Դատավորներ Լիլիթ Սարգսյանն ու Անդրանիկ Մնացականյանն ընտրվել են Արդարադատության ակադեմիայի կառավարման խորհրդի անդամ

Այսօր Մարզահամերգային համալիրի դահլիճում տեղի էր ունենում Դատավորների ընդհանուր ժողովը: Դրա շրջանակներում, ի թիվս այլ հարցերի, որոշվել է նաև արդարադատության ակադեմիայի կառավարման խորհրդի դատավոր անդամների ընտրության հարցը: Հիշեցնենք, որ երկու թափուր հաստիքները պետք է լրացվեին մի քրեական և մի քաղաքացիական մասնագիտացման դատավոր անդամներով:

Մենք գրել էինք, որ քաղաքացիական մասնագիտացման դատավորներից որպես թեկնածու առաջադրվել էին Երևանի ընդհանուր իրավասության դատարանի դատավոր Լիլիթ Սարգսյանն ու նույն դատարանի դատավոր Երեմ Եսոյանը: Իսկ քրեական մասնագիտացման դատավոր անդամի թեկնածու էր Վերաքննիչ քրեական դատարանի դատավոր Անդրանիկ Մնացականյանը: Մենք տեղեկացանք, որ քիչ առաջ տեղի ունեցած քվեարկության արդյունքներով Արդարադատության ակադեմիայի կառավարման խորհրդի դատավոր անդամ են ընտրվել Լիլիթ Սարգսյանն ու Անդրանիկ Մնացականյանը: Լիլիթ Սարգսյանը ձայների մոտ կրկնակի առավելությամբ (132 ձայն) հաղթել է Երեմ Եսոյանին, որի օգտին ընդամենը 59 դատավոր է քվեարկել: Իսկ Անդրանիկ Մնացականյանի օգտին քվեարկել է 176 դատավոր: Նշենք, որ դատավորների վարկանիշային աղյուսակում նշված երեք դատավորներից ամենաբարձր վարկանիշ ունի Լիլիթ Սարգսյանը` նրա վարկանիշը գնահատվում է 68, իսկ Եսոյանն ու Մնացականյանն ունեն նկատելիորեն ցածր վարկանիշ` համապատասխանաբար 17 և 16:

Քիչ անց պետք է տեղի ունենա նաև Դատավորների միության նախագահի ընտրությունը, որտեղ առաջադրվել է դատավոր Ալեքսանդր Ազարյանը, որի դեմ գործող իշխանությունները տևական ժամանակ է, ինչ ակնհայտ քաղաքական արշավ են իրականացնում և փորձում են ճնշել նրան: Մեզ ասացին, որ քվորում կա, այսինքն` քվեարկությունը կկայանա, և, ամենայն հավանականությամբ, դատավորները կքվեարկեն Ազարյանի օգտին, քանի որ նա բարձր վարկանիշ ունի դատական համակարգում, նաև փաստաբանական համայնքի կողմից է ընդունված: