Մխիթար Հայրապետյանն ու իր պատվիրակությունը Գյումրու բակերում ջազ են ունկնդրում

Գյումրու ավագանին վերջին նիստին մեկ միլիոն դրամ համայնքի բյուջեից հատկացրեց Ջազի միջազգային օրը յուրահատուկ տոնելու համար: Գյումրու քաղաքապետարանն ու «Մանուկյան ընկերություն»-ը ապրիլի 30-ից մայիսի 3-ը Գյումրիում երկրորդ անգամ իրականացնում են HAY-AT JAZZ նախագիծը՝ նվիրված Ջազի միջազգային օրվան։ Ըստ քաղաքապետարանի, 1մլն դրամը այն մինիմալ ծախսն է, որն անհրաժեշտ է նախագիծն իրագործելու  համար: Գումարը  բավարար է ջազմեններին հյուրընկալելու, համերգները պատշաճ կազմակերպելու համար: Ջազային համերգներն անցկացվելու են Գյումրու թանգարանների բակերում՝ 4 օր շարունակ մշակութային «հայաթները» վերածելով ջազային համերգների հարթակների։ Ապրիլի 30-ին Գյումրու Ձիթողցոնց տուն-թանգարանի բակում «Միքայել Ոսկանյան եւ ընկերներ. MVF Band» խմբի մասնակցությամբ  մեկնարկել  է  HAY-AT JAZZ նախագիծը:

Երեկ  արդեն երկրորդ  ջազային համերգն է տեղի ունեցել Ավետիք Իսահակյանի տուն-թանգարանի բակում: Ջազի   սիրահարներն ունկնդրել են  Լուսինե Սարգսյան եւ Կարեն Գրիգորյան քառյակին: 

Ուշագրավ է,որ  համերգին ներկա է եղել նաև  ՀՀ ազգային ժողովի գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը: Ինչպես քաղաքապետարանն է  տեղեկացնում, համերգին ներկա է եղել Մխիթար Հայրապետյանի պատվիրակությունը՝ նրա գլխավորությամբ:  Ներկաների խոսքերով Մխիթար Հայրապետյանն ու իր պատվիրակությունը թանգարանի   բակում ջազ են  վայելել ընդամենը 5-10 րոպե,որից հետ  աննկատ հեռացել են: Նկատենք,որ «Իմ քայլը» դաշինքի      ԱԺ երիտասարդ   պաշտոնյաներին  վերջերս Գյումրին ձգում է: Ընդամենը մի քանի օր առաջ՝ Քաղաքացու օրվան նվիրված տոնակատարությունների  շրջանակում, ողջ օրը Գյումրիում անցկացրեց Լիլիթ Մակունցը՝ պատգամավորներից մի քանիսի հետ միասին:

Հիշեցնենք,որ այսօր արդեն  ջազի սիրահարները Գյումրիում անվճար   ջազ ունկնդրելու հնարավորություն ունեն Ասլամազյան քույրերի պատկերասրահի բակում,որտեղ հանդես կգա «Հյուսնունց քառյակը»:

Իսկ ահա արդեն վաղը՝ջազի վերջին օրը, Հովհաննես Շիրազի տուն-թանգարանի բակում կհյուրընկալվի Լեւոն Մալխասյան եւ Մալխաս ջազ բենդը:

Լուսանկարները՝ Գյումրու քաղաքապետարանի