Ադրբեջանական իշխանությունները նոր են հիշել, որ կան միջազգային կոնվենցիաներ եւ օրենքներ
Արդեն 10 օր է՝ Ադրբեջանն ու Թուրքիան, խախտելով միջազգային, մարդկային համակեցության բազում նորմեր, պատերազմում են հայկական երկրորդ հանրապետության` Արցախի դեմ: Ռազմական ոտնձգություններ են լինում նաեւ ՀՀ տարածքների նկատմամբ: Զոհեր ու ավերածություններ կան նաեւ Վարդենիսի տարածաշրջանում: Խախտվում են միջազգային մի շարք պայմանագրեր. Ժնեւյան կոնվենցիան, ՄԱԿ-ի անվտանգության խորհրդի որոշումներն ու բանաձեւերը, Մարդու իրավունքների եվրոպական կոնվենցիան, պատերազմական գրված ու չգրված օրենքներ:
Ռմբակոծության են ենթարկվում Արցախի մայրաքաղաք Ստեփանակերտը, Շուշին, արցախյան գյուղերն ու քաղաքները, զոհվում են երեխաներ, կանայք, խաղաղ բնակչություն: Խաղաղ բնակչության դեմ կիրառվում են արգելված զենքեր. Ադրբեջանի կողմից LAR-160 եւ սմերչ համազարկային կրակի ռեակտիվ հրթիռներ են արձակվել Հադրութ քաղաքի, մայրաքաղաք Ստեփանակերտի եւ մայրաքաղաքին մոտ գտնվող Շոշ գյուղի ուղղությամբ: Վնասվում են ենթակառուցվածքներ: Գնդակոծության տակ են հայտնվում միջազգային եւ հայկական լրատվամիջոցների ներկայացուցիչները, կան ծանր վիրավորներ, ֆրանսիացի լրագրողի կյանքը հայ բժիշկները մեծ դժվարությամբ փրկեցին: Թուրքիան Արցախի խաղաղ բնակչության դեմ պատերազմելու է բերել վարձկան գրոհայինների, ահաբեկիչների: Այս եւ այլ շատ հանցագործությունների ականատես ենք լինում այս օրերին։ Ագրեսոր Ադրբեջանն ու Թուրքիան պատերազմական հանցագործություններ են իրականացնում: Այսօր, երբ արդեն արցախյան բանակի կողմից պայթեցվել է Գանձակի ռազմական օդանավակայանը, որտեղից Արցախի վրա թռիչք էին իրականացնում կործանարար թուրքական F-16 կործանիչներն ու ԱԹՍ-ները, ադրբեջանական իշխանությունները հանկարծ հիշել են միջազգային կոնվենցիաների ու իրավունքների մասին:
Ադրբեջանի գլխավոր դատախազությունը հայտարարություն էր տարածել. «Հոկտեմբերի 4-ի մոտավորապես ժամը 10:00-ից (GTM + 4) սկսած՝ Հայաստանի զինված ուժերը, կոպտորեն խախտելով միջազգային իրավունքի նորմերը եւ սկզբունքները, 1949 թ. Ժնեւի կոնվենցիաները եւ դրանց լրացուցիչ արձանագրությունները, ՄԱԿ-ի Անվտանգության խորհրդի որոշումները եւ բանաձեւերը, դիտավորյալ թիրախավորելով Ադրբեջանի խաղաղ բնակչությանը, գնդակոծում են երկրի մեծությամբ երկրորդ քաղաք Գյանջա բնակավայրը, որը գտնվում է այն տարածքից դուրս, որտեղ ռազմական գործողություններ են ընթանում ծանր հրետանուց»:
Փաստորեն, ադրբեջանական ղեկավարությունը «տառաճանաչ» է. կարդացել է, ծանոթ է միջազգային կոնվենցիաներին: Ու այդ ամենն իմանալով՝ խախտում է դրանք ու ինքն էլ սկսում լալահառաչ տեքստեր տարածել, թե Հայաստանն է խախտում դրանք: Ի դեպ, մարտի են նետվել նաեւ դիվանագետները՝ օրերս, օրինակ, Ղազախստանում Ադրբեջանի դեսպանն է ասուլիս տվել եւ դիմելով Ղազախստանի իշխանություններին ու ժողովրդին՝ ասել է․ «Մենք այսօր ունենք ձեր օգնության կարիքը»։
Կարծիքներ