Գյումրու «Կումայրի» ոստիկանության բաժնից գիշերը տեղի ունեցած խոշոր միջադեպը չեն մեկնաբանում
Երեկ ուշ երեկոյան անդրադարձել էինք Գյումրիում տեղի ունեցած խոշոր միջադեպին՝ ոստիկանների եւ քաղաքացիների մասնակցությամբ:
Հիշեցնենք, որ ականատեսների պատմելով՝ ամեն ինչ սկսվել է նրանից, երբ ոստիկանները մոտեցել են մի երիտասարդի եւ պահանջել փաստաթուղթ՝ դիմակը ոչ պատշաճ կրելու համար: Երիտասարդը փողոցում է գտնվել կնոջ եւ մոր հետ, ավելին՝ գիրկը մանկահասակ երեխան է եղել, երբ ընդդիմացել է ոստիկաններին և քաշքշուկ է սկսվել: Քաշքշուկին մասնակցել են անցորդները, տեղի է ունեցել մեծ իրարանցում:
Այսօր տեղեկացանք, որ Գյումրու «Կումայրի» ոստիկանության բաժնի աշխատակիցներն ամեն գնով բերման են ենթարկել երիտասարդին, եւ ըստ շշուկների, կան նաև այլ բերման ենթարկվածներ:
Դիմեցինք «Կումայրի» ոստիկանության բաժին՝ պարզելու արդյոք ճիշտ է տեղեկությունը, սակայն հերթապահ ոստիկան պ.Սարգսյանը մեզ ուղղորդեց տեղեկություն ստանալ Շիրակի ոստիկանության վարչությունից:
«Ես չգիտեմ եւ որևէ տեղեկություն չեմ կարող տալ, ճիշտ կլինի ոստիկանության լրատվական բաժնից պարզաբանեն, կամ տեղեկություն կարող եք ստանալ Շիրակի մարզի վարչությունից»,- պատասխանեց նա:
Շիրակի մարզային վարչությունից նույնպես հրաժարվեցին տեղեկություն հաղորդել. «Դա միայն լրատվական բաժինը կարող է մեկնաբանել»,-ասաց հերթապահը: Ոստիկանության լրատվության բաժնի հետ մեզ առայժմ կապ հաստատել չհաջողվեց:
Կարծիքներ