«Դու էլ իմ հողը չես մտնելու». հողային վեճ Արզնի գյուղում 

Աբովյան քաղաքի բնակիչ, տաքսիստ Ռաֆիկ Քոչարյանն Արզնի գյուղում հողամաս ունի, որը փաստաթղթերով սեփականաշնորհել է 1992 թվականին։ Հողամասի տարածքը կազմում է մոտ 900 քառակուսի մետր։ 

Մոտ 6 ամիս առաջ հարևանությամբ մեկը հողամաս է գնել ու եկել Քոչարյանին ասել, որ «սպուտնիկը ցույց է տվել, որ կողքի հողամասի մի մասը նույնպես իրեն պետք է տրվի»։

Այս իրավիճակում Քոչարյանի այգու հարևանությամբ տեղակայված հողամասի սահմանների հետ կապված նույնպես խնդիր է առաջացել, և «արբանյակի տվյալներով՝ այդ հողատարածքի մի հատվածն էլ պետք է անցնի» հենց Քոչարյանին, սակայն իր հերթին էլ այդ սեփականատերն է դեմ որևէ տարածք զիջել։

«Կողքի տարածքն էլ մեկ ուրիշինն է։ Ինձ հետ ա կռվում. «Դու ո՞նց ես մտնում իմ տարածք», ասում է. «Դու էլ իմ հողը չես մտնելու»», - ասաց Քոչարյանը։

Աբովյանի բնակչի հողատարածքի վերջնամասում նաև տեղակայված է երկու էլեկտրական աշտարակ։ «Հիմա ինձ ուղարկում են երկու վիշկի մեջ։ Ծառերն ինքը պետք է տրակտորով քանդի։ Իրա ամայի հողում ծառ չկա։ 30 տարի անցել է, եկել է, ասում է. «Պիտի քանդեմ»։ 30 տարվա ծառերը վերացնե՞մ։ Օրենքը թույլատրո՞ւմ է վիշկի տակ գնալ», - նշեց նա։

Աբովյանի բնակիչը նշեց, որ այս թեմայով խոսել է Արզնիի գյուղապետի հետ, ով ասել է «Ինձ նախորդած գյուղապետն է վաճառել հողատարածքը»։ Կադաստրի ղեկավարն էլ ասել է, որ «արբանյակն ինչպես ցույց է տալիս, այդպես էլ պետք է լինի։ 

Մինչ այժմ խնդրի լուծումը մնում է օդից կախված։