«Հրապարակ». Տպավորություն է, որ քաղաքական ուժերը դուրս են մղված այս պրոցեսից

Մեր զրուցակիցը «Ժողովրդավարական հայրենիք» կուսակցության նախագահ Պետրոս Մակեյանն է:

- Բագրատ սրբազանի գլխավորությամբ` «Տավուշը հանուն հայրենիքի» շարժումն ամսի 9-ին կհասնի Երեւան: Երթը գնալով մարդաշատ է դառնում, ավելի ու ավելի շատ մարդիկ են իրենց աջակցությունը հայտնում, եւ շարժումը հույս է արթնացրել մարդկանց մոտ: Դուք ի՞նչ կարծիքի եք այս պրոցեսների մասին:

- Բավականին բարդ իրավիճակում ենք հայտնվել` ցուգցվանգի մեջ: Մի բան պարզ է՝ այս իշխանությունը փորձանք ու չարիք է մեր ժողովրդի, մեր պետության համար։ Դա հստակ է: Ամեն մի նոր օր այս իշխանությունը մի նոր չարիք է բերում, բայց պետք է մի բան էլ հաշվի առնել` արտաքին զարգացումները, մեր «դաշնակիցների» վերաբերմունքը, եւ պետք է մեր բոլոր քայլերը հաշվարկենք: Խիստ կասկածում եմ, որ այս իշխանությունները բոլոր քայլերը հաշվարկում են: Այն, ինչ այսօր կատարվում է, խոսքը տավուշյան շարժման մասին է, դրական եմ գնահատում, բայց պետք է հստակ գործել, քաղաքական որոշումները պետք է լինեն ռելսի վրա: Հակառակ դեպքում հախուռն շարժումները կարող են շատ ավելի վտանգավոր լինել: Այս իշխանություններն աղետ են մեր եւ մեր պետականության համար, սակայն հախուռն զարգացումները նույնպես վտանգավոր են: Ես կարծում եմ` դրա համար խորքային վերլուծություն էր անհրաժեշտ:

- Ի՞նչ ասել է «հախուռն», եւ ի՞նչ կարող է տեղի ունենալ:

- Բագրատ սրբազանին տրվել է առաջնորդի ֆունկցիան, բայց այնտեղ տարբեր սերնդի ներկայացուցիչների, տարբեր ուժերի ենք տեսնում: Տպավորություն է, որ քաղաքական ուժերը դուրս են մղված այս պրոցեսից: Նման դեպքերում շարժումը կառավարելն ու վերահսկելը շատ դժվար է: Այս իշխանություններն ամեն ինչի ընդունակ են: Նրանք կարող են հոշոտել` Երեւանի շեմին:

- Այն, որ այս իշխանություններն ամեն ինչի ընդունակ են, դա բոլորս գիտենք, բայց արդյունքում ի՞նչ է ստացվում, մարդիկ վախի մթնոլորտում ոչինչ չանե՞ն ու սպասեն թրքացմա՞նը: Ի դեպ, 2018-ին, երբ աջակցում էիք Փաշինյանին, նույնպես տարբեր վտանգներ կային, բայց դրանք գերիշխող չէին:

- 2018 թվականին տեղի ունեցած գործընթացների մենեջերը Սերժ Սարգսյանն էր, ով վերահսկվում էր Ռուսաստանի կողմից, ու Նիկոլն ինչքան էլ այսօր հակառուսական ելույթներ ունենա, նա Հայաստանում Ռուսաստանի ներկայացուցիչն է: Այս շարժմանը կա՞ հովանավոր: Եթե էլի Ռուսաստանն է, ուրեմն այն մեզ համար չարիք է: Մի անգամ 2018-ին հովանավորեց, կորցրինք Արցախը, հիմա էլ Հայաստանն ենք կորցնում.... Սա է ողջ խնդիրը:

- Բայց Ձեր ասածներն ընդամենը կարող ենք դիտարկել որպես վարկած, ոչ թե ճշմարտություն:

- Այն, որ այս ըմբոստացումը պետք է ողջունել, դա փաստ է, սակայն տեղի ունեցածին պետք է քաղաքական միս ու արյուն տալ, հակառակ դեպքում այս անգլուխ, անհայրենիքները պատրաստ են ամեն ինչի:

- Ինչպե՞ս եք պատկերացնում քաղաքական միս ու արյուն տալը, որ շարժումը հաջողություն ունենա: Հիմա մի շարք քաղաքական ուժեր միացել են, գուցե նրանցից մեկը որոշի, որ Ձեր նշած միսն ու արյունն ի՞նքն է:

- Դե, հնարավոր է, բայց Նիկոլն ունի այդ ամենի բանալին: Նա հենց իշխանության դեմ վտանգ է տեսնում, անմիջապես դեմ է տալիս նախկիններին, գտել է բանաձեւը: Պետք է այժմ հակառակ բանաձեւը գտնել Նիկոլի ներկայացրած ձեւաչափին: Ես նախկին իշխանությունների դեմ տասնամյակներ շարունակ պայքարել եմ, բայց նախկինները սրանց մոտ գլուխները քարին են խփել, սրանց համեմատ սուրբ են: Սրանք բոլորից վատն են, բայց պետք է դրան քաղաքական լուծում տրվի:

- Դուք էլ էիք, չէ՞, աջակցում այն ժամանակ Փաշինյանին:

- Ոչ թե աջակցում էի, այլ պարզապես.... նա բացահայտեց իր պատվիրատուներին ու բառացիորեն մարդկանց գցեց, խաբեց: Ասաց` ուժային շարժման մոդելի կողմնակից է, սակայն ձեռքերը վեր բարձրացրած՝ խաբեց մարդկանց:

- Բա ինչպե՞ս էիք Ռուսաստանի կողմից կազմակերպված հեղափոխությանը մասնակցում:

- Դա հետո երեւաց: Գասպարյան Վովայի համար ոչ մի խնդիր չկար՝ նոր սկսվող քայլերթը չեզոքացնելու, բայց իշխանությունը զուսպ գտնվեց: Դրանից հետո պարզ դարձավ, որ Սորոսին մեղադրող Ռուսաստանն ինքն է հովանավորում այս իշխանություններին: Հետո այս անհայրենիք ջահելները եկան իշխանության:

- Այսօր կիրանցիներն արդար պահանջ ունեն, չեն ցանկանում իրենց տարածքներն Ադրբեջանին նվիրել: Ինչպե՞ս կանխել այդ դեպքում իշխանություններին:

- Այս իշխանություններին պետք է հեռացնել, բայց այն առանց քաղաքական սոուսի չի կարող լինել: Քաղաքական ուժերը պետք է այս ամենի մոդուլը գտնեն:

- Ասպարեզում կա՞ նման քաղաքական ուժ:

- Այո, կա: Կան նաեւ անհատ քաղաքացիներ, հո այս ազգն իր ընդունակությունները չի՞ կորցրել:

- Իսկ եթե երկիրը փրկելուն միտված ժամանակավոր կառավարություն ձեւավորվի՞:

- Անցումային քաղաքական կառավարություն, այո, կարելի է ձեւավորել:

- Դուք չե՞ք միանալու շարժմանը:

- Այս պահին առողջական խնդիրներ ունեմ, բայց ցանկացած շարժում, որ այս իշխանություններին հեռացնելու խնդիր է դնում, ընդունելի է ինձ համար: