Քայլ արա, եւ փուչիկը կպայթի

Ռուսաստանում Հայաստանի դեսպանը եւ Ռուսաստանի հայերի միությունը դիմել են պատկան մարմիններին՝ «Նեզավիսիմայա գազետայում» Սումգայիթի ջարդերի մասին ադրբեջանցի Լեւ Մաասի հոդվածի առթիվ հետաքննություն անցկացնելու պահանջով: Խոսքը մի հրապարակման մասին է, որտեղ Սումգայիթի ջարդերի կազմակերպիչ եւ իրականացնող են ներկայացված… հայերը: Եւ ահա ադրբեջանական քարոզչությունը մատնվել է խուճապի:

Բաքվից Ռուսաստանում ապրող ադրբեջանցի մեծահարուստներին, Վլադիմիր Պուտինի համալսարական դասընկեր Իլհամ Ռահիմովին կոչ են անում միջամտել, կանխել, փրկել «Նեզավիսիամայի գազետային»: Լրատվամիջոցի դեմ դատական հայց հարուցելն ընդունված պրակտիկա է ամբողջ աշխարհում: Եւ նման ստահոդ հոդվածի պատվիրատուները պետք է նկատի ունենային, որ հայկական կողմը չի լռի: Բաքվում, ըստ երեւույթին, այն կարծիքի էին, որ հայերը կպահանջեն հերքում, թերթը մի հրապարակում կանի, եւ հարցը կփակվի: Կմնա ռուսական լսարանին ադրբեջանական ներշնչումը՝ Սումգայիթի համար պատասխանատու են իրենք՝ հայերը: Գործն այլ ընթացք է ստանում, եթե հայկական կողմը հետեւողական գտնվի, սպասվում է դատաքննություն: Իսկ այնտեղ արդեն ադրբեջանական առասպելները չեն աշխատի:

Հարկ կլինի բերել իրավական հիմնավորումներ, նախաքննությամբ ապացուցված փաստեր: Ադրբեջանը տագնապի մեջ է: Եթե «Նեզավիսիմայա գազետայի» գործն իրավական ընթացք ստանա, ապա Սումգայիթի քարոզչական փուչիկն անխուսափելիորեն կպայթի: Բավական է, որ դատարանը պահանջի այդ գործով խորհրդային մարմինների իրականացրած քննության նյութերը, Ռուսաստանի տարբեր դատարաններում կայացված վճիռները, եւ ամեն ինչ իր տեղը կընկնի: Քայլն արված է, հարկավոր է մինչեւ վերջ հետեւողական լինել: Ադրբեջանը դիմելու է ամենավերջին ստորությունների, որպեսզի գործը չհասնի դատարան:

Բացառված չէ, որ Մոսվայի ադրբեջանական համայնքը դիմի սադրանքների: Բայց նահանջի տեղ չկա: «Նեզավիսիմայա գազետայի» գործը պետք է սկիզբը դառնա իրավական պահանջատիրության: Պետք է հասնել նրան, որ բացվի Բաքվի ջարդերի, հետագա բոլոր հանցագործությունների, այդ թվում՝ «Կոլցո» ռազմագործողության, Մարաղայի սպանդի գաղտնիքը: 28 տարի առաջ այս օրերին ադրբեջանական զինված խմբավորումները ներխուժել են Մարտակերտի շրջանի Ղազանչի գյուղ, տեղում սպանել շուրջ երկու տասնյակ ծեր մարդկանց, մի խմբի պատանդ վերցրել: Նրանց դիակները հետագայում վերադարձվել են այրված վիճակում: Մետաղալարերով կապկպված մարդկանց կենդանի նետել են Շահբուլաղի կրահորերը: Աշխարհում ո՞վ է տեղյակ այդ փաստերին: Ինչպես ֆաշիստներն էին հրեաներ գազախցիկ նետում, այդպես էլ ադրբեջանցիներն են քսաներորդ դարի վերջին հայերին կենդանի հրկիզել: «Նեզավիսիմայա գազետայի» գործը կարող է նախադեպային լինել: Ահա թե ինչու են Ադրբեջանում խուճապի մատնվել: Քայլն արված է, հարկավոր է հետամուտ լինել, որ ադրբեջանական քարոզչության փուչիկը պայթի: