Էրդողանի ծաղրանկարը շատ է զայրացրել թուրք չինովնիկներին
Նիդերլանդների ընդդիմադիր, նացիոնալ-ազատական «Ազատություն» կուսակցության ղեկավար, պատգամավոր Գիրտ Վիլդերսի թվիթերյան էջում հրապարակած ծաղրանկարը զայրացրել է Թուրքիայի բարձրաստիճան պաշտոնյաներին, այդ թվում՝ թուրքական պետության ղեկավար Ռեջեփ Թայիփ Էրդողանին։
Հոլանդացի ընդդիմադիր գործիչը հրապարակել էր Էրդողանին պատկերող ծաղրանկար, որը ծաղրում է թե՛ Էրդողանին, թե՛ նրա ղեկավարած, Թուրքիայում իշխող «Արդարություն և զարգացում» (ԱԶԿ–AKP) կուսակցությանը։ Ծաղրանկարում Էրդողանի գլխի վրա ռումբանման սեւ գլխարկ է պատկերված, իսկ գլխարկի վրա գրված է «AK PARTİ» (ԱԶ ԿՈՒՍԱԿՑՈՒԹՅՈՒՆ)։ Նկարի վերևում Վիլդերսը գրել է «Terrorist» (Ահաբեկիչ)։
Թուրք պաշտոնյաները մեկը մյուսի ետևից արձագանքել են Վիլդերսի հրապարակմանը։
«Կա, այսպես կոչված, հոլանդացի պատգամավոր (Գիրտ Վիլդերս), որը վատ է խոսում մեր մասին: Ի տարբերություն նրա՝ մենք չենք ընդունում ռասիզմը, և ֆաշիստները տեղ չունեն Թուրքիայում», - ասել է Էրդողանը, փոխանցում է թուրքական «Daily Sabah» թերթը։
Թուրքիայի արտաքին գործերի նախարար Մեվլութ Չավուշօղլուն նշել է, որ
«Եվրոպայի ռասիստ անհաջողակները ցույց են տվել իրենց իրական գույները, երբ բախվել են իրականությանը»։ «Նրանք փորձում են օգտվել իսլամաֆոբիայից և այլատյացությունից: Իսկական ժամանակն է, որ մենք ասենք՝ «կանգ առ» Եվրոպայի ֆաշիստ, փչացած քաղաքական գործիչներին», - հավելել է Չավուշօղլուն:
Թուրքիայի նախագահականի հանրային կապերի վարչության ղեկավար Ֆահրեթին Ալթունը հայտարարել է, որ Եվրոպան ավելի ու ավելի վտանգավոր տեղ է դառնում մուսուլմանների համար: «Հարձակողական ծաղրանկարների, մուսուլմանների դեմ անջատողականության մեղադրանքների և մզկիթների դեմ արշավանքների «շան սուլիչի» քաղաքականությունը խոսքի ազատության հետ կապ չունի», - նշել է նա։
«Արդարություն և զարգացում» կուսակցության խորհրդարանական խմբի ղեկավար Նաջի Բոստանջըն նույնպես քննադատել է Վիլդերսին՝ նշելով, որ վերջինս «իր կեղտոտ հռետորաբանության գերին է: «Նա ամոթ է մարդկության համար: Հուսով ենք, որ հոլանդացիները, որոնք պատկանում են քաղաքակիրթ աշխարհին, կանեն այն, ինչ անհրաժեշտ է», - շեշտել է նա ՝ հույս հայտնելով, որ ծայրահեղ աջական պատգամավորը չի ընտրվի Հոլանդիայի հաջորդ ընտրություններում։
ԱԶ կուսակցության խոսնակ Օմեր Չելիքը հոլանդացի պատգամավորին «արհամարհելի», «մարդկության թշնամի» ու «ֆաշիստ» է անվանել։ «Պարտավորություն է այս արհամարհելի ֆաշիստների դեմ պայքարելը», - ընդգծել է Չելիքը:
«Մարդկությունը նրա մեջ չէ, ինչ նրանք կարող են ասել: Միակ պատճառը, որ նրանք հարձակվում են մեր նախագահի վրա, այն է, որ նա ճնշվածների կողքին է հանուն մարդկության, առանց փոխզիջման», - հավելել է կուսակցության խոսնակը:
Ի պատասխան թուրք պաշտոնյաներին՝ «Ազատություն» կուսակցության ղեկավար Գիրտ Վիլդերսը թվիթերյան էջում գրել է. «Թուրքերը զայրացած են, քանի որ ես Էրդողանին ահաբեկիչ անվանեցի: Ճշմարտությունը երբեմն տհաճ է, բայց ոչ պակաս ճշմարիտ»:
Անդրադառնալով կոնկրետ Էրդողանին՝ Վիլդերսը «Twitter»-ում կիսվել է վերջինիս ելույթից մի հատվածով ու գրել. «Էրդողանն ինձ ֆաշիստ է անվանում: Բայց դա նրա սեփական գաղափարախոսությունն է»։
Կարծիքներ