Վանեցյանն ակնարկում է, որ չի ցանկանում պաշտոնը փոխել
ԱԱԾ տնօրեն Արթուր Վանեցյանն այսօր Ծաղկաձորում լրագրողների հետ հանդիպմանն անդրադարձավ իր՝ փոխվարչապետ նշանակվելու մասին լուրերին, ասաց, որ ինքն այդ հարցին ուզում է երկար պատասխանել, որ շահարկումների տեղիք չտա։
«Որ ասեմ՝ հերքում եմ, մի բան կասեն, որ ասեմ՝ չեմ հերքում, այլ բան կասեն։ Երբ լրացավ իմ քսան տարեկանը, ես անցա աշխատանքի ԱԱԾ-ում և այդ տարիքից ի վեր՝ աշխատում եմ ԱԱԾ մարմիններում։ Այսօր իմ համար, անկեղծ ասեմ, մեծ պատասխանտվութուն է և մեծ հպարտություն՝ ղեկավարելու այն կառույցը, որտեղ սկսել եմ աշխատել շուրջ քսան տարի առաջ։ Այս կարճ ժամանակահատվածում, երբ ղեկավարում եմ ԱԱԾ-ն, եղել են բազմաթիվ փոփոխություններ, բազմաթիվ բարեփոխումներ, երբ հասարակության վերաբերմունքը փոխվել է դեպի ԱԱԾ-ն։ Դա այն ամենն է, որ ես կարողացել եմ իմ գործընկերների հետ անել այս յոթ ամիսների ընթացքում, բայց դա շատ փոքր մասն է, որ արել եմ և ես հուսով եմ, որ դեռ երկար տարիներ կշարունակեմ ծառայել ԱԱԾ-ում, ղեկավարել այս կառույցը։ Ինձ հետ որևէ մեկը չի խոսել իմ աշխատանքի փոփոխության հետ կապված, որևէ առաջարկ Նիկոլ Փաշինյանից ես չեմ ստացել, և ես շարունակում եմ իմ ծառայությունը՝ որպես ԱԱԾ տնօրեն»,- հեռվից գալով՝ ըստ էության հերքեց իր՝ փոխվարչապետ նշանակվելու մասին լուրերը պարոն Վանեցյանը կամ ակնարկեց, որ չի ցանկանում պաշտոնը փոխել։
Ինչ վերաբերում է սկանդալային բացահայտումներին, Վանեցյանն ասաց, որ բացահայտումները լինելու են շարունակական։ «Բայց ինտենսիվությունը, որ կար մեր գործունեության սկզբում, իհարկե, նվազելու է, և նվազելու է օբյեկտիվ ու սուբյեկտիվ պատճառներով։ Նրա խոսքով՝ իրենք շատ ավելի կարևոր գործեր են անում, որոնք չեն հրապարակվում, օրինակ՝ հետախուզության, հակահետախուզության ոլորտում»,- ասաց նա։
Կարծիքներ