«Եռանախագահները պետք է որոշեն, թե ինչ է նշանակում Թուրքիայի կողմից իրենց հասցված ապտակը». Հրանտ Խաչատրյանը՝ հրադադարի խախտման մասին 

Այսօր ժամը 12-ից հետո արդեն երկու անգամ ՀՀ Պաշտպանության նախարարությունը հայտնել է կրակի դադարեցման ռեժիմի խախտումների մասին՝  «Կարախամբեյլի» տեղամասի և Հադրութի ուղղությամբ: Ստեփանակերտում  խաղաղ է: 

Ինչպե՞ս կգնահատեք հաստատված հրադադարը: «Ավելի ստույգ՝ հրադադարի բացակայությունը», - հարցս ուղղում է ՍԻՄ նախկին ղեկավար, ԱԺ նախկին պատգամավոր Հրանտ Խաչատրյանը: Ադրբեջանի կողմից կրակի դադարեցման ռեժիմի խախտումների մասին տեղեկանալուց հետո նա ֆեյսբուքում գրել է թուրքական դիվանագիտություն տերմինի մասին. «Այս երկու բառում դարեր շարունակ ամփոփվել է միջպետական հարաբերություններում գոյություն ունեցող ամենադավադիր, ամենանենգ և ստոր գործելակերպը»: 

- Այսինքն՝ այս գիշերվա պայմանավորվածությունը ուղղակի խոստում էր, որը ոչ մի պատասխանատվություն չի՞ ենթադրում: 

-Թուրքերը միշտ էլ նենգ են եղել, միշտ էլ ստոր են եղել, միշտ էլ դավադիր են եղել, և ես չեմ կարծում, որ մեր հրամանատարությունը հավատացել է նրանց խոստմանը: 

- Ահա, երկու երկրների ԱԳ նախարարները՝ Ռուսաստանի ԱԳ նախարար Լավրովն էլ ներկա էր որպես գարանտ, պայմանավորվեցին, բայց հրադադարը խախտվեց: Ի՞նչ պետք է արվի, ի՞նչ է լինելու հիմա: Փաստ է, որ հրադադարի խախտման բազմաթիվ փաստեր ունենք: 

- Նախ՝ նշեմ, որ ՌԴ արտգործնախարարը միայն Ռուսաստանի անունից չէր վարում բանակցությունները: Դրա հետևում կանգնած է առնվազն ԵԱՀԿ Մինսկի խումբը եռանախագահներով, ընդ որում Թուրքիան էլ էր Մինսկի խմբի անդամ, բայց եռանախագահների մեջ չի մտնում: Հիմա, կարծում եմ, հրադադարի խախտմամբ պատասխանատվությունը փոխանցվում և ընկնում է համանախագահների ու առաջին հերթին՝ ՌԴ արտգործնախարարի վրա: ՌԴ արտգործնախարարը իր գործընկերների՝ եռանախագահողների հետ խորհրդակցեն և որոշեն, թե ինչ է նշանակում Թուրքիայի կողմից իրենց հասցված ապտակը: 

- Դուք միայն  թուրքեր բառն եք օգտագործում, և ոչ մի անգամ չասացիք Ադրբեջան: 

-Սա լրիվ նոր իրավիճակ է: Արդեն Ադրբեջան չկա: Մենք գործ ունենք թուրքական դիվանագիտության հետ, որը և ՆԱՏՈ-ում են անտեսել շարունակաբար, և Ռուսաստանում, և հիմա առերեսվում ենք այս փաստի հետ: Այս նենգ ագրեսիաները կանգնեցնելը միայն հայերիս պարտականությունը չի, ես վաղուց իմ բոլոր արտասահմանյան հանդիպումներում դա շեշտել եմ, ու տա Աստված, որ հիմա աշխարհը մեր ձայնը լսի ու իր պարտավորությունները կատարի իր իսկ ընդունած որոշումների նկատմամբ: 

- Կգա՞ն ընդհանուր հայտարարի, թե՞ ոչ, թե՞ ընդամենը մի երեք օր հարաբերական անդորր կլինի, ու դա էլ դեռ հարցականի տակ է այս պահին:  

- Ես կանխատեսումներ չեմ անի, մի անգամ էլ շեշտեմ՝ հաղթական խաղաղության անհրաժեշտությունը ոչ միայն հայերիս, այլ ամբողջ աշխարհի համար: Հայ կանայք, հայ մայրերը ատամները սեղմված սպասում են, որ աշխարհը խառնվի: Հայ զինվորը պատասխանատու չէ այդ դավադիր պահվածքի համար: 

- Ինչպիսի՞ն պետք է լինի Հայաստանի գործելակերպը այս իրավիճակում, երբ հրադադարը խախտվում է: 

-Հայաստանի գործելակերպը անցած օրերի ընթացքում արդեն հստակեցվել է: Կարգախոսները նույնն են՝ «Արցախը Հայաստան է», «Ամեն ինչ՝ զինվորի համար, ամեն ինչ՝ ռազմաճակատի համար», այն, ինչ վերջին օրերի պատերազմական դրության մեջ մեր ժողովուրդը ամփոփեց որպես պայքարի հիմնական ուղղություններ: Ես մի անգամ Վաշինգտոնում  մեծ հավաքի ժամանակ եմ ասել, երբ որ ԱՄՆ-ում Ադրբեջանի դեսպանատան քաղաքական քարտուղարը եկել էր հատուկ, որ մեզ անվանի ագրեսոր: Ես ասեցի՝ պատմությունն է ապացուցել, որ երբ որ աշխարհը խաղաղ է, Հայաստանը աշխարհի ամենագեղեցիկ ծաղկանոցներից մեկն է, երբ որ աշխարհը սկսում է փլվել, Հայաստանը հայտնվում է առաջին փլատակների տակ: Այս բանաձևը պետք է բոլորը հասկանան:     

-Դուք ընդունո՞ւմ եք այս հրադադարը որպես բանակցությունների վերադառնալու հնարավորություն:          

- Հրադադարը զինադադար չի, այն ոչ մի հաջողություն գոնե ժամանակավորապես, չի երաշխավորում: Հրադադարը նոր մոբիլիզացիայի համար մի փոքր ժամանակ է տալիս: