Թուրքերն ու ադրբեջանցիները շարունակում են Գերմանիայում հայերին զանգահարել ու սպառնալ

«Հրապարակն» արդեն գրել էր, որ Գրեմանիայում բնակվող հայերին զանգահարում են անանուն համարներից և սպառնում: Այս մասին մեզ հետ զրույցում տեղեկացրել էր գերմանահայ իրավաբանների ասոցացիայի նախագահ, Էռլանգեն-Նյուրնբերգ համալսարանի դասախոս Գուրգեն Պետրոսյանը:

Զանգահարողները գերմանահայերին դիմում են անուններով ու ներկայանում են ադրբեջանցի կամ թուրք և սպառնում են կրկնել այն, ինչ արել են 1915 թվականին՝ բռնաբարել և հաշվեհարդար տեսնել: Զանգ ստացողներից ոմանք դիմել էին ոստիկանություն, իսկ ազգությամբ երկու հայի ոստիկանությունը հատուկ պաշտպանություն էր տրամադրել:
Սակայն, պարզվում է, անանուն զանգերը շարունակվում են, զանգահարողները շարունակում են սեռական հայոհյանքներ ու սպառնալիքներ ուղղել Գերմանիայում ապրող հայերին:
Գերմանահայ իրավաբանը հայտարարություն է տարածել, որտեղ հորդորում է հետևել իր ցուցումներին․

«Քանի որ անանուն զանգերը Գերմանիայում շարունակվում են, և նկատի ունենալով մեր հայրենակիցների պաշտպանությունը՝ հորդորում ենք՝ 
 անջատել անանուն զանգեր ստանալու հնարավորությունը ձեր հեռախոսային կարգավորումներից,
սահմանափակել անծանոթ անձանցից նամակներ ստանալը սոցիալական հարթակներում, մասնավորապես՝ Տելեգրամում,
խուսափել անձնական տվյալների հրապարակումից՝ հանրային հաշիվներում:
Եթե, այնուամենայնիվ, ստացել եք նման զանգ, խնդրում ենք՝
անմիջապես անջատել առանց արձագանքելու,
չտրվել սադրանքներին,
արձանագրել զանգի ստացման ճշգրիտ ժամը,
նշել՝ տղամարդո՞ւ, թե՞ կնոջ ձայն էր, ինչպես ներկայացավ զանգահարողը,
կապ հաստատել Հայ-Գերմանական իրավաբանների միության հետ հետևյալ հասցեով՝
     [[email protected]],
ներկայացնել՝ ինչ բովանդակություն ուներ խոսակցությունը:
Բացի դրանից, խնդրում ենք՝
 հայտ ներկայացնել ոստիկանությանը՝ հաղորդելով կատարված հանցագործության մասին,
 դիմումում շեշտեք այն հանգամանքը, որ զանգը ստացել եք հատկապես ձեր հայկական ինքնության և ազգանվան պատճառով»։

«Նկատենք, որ նման զանգերի մեթոդաբանությունը գրեթե նույնն է․
կապ հաստատում են՝ դիմելով անունով, ներկայանում են որպես թուրք կամ ադրբեջանցի և անմիջապես սկսում են սեռական բնույթի հայհոյանքներ և սպառնալիքներ։ Եղեք ամուր և մի տրվեք նման հոգեբանական պատերազմի մեթոդներին»,-շեշտում է Պետրոսյանը: