Հանրաքվեն նպաստելու է սոցիալական արդարության ամբողջական կայացմանը

Շիրակի մարզպետ Տիգրան Պետրոսյանն ասում է, որ մարդիկ սպասում են փոփոխությունների ու «այո» են ասելու հանրաքվեին։

- Պարոն Պետրոսյան, Ձեր ղեկավարած մարզում հանրաքվեի նկատմամբ ի՞նչ տրամադրություններ կան, Դուք մասնակցո՞ւմ եք քարոզարշավին։

- Մեզ մոտ աշխատանքային ձեւաչափն ընտրվել է, տարբեր դերակատարներ՝ Շիրակից ընտրված 3 մեծամասնականով պատգամավորները եւ ես, վերցրել ենք աշխատանքային տարբեր գոտիներ, քննարկում ենք ունեցել եւ որոշել ենք աշխատել համակարգված, յուրաքանչյուրս համակարգում ենք մեկ տարածք, որպեսզի աշխատանքներն ավելի էմոցիոնալ, ինֆորմատիվ լինեն։ Ես վերցրել եմ պատասխանատվություն 31 ընտրատարածքում աշխատանքների կազմակերպման իրականացման համար եւ պատրաստվում եմ այդ աշխատանքներն իրականացնել իմ ֆորմալ աշխատանքային ժամերից հետո։ Այն պահին, երբ որ կզգամ՝ աշխատանքային պիկ սեզոն կլինի, արձակուրդ կվերցնեմ կարճաժամկետ։

- Բայց օրենքն արգելում է հանրային ծառայողին, այդ թվում՝ Ձեզ, քարոզչություն իրականացնելիս ի պաշտոնե հանդես գալ։

- Դրա համար եմ նշում, որ աշխատանքներից հետո եմ զբաղվելու քարոզչությամբ։

- Ինչի` աշխատանքից հետո  դադարո՞ւմ եք մարզպետ լինել։

- Միգուցե հանրային ընկալումներում ես որպես մարզպետ եմ ընկալվելու, բայց վստահեցնում եմ՝ չեմ չարաշահելու իմ դիրքը, վարչական ռեսուրսի օգտագործում չի լինելու, եւ բացի այդ, ես նախկինում էլ քաղաքական ակտիվ պահվածք եմ ունեցել։

- Ձեր կարծիքով, ինչո՞ւ մարդիկ պետք է գնան ու «այո» ասեն մի հարցի, որն ուղիղ իմաստով չի առնչվում իրենց կյանքին։

- Մարդիկ ուզում են փոփոխություններ, եւ այդ փոփոխությունների մի մասը՝ կապված երկրում օրինականության, տարբեր կառույցների գործունեության հետ, իրենց մեջ նաեւ ուղղակի առնչություն ունեն, այն մասով, իհարկե, որով կապ ունեն Սահմանադրության ու ՍԴ-ի հետ, այդքանով նաեւ կապ ունեն բուն այս պրոցեսի հետ։

- Ձեր կարծիքով, Հրայր Թովմասյանի եւ եւս 6 դատավորի պաշտոնական լիազորությունների դադարեցումը փոփոխություննե՞ր է բերելու մարդկանց կյանքում։

- Հերթական ինստիտուտներից մեկը ստանալու է այն հանրային ընկալման լեգիտիմությունը, որ պետք է գործընթացն առաջ տանելու համար։ Մենք այդ ինստիտուտի նկատմամբ որոշակի հանրային պաշար ենք նաեւ վերադարձնելու։ Մեր խնդիրն է՝ նաեւ մարդկանց ներկայացնելու, որ սա մեր պետության կայացման գործընթացում առանցքային խնդիր է։

- Հատկապես Շիրակում, որն այսօր էլ համարվում է սոցիալապես ամենախոցելի մարզը (աղետի գոտին դեռ չի վերացել), մարդկանց հե՞շտ է լինելու համոզել, որ հազարավոր դոլարներ կարող են հատկացնել մի քանի դատավորի տուն ուղարկելու համար, իսկ աղետի գոտու համար փող չկա։

- Կարծում եմ՝ հարցը կոռեկտ չի, չի կարելի մեկը մյուսի հետ համեմատել։ Հատկապես Շիրակի մարզում մեծ է փոփոխությունների կարիքը, այս տեսանկյունից համակարգային փոփոխությունների կարիք, այո, մեր մարզում շատ է զգացվում։ Եվ այն գործընթացները, որոնք նպաստելու են մեր երկրում սոցիալական արդարության ամբողջական կայացմանը, մեզ համար կարեւոր են։

- ՍԴ-ն ինչպե՞ս է ազդելու, Ձեր խոսքով՝ սոցիալական արդարության ամբողջական կայացման վրա։

- Ես շատ հստակ ձեւակերպեցի, որ եթե խոսում ենք սոցիալական արդարության վերականգնման մասին, ՍԴ-ն արդարադատության համակարգում իր ուրույն դերն ունի, եւ մենք խոսում ենք այդ ուրույն դերի մասին հենց գլոբալ կոնտեքստում։

- Հիմա եթե շիրակցիների զգալի մասը կանգնում-ասում է, որ չի առնչվել ՍԴ-ին, իրենց սոցիալական բարեկեցությունն այդ կառույցից չէ կախված, ի՞նչ եք անելու, ո՞նց եք համոզելու, որ իրենց լավ ապրելը ՍԴ-ից է կախված, միգուցե այլ փաստարկներ էլ եք օգտագործելու քարոզչության ընթացքում, օրինակ՝ նախկինների մասին։

- Մարդկանց համոզելու խնդիր չկա, մենք պետք է ներկայացնենք՝ ինչ պրոցեսներ կան, եւ որքան է կարեւոր դա։ Եվ Ձեր կարծիքով, եթե մեր մարզում շատերը չեն բախվել ՍԴ-ին, հետեւաբար, այս փոփոխության ընկալումը ցածրացե՞լ է․ հարցը կոռեկտ չէ, բերեք անցնենք հաջորդ հարցին։

- Չասացիք՝ ի՞նչ լոզունգներով եք մարդկանց համոզելու, բացառապես իրավակա՞ն, թե՞ նաեւ նախկինների հետ շաղկապելով։

- Բովանդակային առումով քարոզարշավի լոզունգները մշակվում են, երբ պատրաստ լինեն, մենք ամբողջական մոտեցումով կմոտենանք քարոզարշավին։

- Անձամբ Ձեզ ընդունելի՞ է գործընթացը դիտարկել նախկինների դեմ պայքարի կոնտեքստում։

- Անձամբ ինձ համար գործընթացը դիտարկվում է շարունակական փոփոխություններ ապահովելու տիրույթում։ Ես կարծում եմ, որ այս քայլը մեր երկրում շարունակական փոփոխություններ բերելու հերթական քայլերից մեկն է։

- Մասնակցել եք դրամահավաքին՝ որքա՞ն գումար եք նվիրաբերել։ Նաեւ՝ համաձա՞յն եք դիտարկումների հետ, որ այդ դրամահավաքից քաղաքական կոռուպցիայի հոտ է գալիս, օրինակ՝ երբ ընդդիմադիր «Ելք» էիք, 5-6 միլիոն էին նվիրաբերում, երբ իշխանական ՔՊ՝ 205 միլիոն, այսինքն՝ գալիս մուծվում են։

- Այո, մասնակցել եմ, բայց գումար չեմ նվիրաբերել։ Ինչու, որովհետեւ քննարկել ենք, քանի որ մենք շարունակաբար մասնակցելու ենք այստեղ այդ պրոցեսներին, այդ պատճառով այնտեղ ֆինանսական մասնակցություն չեմ ունեցել։ Ինչ վերաբերում է մյուս հատվածին՝ ես կարող եմ ինձ առնչվող տեսանկյունից դիտարկել, որ որեւէ գործարար, ով ցանկություն է հայտնել դրամահավաքին մասնակցել իմ միջավայրից, որեւէ ճնշման չի ենթարկվել, այդ ընտրությունը կայացրել է իր կամքով։

- Այսինքն՝ Ձեր կողմից գործարա՞ր է հրավիրված եղել։

- Այո, մեկ հոգի, որի անունը չեմ կարող հնչեցնել։

- Իսկ ինչո՞ւ այդ գործարարները, երբ ընդդիմադիր էիք, հանգանակություն չէին անում։

- Թող անեին, ի՞նչ ասեմ, դա էլ իրենց մոտեցումն է, կարող եք իրենցից հարցնեք։