Քաղաքապետ փոխելն իրենց կուսակցության խնդիրն է

Երեկ քաղաքապետ Հայկ Մարությանին անվստահություն հայտնելու գործընթացի մասին հետաքրքրվեցինք Երեւանի նախկին փոխքաղաքապետ, մայրաքաղաքի մշակույթի ոլորտը համակարգող Արամ Սուքիասյանից, թե ինչ կարծիքի է այս ամենի մասին։ Սուքիասյանն ասաց, որ չի հասցրել հետեւել գործընթացին, ավելի շատ լսել է այդ մասին։

- Իսկ ի՞նչ կարող եք ասել այդ մասով, որ ավագանու անդամներն անվստահություն են հայտնում քաղաքապետին։

- Իրենք՝ իրենց կուսակցական խնդիրը։

- Ավելի շատ քաղաքական ու կուսակցակա՞ն հարց է, ըստ Ձեզ, թե՞ վատ կառավարման խնդիր։

- Դժվարանում եմ ասել, կարծում եմ՝ ավելի քաղաքական, կուսակցական, ներկուսակցական խնդիր է, եւ դա իրենց կուսակցության խնդիրն է։

- Իսկ արդարացման ենթակա՞ է այդ վարքը։

- Իրենց որոշելիք խնդիրն է, իրենց իրավունքն է, եւ դա օրենքով է կարգավորվում, դա տվյալ թիմի խնդիրն է։

- Բայց նորմա՞լ եք համարում այդ գործընթացը, որ որոշում են երեւանցիների կողմից ընտրված քաղաքապետին անվստահություն հայտնել՝ ոչ մի լուրջ փաստարկ չբերելով նրա վատ կառավարման մասին, ինչ է թե ՔՊ-ից դուրս է եկել։

- Քաղաքապետի անձը չի ընտրվում, թեկուզ առաջին համարն է, ընտրվում է տվյալ քաղաքական թիմը, էս դեպքում՝ «Իմ քայլը» դաշինքը։

- Բայց անձն է կառավարում։

- Կարգի համաձայն է կառավարում։ Ըստ կարգի՝ առաջին համարը դառնում է քաղաքապետ։

- Բայց այդ նույն «Իմ քայլը» խմբակցությունից մի մասը դեմ է այդ գործընթացին, մի քանիսը դուրս են եկել խմբակցությունից։

- Թող փոխեն կարգը, իրենց ձեռքն է, թող փոխեն, թող հայտ ներկայացնեն Ազգային ժողով ու փոխեն Երեւանի մասին օրենքում կարգը։

- Իսկ Դուք՝ որպես նախկին փոխքաղաքապետ, որը Երեւանի կառավարման փորձ ունի, նորմա՞լ եք համարում, որ կարելի է քաղաքական քմահաճությունների, մեկ անձի քմահաճույքով քաղաքապետ փոխել` առանց լուրջ հիմնավորման։

- Ես չեմ կարծում, որ այնտեղ հիմնավորում չկա, ցավոք՝ չեմ հետեւել, թե ինչպիսի հիմնավորումներ են հնչում։

- Դե, ասում են՝ կապը խզել էր թիմի հետ, օրինակ։

- Չեմ հետեւել, որ ռեալ ասեմ։

- Իսկ Մարությանի ելույթը լսե՞լ եք։

- Ոչ, ես հիմա քննությունների եմ Թատերական ինստիտուտում, չեմ կարող հետեւել։

- Մարությանի աշխատանքից Դուք գո՞հ էիք՝ որպես Երեւանի նախկին փոխքաղաքապետ, գոնե մշակույթի ոլորտում իրականացված աշխատանքների մասով։

- Մի շարք դրվագներով՝ այո, իսկ բազմաթիվ դրվագներով՝ ոչ։

- Իսկ Հրաչյա Սարգսյանը որ գա, ակնկալում եք, որ ավելի լա՞վ քաղաքապետ կլինի։

- Դժվարանում եմ ասել, թող աշխատի, կերեւա, չեմ կարող ասել։ Բայց որ Հայկ Մարությանից հատկապես մշակույթի ոլորտի կառավարման մասով ես ակնկալիքներ ունեի, դրանք, կարծում եմ, չարդարացվեցին։

- Եթե մեկ բառով գնահատենք՝ Հայկ Մարությա՞նն էր ավելի լավ քաղաքապետ, թե՞ Տարոն Մարգարյանը։

- Այդպիսի գնահատական, նախ, չի կարելի հնչեցնել։ Իհարկե, Տարոն Մարգարյանի օրոք բազմաթիվ շեշտակի փոփոխություններ է կրել Երեւանի դիմագիծը, որոնք ակնհայտ էին եւ փաստ։

- Իսկ ինչո՞ւ չի կարելի գնահատել՝ Մարությա՞նն էր ավելի լավ քաղաքապետ, թե՞ Մարգարյանը։

- Կարծում եմ՝ ճիշտ չէ իմ կողմից գնահատելը, որովհետեւ ես եղել եմ փոխքաղաքապետ եւ կարող եմ ունենալ իմ սուբյեկտիվ մոտեցումը։