Անձրևի պատճառով են ձգձգվում փոսալցումները․ Նոր Հաճնի աշխատակազմի քարտուղար

Երեկ «Հրապարակ» էր զանգահարել Կոտայքի մարզի Նոր Հաճն համայնքի բնակիչներից մեկն ու ասել, որ տեղի ասֆալտային փոսալցումները շատ դանդաղ են կատարվում, և մեքենաների համար դժվարանցանելի են ճանապարհները։

Այս խնդրով «Հրապարակը» կապ հաստատեց համայնքապետարանի աշխատակազմի քարտուղար Արման Սմբատյանի հետ։

«Ասֆալտապատումը կատարվում է համաձայն գրաֆիկի։ Եղանակային պայմանները մի քիչ դժվարացնում են մեր գործերը, անձրևի պատճառով են ձգձգվում։ Բայց երեկ ահագին էլի փոսալցումներ են կատարել։ Մի քիչ նորմալ եղանակ է եղել, արդեն լցրել են», - ասաց Արման Սմբատյանը։