Ի՞նչ հանցագործություն էին կանխում ոստիկանները կառավարության շենքի մոտ
Կառավարության շենքի շուրջբոլորը հավաքված բազմահազար ոստիկաններից այսօր լրագրողները հետաքրքրվեցին, թե ում անվտանգությունն են ապահովում, որ մեզ թույլ չեն տալիս մոտենալ կառավարության 3-րդ մասնաշենքին: Արդյոք քիչ առաջ շենք մտած Նիկոլ Փաշինյանի՞ անվտանգությունն են ապահովում, ինչին ի պատասխան` ոստիկաններից մեկն ասաց. «Մեզնից լավ գիտեք` ում»: Հետո ասացին` անվտանգության նկատառումներից ելնելով` միջոցառում են իրականացնում, դրա համար էլ արգելվում է մեր ազատ տեղաշարժն այս տարածքում:
Այդ ընթացքում նկատեցինք, որ ոստիկաններից մեկը տեսանկարահանում էր իրենց հետ զրուցող լրագրողներին: Երբ խնդրեցինք պարզաբանել, թե ինչ հիմքով և ինչ նպատակով են տեսանկարահանում, որևէ հոդաբաշխ բացատրություն չներկայացրին` ասելով, թե դիտարկման համար է:
Ոստիկանության լրատվական բաժնից մեր այս հարցին այսպիսի պատասխան ուղարկեցին` հղում անելով հոդված 22-ին` ոստիկանության իրավունքները հասարակական կարգը պահպանելիս «Հանցագործությունները կանխելիս կամ բացահայտելիս, հասարակական կարգի պահպանությունն ապահովելիս ոստիկանության ծառայողները կարող են օգտագործել շարժական տեսաձայնագրող կամ լուսանկարահանող տեխնիկական միջոցներ ոստիկանության տվյալ լիազորությունների իրականացմամբ սահմանափակվող ժամկետում: Տեսաձայնագրող կամ լուսանկարահանող տեխնիկական միջոցն ամրացվում է ոստիկանության ծառայողի համազգեստին կամ գտնվում է ոստիկանության ծառայողի ձեռքում, կամ ոստիկանության ծառայողական տրանսպորտային միջոցում: Ոստիկանության ծառայողները պետք է տեսաձայնագրող և լուսանկարահանող տեխնիկական միջոցները կրեն տեսանելի ձևով, բացառությամբ գաղտնի օպերատիվ-հետախուզական միջոցառումների իրականացման դեպքերի»:
Մնում է հասկանալ, թե ինչ հանցագործություն էին կանխում ոստիկանները լրագրողներին տեսանկարահանելով:
Կարծիքներ