Ալեն Սիմոնյանը ստում է՝ ՀՀ որեւէ օրենքով Արցախի Հանրապետությունը չի լուծարվել

Ալեն Սիմոնյան, այդ խոսքը դու ասացիր, Նիկոլը չի ասել: Դու ասացիր, որ քեզ համար «Լեռնային Ղարաբաղի նախագահ» եզրույթ գոյություն չունի: Ոչինչ չեմ շփոթում, չէ՞: Գիտե՞ս դա ինչ է նշանակում: Դա նշանակում է, որ Նիկոլը մի գեղեցիկ օր փասափուսան կհավաքի Հայաստանից, իսկ քեզ ՀՀ իրավապահները կուղարկեն աշխատանքային գաղութ: Հոդվածն էլ կարող եմ նշել՝ պետական խուլիգանություն: Այո, երբ բարձր պետական պաշտոն զբաղեցնող անձը նման հիմարություն է դուրս տալիս, դա բնորոշվում է ոչ այլ կերպ, քան պետական խուլիգանություն: Չեմ ուզում ասել՝ պետական էշություն, որովհետեւ մի քիչ հարիր չէ քաղաքական առաջնային մանդատ ունեցող ԱԺ նախագահի իմիջին, բայց խուլիգանությունը ճիշտ այն բառն է, որով ես կբնութագրեի Ձեր արած հայտարարությունը:

Ի դեպ, Նիկոլն էլ է այդ հոդվածի տակ ընկել: Դա Պրահայում էր, որտեղ նա Արցախը ճանաչեց Ադրբեջանի մաս: Նիկոլը, սակայն, բավականաչափ ճարպիկ գտնվեց եւ հայտարարեց, որ Արցախն Ադրբեջանի մաս են ճանաչել նախկինները: Դա շատ ծիծաղելի էր, բայցեւանպես, դեռ աշխատում է հասարակության որոշ շրջանակներում: Թող լինի այդպես՝ «նախկիններն են Նիկոլից առաջ (Պրահայից առաջ) Արցախը ճանաչել Ադրբեջանի մաս»։ Իսկ ի՞նչ պետք է ասես դու, Ալեն Սիմոնյան, մի՞թե դու եւս պատրաստվում ես պնդել, որ «Արցախի Հանրապետության կամ Լեռնային Ղարաբաղի նախագահ» եզրույթ դեռ նախկինների ժամանակ գոյություն չի ունեցել: Կարծում ես՝ կաշխատի՞: Հը-ը, չի աշխատի, հույս չունենաս: Դու կգնաս գաղութ, որտեղ շատ խիստ կվարվեն քեզ հետ: Արցախի Հանրապետության նախագահը, չմոռանանք, գտնվում է Հայաստանում, եւ դուք, Ալեն Սիմոնյան, ՀՀ հատուկ ծառայություններով, ԴԱՀԿ-ով- բանով նրանից առգրավել եք մի ավտոմեքենա, որը, ոչ ավել, ոչ պակաս, սպասարկում էր Արցախի Հանրապետության նախագահին: Լավ էր սպասարկում, թե վատ՝ այլ հարց է: Պարզապես հիշեցնեմ, որ լրատվամիջոցները հստակ ֆիքսել են այդ գործողությունը եւ գրել, որ ՀՀ իշխանությունները (իմա՝ Ալեն Սիմոնյանը, Նիկոլ Փաշինյանը եւ այլք) տարել են Արցախի Հանրապետության նախագահ Սամվել Շահրամանյանի ավտոմեքենան: Սա նույնիսկ օրը ցերեկով գողություն չէ: Սա փաստի արձանագրում է, եւ քանի դեռ մեքենան չեք վերադարձրել, լինելու է Արցախի Հանրապետության նախագահ, որին կողոպտել են Երեւանում: Պարոն Սիմոնյան, դուք գիտեիք, չէ՞, թե ում մեքենան եք տանում: Բա էլ ինչպե՞ս ես ԱԺ ամբիոնից անամոթաբար հայտարարում, թե Սամվել Շահրամանյան անունով մարդու չես ճանաչում՝ որպես ԱՀ նախագահի:

Եթե հարկ է, կարող ենք մի փոքր հեռվից գալ, օրինակ՝ 2018 թվականից: Հենց այդ թվականին (մինչեւ 2020թ.) Սամվել Շահրամանյանն Արցախի Հանրապետության նախագահի հրամանագրով նշանակվել է ԱՀ ԱԱԾ տնօրեն: Կուզենայի իմանալ՝ Ձեզ համար Արցախի Հանրապետության՝ «Արայիկ Հարությունյան անունով նախագահ» եզրույթ կա՞ր այն ժամանակ, թե՞ ոչ: Բա եթե կար, բա եթե կար նաեւ ԱԱԾ տնօրեն Սամվել Շահրամանյան, այդ ինչպե՞ս եղավ, որ հանկարծ Սամվել Շահրամանյանը դադարեց լինել Արցախի Հանրապետության կամ ԼՂ նախագահ: Ի վերջո, նա Լեռնային Ղարաբաղի նախագահ է դարձել Արայիկ Հարությունյանի հրաժարականից հետո, նա հեղաշրջում չի կատարել, նա այդ պաշտոնում ընտրվել է ԱՀ օրենքներին համապատասխան: Այն էլ ասեմ, Ալեն Սիմոնյան, որ Սամվել Շահրամանյանը, ի տարբերություն Ձեզ եւ ողջ ՔՊ-ի, այդ բարձր պաշտոնում ընտրվել է բազմաթիվ պատասխանատու պաշտոններ զբաղեցնելուց հետո: Մինչդեռ դուք, պարոն Սիմոնյան, նկատի ունեմ ողջ ՔՊ-ն, այսօր տաքսու վարորդ էլ չէիք աշխատի, եթե պատահաբար չդառնայիք ՀՀ վարչապետ, ԱԺ նախագահ, նախարար, մարզպետ, գյուղապետ, ԺԷԿ-ի պետ եւ այլն: Մենք ձեր, շատ ներողություն, ոհմակին լավ ենք ճանաչում եւ գիտենք՝ ով ով էր 2018թ. խեղկատակություններից առաջ:

Բայց գանք այն հարցին, թե ինչու ոչ թե Նիկոլին, այլ հենց Ալեն Սիմոնյանին կտանեն աշխատանքային գաղութ: Նախեւառաջ՝ Նիկոլի դուրս տված հիմարությունները ոչ մի տրամաբանության չեն ենթարկվում, եւ նրան ավելի շուտ կարելի է տեղավորել համապատասխան առողջապահական հիմնարկում, քան՝ գաղութում: Իսկ որ Նիկոլը գաղութի կոնտինգենտին էլ կարող է փչացնել, կասկած չունեմ: Եվ ապա՝ Նիկոլը մի բան ունի, որ ոչ մի ՔՊ-շնիկ չունի: Ո՛չ Քոչարյան Անդոն, ո՛չ Երկրապահի պատասխանատու Սասունը, ո՛չ երես-փոխան Վահագն Ալեքսանյանը եւ ո՛չ էլ նույնիսկ Հովիկ Աղազարյանը: Դա յոթերորդ զգայարանն է, որով Նիկոլը զգում է, թե ինչ կարող է տեղի ունենալ իր հետ, եթե հերթական կարմիր գիծն անցնի: Ըստ այդմ էլ, նա նախ գտնում է «հնարավոր կռուտիտը» եւ հետո նոր ասում կամ անում տվյալ հիմարությունը: Բայց Ալեն Սիմոնյանին որտեղի՞ց յոթերորդ զգայարան: Նա մյուս բոլոր ՔՊ-շնիկների նման նախ որեւէ հիմարություն ասում է եւ հետո միայն մտածում «կռուտիտի»՝ տակից դուրս գալու մասին: Այս մի ասածի տակից, սակայն, Ալեն Սիմոնյանին դուրս գալ չի հաջողվելու: Նախ՝ Ալեն Սիմոնյանն ԱԺ նախագահ է, իսկ Սամվել Շահրամանյանը՝ Արցախի նախագահ, անկախ այն բանից՝ Արցախը ճանաչել ես Ադրբեջանի կազմում, թե՝ Չինաստանի:

Պաշտոնների անհամապատասխանության հարց կա այստեղ: Շահրամանյանի մասին կարող էր խոսել Նիկոլ Փաշինյանը, բայց ո՛չ ՀՀ վարչապետից ցածր որեւէ պաշտոնյա: Սա՝ մեկ: Երկրորդ․ Նիկոլ Փաշինյանը շատ լավ գիտի, թե ինչու Ալիեւը չպահանջեց, որ Արցախի գործող նախագահ Սամվել Շահրամանյանը եւս հանձնվի Ադրբեջանի իշխանություններին: Դա մեծ գլխացավանք էր լինելու թե՛ Ալիեւի եւ թե՛ Նիկոլ Փաշինյանի համար: Եվ նրանք որոշեցին, որ Սամվել Շահրամանյանը կտեղափոխվի Հայաստան, որտեղ նրա «հարցերը կլուծեն» ՀՀ իշխանությունները (իմա՝ Նիկոլը, Ալենը, Մելքոնյան Գագոն, Վահագն Ալեքսանյանը, Արփին, Լուլուն եւ այլք): Երրորդ․ ո՞վ էր լինելու ՀՀ իշխանություններից այն քաջը, որին կվստահվեր Սամվել Շահրամանյանին (իմա՝ Արցախի Հանրապետությանը, Արցախի ժողովրդի իրավունքներին, Արցախի դրոշին ու զինանշանին) վերջին հարվածը հասցնելու «պատիվը»: Եվ այստեղ է, որ Ալեն Սիմոնյանը նախաձեռնողականություն է հանդես բերել: Ես չեմ կարծում, որ Սեւանի կառավարական դաչայում կամ ՔՊ-ի որեւէ ժողովում նրան այդպիսի հանձնարարություն տային: Նիկոլը նման մեղք չէր վերցնի իր վրա: Ճիշտ եմ ասում, չէ՞, Ալեն, ոչ ոք քո լեզվից չէր քաշում չէ՞, որ վեր կենայիր ու նման բան հայտարարեիր՝ «ինձ համար «Լեռնային Ղարաբաղի նախագահ» եզրույթ գոյություն չունի»: Սա ի՞նչ է, եթե ոչ երես առած տղայի անպատասխանատու հայտարարություն, որ անում է ՀՀ ԱԺ նախագահը, սա ի՞նչ է, եթե ոչ խուլիգանություն՝ ՀՀ ԱԺ նախագահի կատարմամբ, եւ սա ինչպե՞ս պետք է պատժվի, եթե ոչ տվյալ պետական պաշտոնյային կալանավայր տեղափոխելով:

ՀԳ. Ալեն Սիմոնյանը Նիկոլի պատճառով հին «քաշվածներից» է: Նա ստիպված է եղել հանուն Նիկոլի հայհոյել Ռուսաստանին, իր ռուս գործընկերներին, որոնց հետ միշտ հրաշալի հարաբերություններ ուներ: Որ թողնեիր՝ Մատվիենկոյի հետ թեւանցուկ ման կգային: Բայց Ռուսաստանի հանդեպ Նիկոլի կուրսի փոփոխությունից հետո Ալեն Սիմոնյանն էլ կուրսը փոխեց ու համալրեց «Պուտին բռնողների» շարքերը: Ովքե՞ր կային այնտեղ՝ Մելքոնյան Գագո, Աղազարյան Հովիկ, Քոչարյան Անդո, Գրիգորյան Արմեն, Խզմալյան Տիգրան, Շիրինյան Լեւոն, Ճպըլ Ստյոպ եւ այլն: Այսօր բոլոր Պուտին բռնողները լռել են: Մեջտեղում մնացել է Ալեն Սիմոնյանը՝ ՌԴ Պետդումայի հետ իր փչացած հարաբերություններով: Եվ ես չեմ զարմանա, որ վաղը նրան ՌԴ-ում անցանկալի անձ ճանաչեն, ու հենց հատի Ռուսաստանի սահմանը, բռնեն: Կհետաքրքրվի՞ Նիկոլն Ալեն Սիմոնյանի ճակատագրով: Չեմ կարծում: Նիկոլն ամենաշատը կարող է հայտարարել, որ Ալեն Սիմոնյանը ՌԴ իշխանություններին է հանձնվել նախկինների կողմից: