Ցինիկաբար գնում են Վազգեն Սարգսյանի շիրիմին ծաղիկներ դնում, չթողնեիք արձանը պղծեին. Սաղաթելյան
Այս մարդիկ հիմա տարբեր քարոզիչների շուրթերով փորձում են մեզ համոզել, որ Արցախը մերը չէր, Շուշին ադրբեջանական քաղաք էր և այսպես շարունակ։ Այս մասին քիչ առաջ ՊՆ շենքի դիմաց ընթացող ակցիայի ժամանակ լրագրողների հետ զրույցում ասաց քաղաքական-հասարակական գործիչ, ՀՀԿ նախկին պատգամավոր Արման Սաղաթելյանը
Հիշեցնենք, որ ՀՀ պաշտպանության նախարարության մոտ մի շարք նախկին զինծառայողներ ակցիա են անում՝ ի աջակցություն հայոց բանակի և ԳՇ պետ Օնիկ Գասպարյանի։
«Մի անձ էլ պնդում էր, որ իրենց իրականացրած հեղաշրջումն առավել արժեքավոր էր ազգի համար, քան արցախյան ազատամարտում մեր տարած հաղթանակը»,- ասաց Սաղաթելյանը՝ նկատի ունենալով ԵԿՄ ղեկավար Սասուն Միքայելյանին։
«Այս տեսակ իշխանամերձ քարոզիչները վերջին շրջանում չափազանց ակտիվացել են։ Նրանք փորձում են մեզ ինչ-որ ձևով հրամցնել, որ մենք ոչ թե խայտառակ տապալել ենք միջազգային դիվանագիտությունը, տապալել ենք բանակցային գործընթացը, այլ պարտվել ենք ռազմի դաշտում։ԳՇ-ի և բարձրաստիճան սպայակազմի հայտարարությունը վկայում է այն մասին, որ իրենք պատրաստ են հասկանալու՝ ինչ է տեղի ունեցել, բայց նրանք պատրաստ չեն քավության նոխազ դառնալու, որովհետև ինչ-որ մեկն այդպես է որոշել առավոտյան»,- պնդեց Սաղաթելյանը։
«Հիմա էլ այդ մարդիկ ցինիկաբար հավաքվում են և գնում Վազգեն Սարգսյանի շիրմին ծաղիկներ դնելու։ Եթե այդ մարդուն այդքան հարգում ու պաշտում էին, պետք է չթողնեին գոնե, որ իր արձանը պղծեին»,- հավելեց նա։
Կարծիքներ