Թրամփը՝ Պուտինի հետ հանդիպման մասին

ԱՄՆ նախագահ Դոնալդ Թրամփը հայտարարել է, որ դժվար թե Սաուդյան Արաբիայում հանդիպի Ռուսաստանի առաջնորդ Վլադիմիր Պուտինի հետ, սակայն առաջարկել է, որ հանդիպումը կարող է տեղի ունենալ 2025 թվականի մայիսին նրա Մերձավոր Արևելք կատարած այցից անմիջապես հետո:

«Ես կհանդիպեմ (Պուտինի հետ)»,- ասել է Թրամփը՝ չորեքշաբթի օրը Սպիտակ տանը պատասխանելով լրագրողների հարցերին։

Նրան հարցրել են, թե արդյոք նախատեսում է հանդիպել Ռուսաստանի ղեկավարի հետ։ Հարցին, թե Սաուդյան Արաբիայում հնարավոր հանդիպում կկայանա, նա ասել է. 

«Դա հնարավոր է, բայց, ամենայն հավանականությամբ, ոչ: Կարծում եմ, որ մենք նրանց հետ կհանդիպենք դրանից անմիջապես հետո», - ասել է Թրամփը:

Սպիտակ տունը երեքշաբթի հայտնել է, որ Թրամփը մայիսի 13-ից 16-ը կմեկնի Մերձավոր Արևելք՝ այցելելով Սաուդյան Արաբիա, Քաթար և Արաբական Միացյալ Էմիրություններ։