Ուղերձ, որ կարող է իրավիճակ փոխել

Ուղերձ, որ կարող է իրավիճակ փոխել

Տարածաշրջանում հայկական գործոնի վերաբերյալ ֆեյսբուքյան չափազանց ուշագրավ գրառում է արել Արցախի նախագահի թեկնածու, նախկին վարչապետ Արայիկ Հարությունյանը. «Հզոր Հայաստան կառուցելու համար ունենք ամեն ինչ՝ խելացի հասարակություն, բիզնեսի համար բարենպաստ միջավայր ու հրաշալի երկիր, որտեղ խաչվում են Հին ու Նոր աշխարհի քաղաքակրթությունները, որտեղ Արեւմուտքն ու Արեւելքը իրար ձեռք սեղմելու համար նախեւառաջ պետք է ասեն. ԲԱՐԵՒ ՀԱՅԱՍՏԱՆ»:

Արցախում նախագահական ընտրություններից արդեն բավական կարճ ժամանակ առաջ միջազգային հանրությանը հղած այս ուղերձը հնչում է տարածաշրջանի երկրների տնտեսական հեռանկարների վերլուծությունից հետո: Եւ այստեղ կարեւորը ոչ այնքան մասնագիտական, որքան քաղաքական տերմինաբանությունն է, ինչը վկայում է, որ Արայիկ Հարությունյանի տեսլականը կարող է ընդհանուր իրավիճակ փոխել: Ընդ որում՝ թե ներարցախյան եւ առհասարակ հայկական, թե տարածաշրջանով հետաքրքրված ու այստեղ շահեր ունեցող երկրների պատկերացումներում: Արցախի նախագահի թեկնածուն, ով տասը տարի գործադիր իշխանության ղեկավար է եղել, ներկայումս, որքանով կարելի է դատել նրա արտաքին շփումներից, նպատակադրված է իրացնել տնտեսական բավական լուրջ նախագծեր: Երկրի մրցունակությունը, նրա անվտանգությունը, քաղաքացիների բարեկեցությունը պայմանավորված են տնտեսությամբ: Եւ, ինչպես վկայում է համաշխարհային փորձը, հաջողության հասնում են նրանք, ովքեր կարողանում են ճիշտ գնահատել սեփական հնարավորությունները եւ ճշգրիտ կանխատեսել զարգացումները: Արցախի նախկին վարչապետի տնտեսագիտական դիտարկումներն արված են հարեւան երկրների՝ Վրաստանի եւ Ադրբեջանի, հնարավորությունների մասնագիտական գնահատման հիման վրա: Ընդսմին, նա հայ իրականությանը լավատեսությամբ ներշնչվելու ուղերձ է հղում:  Սա կարեւոր հանգամանք է, եթե նկատի ունենանք, որ ապագայի արցախյան պատկերացումները մինչ այդ հիմնականում խարսխվում էին պաթետիկայի վրա: Հանրությանը հղվում է գիտականորեն հիմնավորված ազդակ՝ տեսանելի ապագայի կտրվածքով:

Դրվում է նպատակ՝ մոտակա տարիներին հասնելու տնտեսական տպավորիչ ցուցանիշների, որոնք էականորեն կփոխեն հայկական իրականությունը: Նախընտրված է  հայկական տնտեսական նորացման գործոնի միջազգայնացումը՝ որպես տարածաշրջանում անվտանգության, կայունության եւ քաղաքակրթական համերաշխության ու համագործակցության երաշխիք: Որքան էլ չհրապարակայնացվի, ակնհայտ է, որ Արցախի նախագահի ընտրություններով հետաքրքրված են ոչ միայն ԵԱՀԿ Մինսկի համանախագահ, այլեւ տարածաշրջանային դերակատար երկրները: Այդ թվում եւ՝ Ադրբեջանը: Արցախի նախագահի թեկնածուն բոլորին հղում է հայկական գործոնը որպես ռազմա-քաղաքականորեն կայացած եւ տնտեսապես ամբողջացող իրողություն ընդունելու եւ այդ հիմքով փոխշահավետ համագործակցություն կառուցելու հստակ ուղերձ: Դա, ամենայն հավանականությամբ, կգնահատվի ըստ էության: Եւ տարածաշրջանում իրավիճակ կփոխվի: Կամ, ավելի ճիշտ, արդեն իսկ փոխված իրավիճակին Արցախի լիարժեք մասնակցության հեռանկար կբացվի: