Հրահանգել են՝ դեռ աշխատանքից չազատել
Ուսուցիչների 2023 թվականի կամավոր ատեստավորումներն ավարտվել են։ Չնայած արդյունքների մասին պաշտոնական դեռ որեւէ հաղորդագրություն չկա, բայց ուսուցիչների, մասնակիցների տարբեր հրապարակումներից եւ զրույցներից պարզ է դառնում, որ նախարարությունն այս անգամ էլ չի հաջողել, քանի որ նախարարության մոտեցումից, կազմված թեստերից այս տարի էլ դժգոհությունները շատ մեծ են եղել։
Այս տարի կամավոր ատեստավորվելու հայտ էր ներկայացրել շուրջ 6 հազար 355 ուսուցիչ, իսկ ատեստավորմանն այս անգամ մասնակցել են նաեւ միջին մասնագիտական որակավորմամբ այն ուսուցիչները, որոնց մասնագիտական գործունեությունը 2023-ի օգոստոսի 20-ից դադարեցվելու էր, եթե մինչ այդ չապահովեին ուսուցչին ներկայացվող պահանջները:
Իսկ այդպիսիք շատ են եղել, դեռ օգոստոսյան խորհրդակցության ժամանակ նախարարը տեղեկացրել էր, որ այդ 1300 ուսուցչից 700-ը նորից դիմել է կամավոր ատեստավորման համար, ու հաջող արդյունքի դեպքում կշարունակեն աշխատանքը: Բայց եթե անգամ այդ 700-ը հաջող հանձներ ատեստավորումը եւ շարունակեր իր աշխատանքը դպրոցներում, միեւնույն է՝ մյուս 500 ուսուցիչներն օգոստոսի 20-ից պետք է ազատվեին աշխատանքից։
Սակայն, ինչպես տեղեկացանք, դպրոցներին ներքին կարգով հրահանգել են՝ դեռ աշխատանքից չազատել ատեստավորումից կտրված ուսուցիչներին, թե ինչի են սպասում՝ պարզ չէ։ Ակնհայտորեն, նախարարությունը փորձում է միջանկյալ եւ ընդունելի լուծում գտնել մի քանի անգամ ատեստավորման պահանջվող շեմը չհաղթահարած ուսուցիչների համար, քանի որ այս տարի եւս կտրվածների թիվը մեծ է, իսկ այդքան ուսուցիչների միանգամից աշխատանքից ազատելը կարող է դժգոհության մեծ ալիք բարձրացնել, ինչից այս պահին փորձում է խուսափել նախարարությունը։ Առանց այն էլ դժգոհության աստիճանը շատ բարձր է ուսուցչական համայնքի ներսում, որոնք դեռ ավագանու ընտրություններից առաջ կառավարությանշենքի դիմաց ցույցեր արեցին՝ հանդիպում պահանջեցին վարչապետի հետ եւ ժամանակ տվեցին կառավարությանը՝ վերանայելու մանկավարժների աշխատավարձի չափը։
Կարծիքներ