Սարոյան եղբայրներ
«Սարոյան եղբայրներ» ֆիլմի առաջին կադրում կարդում ենք. «1920 թիվ: Հայաստան: Դաշնակցական իշխանություն: Կործանման եզրին կանգնած երկիր: Փրկություն որոնող, ազատություն երազող մի ժողովուրդ: Ճակատագրական այդ օրերին՝ գավառական մի քաղաք և այդ քաղաքում մի ընտանիք, երկու եղբայր…»
Թեպետ 53 տարի առաջ, երբ «Հայֆիլմը» թողարկեց այդ կինոնկարը (ըստ Գուրգեն Բորյանի «Նույն հարկի տակ» պիեսի), ես կոմերիտական էի ու դաստիարակված կոմունիստական ոգով, այդուհանդերձ, ներքուստ ինձ ավելի հոգեհարազատ էր մինչ օրս հայ ժողովրդի սիրված դերասան Խորեն Աբրահամյանի կերտած Գևորգի կերպարը: Հայ կինոարվեստի գիգանտ Ֆրունզե Դովլաթյանի կերտած կերպարն առանձնապես համակրանք չէր առաջացրել. ողղակի համոզիչ չէին Հայկի դատողությունները բոլշևիկների մասին: Ավելին, ֆիլմը, ընդհանուր առմամբ, այնքան էլ չտպավորեց ինձ հեռավոր 70-ականներին: Բայց մեր ժամանակներում, մեր երկրում տեղի ունեցող իրադարձությունների ֆոնին, այդ գեղարվեստական գործի բարձր արժեքն այլևս ինձ մոտ կասկած չի հարուցում. ցավալիորեն՝ ազգովի վերապրում ենք Սարոյան եղբայրների ողբերգությունը:
Խորհենք հանճարեղ ստեղծագործության հետևյալ դրվագների շուրջ:
Գևորգի և ժողովրդի երկխոսությունը
Գևորգ (հավաքված մարդկանց, ժողովրդին)- «Գիտեմ, թե ինչ եք ուզում: Ուզում եք, որ ձեր զավակները ձեր կողքին լինեն: Հա՞, ձեր փեշի տակ: Ճիշտ եք մտածում, թող տանը նստեն, թող ճան խաղան, թող մածուն ուտեն: Ազգ, հայրենիք թող քանդվի, թող ջնջվի, վերանա: Ի՞նչ ազգ, դուք չե՞ք ազգը: Այ, ես ձեր: Գիտեմ, գիտեմ, թե ինչ եք ուզում: Ի՞նչ եք ոչխարների պես նայում: Դե, ձեն հանեք: Հը, ինչու՞ եք լռում»:
Ժողովուրդ - «Ազգի անունից եք խոսում ու տանում մի մատ էրեխեքին կոտորում»:
Գևորգ - «Դու՞ք պետք է բոլշևիկի առաջը կտրեք»:
Ժողովուրդ - «Մենք մեր վարուցանքին ենք, տղա ջան: Մենք առաջ կտրող չենք: Առաջ կտրողն էլ դուք, թիկունքից խփողն էլ»:
Եղբայրների երկխոսությունը
Գևորգ – «էդ որտեղի՞ց են բոլշևիկները բերելու հաց, եղբայրություն, ազատություն»:
Հայկ – Խաղաղություն լինի,Գևորգ, ամեն ինչ լավ կլինի:
Գևորգ - «Ռուսաստանը Գերմանիայից խաղաղություն էր խնդրում, տվեցի՞ն գերմանացիները խաղաղություն»:
Հայկ – «Պարտադրեցին Գևորգ, պարտադրեցին»:
Գևորգ – «Այ, տեսնու՞մ ես, ասում ես պարտադրեցին: Իսկ մենք կարո՞ղ ենք թուրքերին պարտադրել մեր խաղաղությունը»:
Հայկ – «Այ, կողքներս են, ռուսների օգնությամբ»:
Գևորգ - «Օգնությամբ, էլի օգնությամբ: Ընկած աշխարհի հզորներից հզորություն ենք աղերսում, արդեն քանի տարի, վիզ ծռելով: Չէ, Հայկ, մենք փոքր ժողովուրդ ենք, մենք ապրելու իրավունք չունենք»:
Գևորգ – «Մենք ոչ բարով էս ժողովրդի մտավորականն ու զինվորն ենք: Հետո ի՞նչ է լինելու»:
Հայկ – «Չես տեսնում ինչ գործ որ բռնում ենք, թարս է դուրս գալիս: Չե՞ս տեսնում, որ էդքան պատահականություններ չեն կարող լինել: … Վիլսոնը մեզ ծովից-ծով Հայաստան տվո՞ղ էր: Նա մեզ է խաբում, մենք գալիս ենք էս ժողովրդին ենք խաբում: Ամերիկացի զինվորը կգա էստեղ քեզ համար կռիվ կանի՞»:
Թվում է, թե ֆիլմի գաղափարը խտացված ձևով Գևորգի հետևյալ արտահայտություններում է. «Կմեռնեմ, բայց գաղթական չեմ դառնա» և փախուստի պատրաստվող Սուրմելյանի դեմքին շպրտված՝ «Ասում եմ՝ սոված մանուկներ: Դավաճաններ»:
Կլինի՞, արդյոք, այս ֆիլմի շարունակությունը, որի առաջին կադրի գրության սկզբը հայտնի է. «2020 թիվ: Հայաստան: Հեղափոխական իշխանություն: Կոռուպցիայի դեմ պայքար: Կորոնավիրուսի համավարակ: Պատերազմ…»
Ի՞նչ կմտածեն մեր ապագա սերունդները 2120 թվականին քսամեկերորդ դարասկզբի իրադարձությունների մասին: Կմտածե՞ն, արդյոք:
Հ.Գ. Սարոյան եղբայրների ողբերգական ոդիսականը չպետք է շարունակվի ոչ այժմ, ոչ էլ 100 տարի անց: Դրա համար պետք է ականջալուր լինել Գևորգի կնոջ՝ Անահիտի խոսքին. «Ի՞նչ եք ուզում իրարից, ինչու՞ եք իրար կոկորդ կրծում»:
Հ.Գ. Քանի դեռ մեր հաջողությունները և դժբախտությունները կապում ենք դրսի ուժերի հետ, այդ ոդիսականը շարունակվելու է, իսկ մեր գաղթական դառնալն արդեն մեզնից կախված չի լինի:
Հ.Գ.Սա գրել էի 2020 թվականին, պատերազմի օրերին: Մնացել էր անտիպ: 8 ամիս անց ավելացնելու բան չունեմ:
Գագիկ ՎԱՐԴԱՆՅԱՆ
Տնտեսագիտության դոկտոր պրոֆեսոր
Կարծիքներ