Այսօր Երևանի ավագանու «Լույս» խմբակցության ղեկավար Դավիթ Խաժակյանը հայտարարել է, որ ՊԵԿ նախկին նախագահ Գագիկ Խաչատրյանը նվեր է մատուցել քաղաքապետարանին, և կարծում է՝ դա ոչ թե տեխնիկայի, այլ անշարժ գույքի տեսքով է։ Հիշեցնենք, որ այսօր մամուլում տարածվեց տեղեկություն այն մասին, թե Գագիկ Խաչատրյանը «ԿամԱԶներ» է նվիրել քաղաքապետարանին, որն այդքան էլ այդպես չէ։
Իրականում, ըստ մեր ունեցած տեղեկությունների՝ խոսքը Չարբախում (Աէրացիա, Շիրակի 88/1 հասցեում) կառուցվող քաղաքապետարանի Սանմաքրման և աղբահանության հիմնարկի համար նախատեսված ավտոպարկ և սպասարկման կենտրոնի շինարարության մասին է, որը, մեր տեղեկություններով, արժե 1.5 մլն դոլար։ Այս շինարարությունը Գագիկ Խաչատրյանի որդիները անում են որպես նվեր քաղաքին, որի դիմաց նրանց թույլատրվել է Պուշկինի փողոցում, Աֆրիկյանների քանդված շենքի տեղում կառուցվող հյուրանոցի վրա ևս հինգ հարկ ավելացնել։ Կառուցապատողը «Տերյան 5» ՍՊԸ-ն է, որը սկզբում ստացել էր 17 հարկանի շենքի թույլտվություն, հիմա, փաստորեն, դարձել է 22 հարկ։
Ի դեպ, բացի Չարբախից, շինարարություն է ընթանում նաև Աջափնյակում գտնվող քաղաքապետարանին կից «Երևան տրանս» ՓԲԸ տարածքում, որտեղ աղբատար մեքենաներն են կանգնում։ Այստեղ էլ, ըստ տեղեկության, ավտոբուսների պարկ են կառուցում։ Քաղաքապետարանի աղբահանության և սանմաքրման հիմնարկի տնօրեն Արմեն Գրիգորյանը Hraparak.am-ի հետ զրույցում հաստատեց այս փաստը, որ շինարարություն է ընթանում երկու տարածքներում էլ։
Նկատենք նաև, որ հեղափոխական իշխանությունները, որոնք ժամանակին պայքարում էին Աֆրիկյանների՝ մշակութային արժեք հանդիսացող շենքը քանդելու և մայրաքաղաքի կենտրոնում բարձրահարկ շենքեր կառուցելու դեմ, այսօր 22 հարկանի շենքի թույլտվություն են տալիս քաղաքի սրտում։
