա արած այն լավ արարքի համար, որ 2008-ին իշխանությունը չհանձնեց ԼՏՊ-ին»:

Հիմա սա աջակցությու՞ն է երկրորդ նախագահին, թե նրան ներկայացված մեղադրանքի հաստատու՞մ: Օգտատերը փաստացի արձանագրում է, որ Ռոբերտ Քոչարյանը 2008-ին «պահել է» իշխանությունը, չի հանձնել Լեւոն Տեր-Պետրոսյանին: Իսկ դրանից ուղղակիորեն հետեւում է, որ ընտրություններում հաղթել է Լեւոն Տեր-Պետրոսյանը, բայց իշխանությունը չի անցել նրան, որովհետեւ Ռոբերտ Քոչարյանը «լավ արարք է գործել» եւ թույլ չի տվել: Ռոբերտ Քոչարյանին ներկայացված մեղադրանքի իմաստը, եթե իրավաբանական խուճուճություններից վերացարկվենք, հենց դա է: Ժողովուրդը քվե է տվել նախագահի թեկնածուներից մեկին, իշխանությունը փաստացի անցել է մյուսին, քանի որ այդպես է ցանկացել Ռոբերտ Քոչարյանը՝ այսպես է հետեւում օգտատիրոջ գրառման համատեքստից: Այսինքն, գործ ունենք մտածողության հետ, որ տեղի ունեցած ամեն ինչ արդարացնելի է, քանի որ դրանով կանխվել է Լեւոն Տեր-Պետրոսյանի վերադարձը: Հանրության, քաղաքական ուժերի, առանձին անհատների մի մասի համար, իհարկե, Տեր-Պետրոսյանը եղել եւ մնում է անցանկալի:

Բայց դա ի՞նչ կապ ունի ընտրողների մեծամասնության կամարտահայտությունը բռնաճնշելու հետ: Ոչ մի քաղաքական գործիչ, պետության ղեկավարի ոչ մի թեկնածու ամբողջ ժողովրդի համակրանքը չի վայելում: Գոյություն ունի սահմանադրություն, օրենք, որ սահմանում են իշխանության ձեւավորման սկզբունքները եւ կարգը: Իշխանությունը պատկանում է նրան, ով դրա համար լիազորվում է ընտրողների մեծամասնության կողմից: Եթե 2008-ին դա Լեւոն Տեր-Պետրոսյանն էր, իսկ օգտատիրոջ ասածից այդպես է հասկացվում, ուրեմն ԿԸՀ-ն նրան պետք է նախագահ հռչակեր, իսկ Քոչարյանը՝ հարգելով սահմանադրությունը, օրենքը եւ ժողովրդի մեծամասնության կամքը, ընդուներ քաղաքական իրականությունը:  Հայաստանի սահմանադրությունը Լեւոն Տեր-Պետրոսյանին չէր արգելում նախագահի թեկնածու առաջադրվել, քարոզչություն իրականացնել, հաղթել եւ ստանձնել պետության ղեկավարի պաշտոնը: Եւ եթե Ռոբերտ Քոչարյանը, լինելով գործող նախագահ, անկախ դրդապատճառներից՝ խոչընդոտել է, ավելին՝ «իշխանությունը չի հանձնել» Տեր-Պետրոսյանին, ուրեմն թույլ է տվել իշխանազանցություն: Այն, ինչ պնդում է մեղադրող կողմը, եւ հաստատում Քոչարյանի աջակից ֆեյսբուքյան օգտատերը: