Սամվել Բաբայանի հաղորդումից են վրդովվել՝ թող վրդովվեն, դա իրենց իրավունքն է․ Պետրոս Ղազարյան

Սամվել Բաբայանի՝ Հանրային հեռուստաընկերությանը տված հարցազրույցը հարուցել է ընդդիմադիր հայացքներ ունեցող գործիչների, անկախ քաղաքացիների եւ անգամ լրատվամիջոցների ղեկավարների ու Հայաստանի Ժուռնալիստների միության զայրույթը: Բաբայանն իր հարցազրույցի ժամանակ խոսել է Արցախի բոլոր իշխանությունների թերացումների մասին, անապացույց մեղադրանքներ եւ ատելության խոսք է տարածել արցախցիների նկատմամբ: Փորձել է ձախողված պատերազմի եւ Արցախի հայաթափման ողջ մեղքը բարդել Արցախի նախկին և ներկա իշխանությունների վրա, «սրբադասելով» Նիկոլ Փաշինյանին: 

Այս կապակցությամբ Հայաստանի Ժուռնալիստների միությունը հայտարարություն է տարածել, իր մտահոգությունը հայտնելով մեր հարկերի հաշվին գործունեություն ծավալող հեռուստաալիքի դեմ, պնդելով, որ «խիստ անհանգստացնող է հասարակության մեջ Հանրային հեռուստաընկերության եթերից ատելության տարածումն ու սերմանումն Արցախի ներկայիս իշխանությունների, ինչպես նաև ՀՀ նախկին բոլոր իշխանությունների հասցեին»։ «ՀՀ գործող իշխանությունները, որոնք հասարակությանը 5 տարի շարունակ սևերի ու սպիտակների, ներկաների ու նախկինների բաժանելով՝ միմյանց դեմ ատելություն ու թշնամություն էին տարածում՝ գռեհիկ բառապաշար և ապատեղեկատվություն տարածելով, այսօր նույնը շարունակում են նաև Արցախի ժողովրդի ու Արցախի իշխանությունների, Հայաստանի նախկին իշխանությունների, հանրային, քաղաքական գործիչների նկատմամբ»,- ասված է հայտարարության մեջ, որին միացել են մեծ թվով ԶԼՄ-ներ: 

Մենք Հ1-ի լրատվական ծրագրի ղեկավար, հեռուստալրագրող Պետրոս Ղազարյանից մեկնաբանություն խնդրեցինք ՀԺՄ-ի տարածած հայտարարության վերաբերյալ եւ մասնավորապես հետաքրքրվեցինք՝ որեւէ հետեւություն անելո՞ւ են այս հայտարարությունից: 

Պետրոս Ղազարյանը, պարզվեց՝ հարկ չի համարում Սաթիկ Սեյրանյանի տարածած հաղորդագրություններն ընթերցել, առավել ևս մեկնաբանել. «Ծանոթ չեմ այդ հայտարարությանը, չեմ պատրաստվում Սաթիկ Սեյրանյանին մեկնաբանել»,- ասաց նա: Թերեւս նա միայն իշխանական հայտարարություններն է ընթերցում եւ որպես ուղեցույց առաջնորդվում դրանցով։ Մենք նկատեցինք, որ այդ հայտարարության տակ ստորագրել են նաև մի շարք լրատվամիջոցների ղեկավարներ՝ միայն Սաթիկ Սեյրանյանի կարծիքը չէ, որ Հ1-ը չի ծառայում իր առաքելությանը եւ թշնամանք է տարածում արցախցիների հասցեին, Ղազարյանն ասաց. «Օրինակ ի՞նչ լրատվամիջոցներ»:

Մենք ներկայացրինք լրատվամիջոցների ցանկը, նա սկսեց պիտակավորել ԶԼՄ-ներին. «Հա՞, Իրատես թե՞րթ,  նրանց էլ չեմ պատրաստվում մեկնաբանել, շնորհավորում եմ իրենց: Իրենք իրենցով հավաքվել են, թող իրենք իրենցով էլ մեկնաբանեն: Նրանք այնքան սուտ են ասում, որ հիմա ի՞նչ մեկնաբանեմ, չեմ կարդացել այդ հայտարարությունը, բայց որ կարդայի էլ՝ չէի մեկնաբանի: Սամվել Բաբայանի հաղորդումից են վրդովվել, թող վրդովվեն, դա իրենց իրավունքն է»,- եզրափակեց Պետրոս Ղազարյանը: