Ես 35 տարի պայքարել եմ գողականների դեմ

Չնայած իշխանություն-ընդդիմություն կրքերը եռացին օրենքով գողերի եւ քրեական ենթամշակույթի դեմ նախագծի քննարկման ժամանակ, բանը հասավ նույնիսկ ձեռնամարտի, եւ արդյունքում ԲՀԿ-ն դեմ քվեարկեց, ԼՀԿ-ն՝ ձեռնպահ անհասկանալի ձեւակերպումներով ընդունված օրենքի նախագծին, այդուհանդերձ, ԼՀԿ-ական պատգամավոր Ռուբիկ Ստեփանյանը կողմ է քվեարկել՝ ի հեճուկս հարազատ ֆրակցիայի։

Բանն այն է, որ Ստեփանյանը նախկին ոստիկան է, ավելի քան երեսուն տարի ոստիկանական համակարգում բարձր պաշտոններ է զբաղեցրել՝ Կոտայքի մարզային ոստիկանության պետ, «Նուբարաշեն» ՔԿՀ պետ եւ այլն։ Երեկ նա մեզ հետ զրույցում ասաց, որ իր «ապրածը» թույլ չէր տա, որ կողմ չքվեարկեր։

- Ես 35 տարի համակարգում աշխատել եմ, ամբողջ կյանքս պայքարել եմ դրա դեմ, երկու տարի էլ ՔԿՀ-ում եմ աշխատել։ Ես կողմնակից եմ, որ ամեն ինչն օրենքով սահմանված կարգով լինի, որ անմեղ մարդիկ չընկնեն․․․ Դրա համար ես կողմ եմ քվեարկել, բայց էնպես չի, որ խմբակցությունից գաղտնի եմ քվեարկել, ես իմ խմբակցությանն ասել եմ, որ կողմ եմ քվեարկելու։

- Բայց ձերոնք ձեռնպահ էին, իրենց համար կարծես թե անհասկանալի, խնդրահարույց ձեւակերպումներ, կարգավորումներ կային։

- Այո, իրենք ասացին՝ տարեք, էդ խնդիրները վերացրեք, բերեք, բոլորս կողմ կլինենք, բայց իրենց առաջարկությունները չընդունեցին, դրա համար ձեռնպահ քվեարկեցին, բայց ես կողմ քվեարկեցի։

- Այդ ինչպե՞ս եղավ, ինչ է, կարեւո՞ր չէին ձեր ֆրակցիայի առաջարկները, անտեսեցիք, որ չեն ընդունել, ու կողմ քվեարկեցիք։

- Չէ, ես չեմ ասում՝ կարեւոր չեն, բայց ես սկզբից եմ ասել, որ կողմ եմ քվեարկելու։

- Այսինքն՝ հերիք էր, որ անունը դրված էր գողականների դեմ պայքար, Ձեզ՝ որպես նախկին ոստիկանի, պատիվ չէր բերում, որ  կողմ չքվեարկեիք։

- Հա, բա ես ուսադիրներ եմ կրել, 35 տարի աշխատավարձ եմ ստացել, էդ հացով եմ ապրել ու դրանց դեմ պայքարել եմ, ու ինձ էլ ճանաչողները գիտեն։ Եթե մի հատ գողական կա ու ինձ ճանաչում է, ուրեմն գիտի իմ բնավորությունը, որ ես անողոք եմ եղել իրենց դեմ։

- Փաստորեն, լավ չեք պայքարել, որ իրենք կան, ու էսօր էլ օրենք եք ընդունում։

- Մենակով չեմ պայքարել, չէ՞, տարբեր մարդիկ տարբեր ձեւ են պայքարել, ընենց չի, որ ես լավ չեմ պայքարել։

- Դուք քանի որ մոտիկից եք ճանաչում այդ խավին, ասացեք, խնդրեմ՝ ովքե՞ր են գողերն ու գողականները, ո՞նց են տարանջատելու այդ ենթամշակույթը կրողներին, ո՞նց են պայքարելու, ձեր ընդդիմադիր գործընկերների համար այնքան էլ հստակ չէր, ու այդ մտահոգությունից ելնելով է, որ կողմ չեղան նախագծին։

- Ես ընդդիմադիր չգիտեմ, բայց կոնկրետ «Լուսավորն» ասում էր՝ էս խնդիրները կուղղեք, կբերեք։ Կոնկրետ ինչ խնդիր էր, չգիտեմ։

- Ամեն դեպքում, տվեք սահմանումը գողերի ու գողականների։

- Ովքեր որ ակնհայտ ասում են՝ մենք գող ենք, էն, որ բացահայտ ասում են, մեկն ասում է՝ մենք ավտարիտետ ենք։

- Ենթադրենք՝ երիտասարդները կատակով ասեն նման բան, պիտի բռնեն տանե՞ն։

- Հա, հիմի դպրոցական երեխեքն էլ իրար տենում ասում են՝ բարեւ, ախպեր, ու բռնում պաչում են, հո ես չե՞մ ասում՝ թաղի երեխեքն էլ են։ Չէ՜, թաղի երեխեքը չէ, կոնկրետ գողական մշակույթ ունեցողները։

- Դուք իրենց ո՞նց եք ճանաչում, ո՞նց կիմանաք՝ մարդն ունի՞ էդ մշակույթը, թե՞ ոչ։

- Դե, սերնդափոխություն է եղել, մի քանիսին ճանաչում եմ գործի բերումով, մի մասին՝ ոչ։