«Նստող չկա, վաղն էլ քշեմ, էլ դուրս չեմ գա». մոնիտորինգային շաբաթ երթուղայինների վարորդների համար
Հազար ու մի միջոցառումներից, որոնք կառավարությունն իրականացնում է համավարակի հետևանքները փոխհատուցելու համար, դուրս է մնացել քաղաքային տրանսպորտը: Այսօր գազելներն ու ավտոբուսները դատարկ են երթևեկում, պահպանելով կանգնած ուղևոր չունենալու սկզբունքը: Հասկանալի է, սակայն, որ երթուղայինների վարորդներին համարյա ոչինչ չի մնում:
Որոշ գծատերեր հանել են երթուղիները սպասարկող վարորդների համար պարտադիր օրական վճարումները, այսպես կոչված «պլան» հասկացությունը: Թիվ 41 երթուղու վարորդներից մեկը պատմեց, որ տրանսպորտը բացվելու օրվանից իրենք «պլան» չեն տալիս: «Քշի, ինչքան ուզում ես: Մենք էլ ենք զարմանում: Ինչքա՞ն ժամանակ սենց կլնի, չգիտենք», - ասում է նա:
Սակայն ոչ բոլոր գծերում է այս վիճակը: Կան գծատերեր, որոնք շարունակում են վարորդներից օրական 10-13 հազար դրամ վերցնել: Նրանք էլ դժգոհում են, որ «ավտոները» դատարկ քշելով, շուտով չեն կարողանալու գիծ դուրս գալ: Քաղաքի ամենաանհասանելի կետերից մեկը՝ «ՏԵՑ-ի կրուգ» կոչվող թաղամասը սպասարկող վարորդ Կ-ն մեր խնդրանքով հաշվեց իր ծախսն ու եկամուտը:
«7000 գազի եմ տվել, գումարած 400 դրամ՝ ալկոգելին, 3 դիմակ, ձեռնոց, եղա՞վ հազար, գումարած13000 պալնի փող: Բայց նստողը քիչ ա: Երթի երկարությունը 4-րդ գյուղի «Մարիաննա» կաթի գործարանի մոտից մինչև միսկոմբինատի փողոց 28 կիլոմետր ա: Նստող չկա, եթե սենց լինի, վաղն էլ քշեմ, էլ դուս չեմ գա»:
Թե վարորդները, թե ուղևորները հասկանում են, որ այս կերպ քաղաքային տրանսպորտը երկար չի ձգելու: Տրանսպորտային կազմակերպություններին սուբսիդավորելու հարցը բաց է մնացել: Առանձնահատուկ միջոցառում ինչպես, ասենք, ռեստորանների, կամ վարսավիրանոցների աշխատողների համար, տրանսպորտային կազմակերպությունների աշխատողների համար չկա: Քաղաքապետի խոսնակ Հակոբ Կարապետյանը «Հրապարակին» հայտնեց, որ հարկադիր պարապուրդի մատնված վարորդները կառավարության սոցիալական ծրագրերից օգտվում են ընդհանուր հիմունքներով: «Դրանք ընդհանուր ծրագրեր են, որոնք վերաբերում են նաև տրանսպորտային ընկերությունների աշխատողներին: Բացի դա, քաղաքային ենթակայության տակ գտնվող կազմակերպությունների վարորդները հարկադիր պարապուրդի շրջանում վարձատրվել են իրենց աշխատավարձի երկու երրորդի չափով: Կան վարորդներ, որոնք անկախ նրանից, ստացել են, թե ոչ իրենց աշխատավարձի 2/3 չափը, միաժամանակ կառավարությունից են միանվագ գումար ստացել», - ասաց նա:
Հարցին, թե որքա՞ն է տրանսպորտը դատարկ երթևեկելու, հասկանալի է, չէ՞, որ ձեռնարկությունները այսպես երկար չեն կարողանա աշխատել, խոսնակը պատասխանեց. «Այս շաբաթը մոնիտորինգային շաբաթ է, կնայենք, կուսումնասիրենք, խնդիրները վեր կհանենք ու առաջարկներ կներկայացնենք կառավարություն»: Հնարավո՞ր է, որ տրանսպորտը նորից կանգնի, նկատի ունենալով վարակի տարածման բարձր տեմպը: «Չեմ կարող ասել: Այդ հարցը քաղաքապետարանի իրավասությունից վեր է», - պատասխանեց Հակոբ Կարապետյանը: Նա ասաց նաև, որ անհատական պաշտպանության միջոցներ և նյութեր տրամադրվում են միայն քաղաքային ենթակայության ընկերություններին: Մասնավոր ձեռնարկություններն իրենք պետք է ձեռք բերեն դիմակ ու ալկոգել: Վարո՞րդը, թե՞ ձեռնարկության տնօրենը հարցը գործատու-աշխատող հարաբերությունների տիրույթում է լուծվում:
Մայրաքաղաքի ավտոբուսային հավաքակազմում, ըստ քաղաքապետարանի տվյալների, առկա է 561 ավտոբուս, փաստացի շահագործվում է 39 երթուղի, որոնցում օրական միջին հաշվով գիծ է դուրս բերվում մոտ 400 միավոր շարժակազմ։ Ավտոբուսային երթուղիները պայմանագրային հիմունքներով սպասարկում են «Երևանի ավտոբուս» ՓԲԸ-ն և մասնավոր 17 կազմակերպություններ։
Կարծիքներ