Դատարանը այլ տարբերակ չունի, քան մերժել կալանավորման միջնորդությունը․ Ռոբերտ Սուքիասյանի փաստաբան

Փաստաբան Գոռ Միքայելյանը ֆեյսբուքյան իր էջում գրել է․

«Ռոբերտ Սուքիասյանի ձերբակալման իրավաչափության և կալանավորման վերաբերյալ դատական նիստն ավարտվեց: Որոշման հրապարակումը նշանակված է վաղը ժամը 12:00: Քիչ անց կներկայացնեմ այն դատավարական խնդիրը, որի պատճառով դատարանը նույնիսկ մեծ ցանկության դեպքում չի կարող բավարարել կալանավորման միջնորդությունը»:

Ավելի ուշ փաստաբանը ֆեյսբուքյան իր էջում գրեց․

«Այս հարցը այնքան է քննարկվել, որ արդեն ոչ իրավաբաններն էլ գիտեն, որ առանց մեղադրանք առաջադրելու հնարավոր չէ անձին կալանավորելու միջնորդություն ներկայացնել: Ամեն անգամ վարույթն իրականացնող մարմինը փորձում է հիմնավորել, որ դա հնարավոր է, բայց ամեն անգամ դատարանները հաստատում են, որ առանց մեղադրանք առաջադրելու անձին կալանավորելու միջնորդությունը ենթակա է մերժման:

Ռոբերտ Սուքիասյանին կալանավորելու միջնորդությունը ներկայացվել է առանց նրան մեղադրանք առաջադրելու, և դատավոր Վաչե Մարգարյանը նույնիսկ մեծ ցանկության դեպքում այլ տարբերակ չունի, քան մերժել կալանավորման միջնորդությունը:

Մնացած անհիմն հանգամանքները ներկայացնելն այլևս անիմաստ եմ համարում»:

Հիշեցնենք, որ հուլիսի 18-ին Երևանի Ամիրյան փողոցում կրակոցներ էին հնչել, ինչից հետո «Արմենիա» բժշկական կենտրոն բուժօգնության էր դիմել 1979թ. ծնված ԱՄՆ մի քաղաքացի՝ ոտքի շրջանի հրազենային վնասվածքով։