Պատգամավորն իրավունք ունի՞ վիրավորել ԲԴԽ նախագահին

«Վերջին երկու տարվա ընթացքում, ես վստահաբար կարող եմ պնդել, ձեր իշխանության օրոք դատական համակարգն իրապես անկախացել է»: Այս խրոխտ հայտարարությունը, որը երկիմաստ է, և կարելի է դրանում և՛ հեգնանք գտնել, և՛ իրապես ճշմարտություն, երկու օր առաջ ԱԺ ամբիոնից արեց ԲԴԽ նախագահ Ռուբեն Վարդազարյանը, ում դեմ հրահանգավորված հարձակում և էժանագին արշավ էին նախաձեռնել իմքայլական պատգամավորները՝ կապված Վարդազարյանի՝ դատավորներին ուղղված կոչի հետ, թե «պետք է վերջապես տալ ամոթալի չարաբաստիկ հարցի պատասխանը. մենք պատերի տակ վնգստացող դատավորնե՞ր ենք, թե՞ հայրենիքին նվիրված ազնիվ պրոֆեսիոնալներ»։ Իմքայլականները միաբերան նույն հարցն էին ուղղում Վարդազարյանին, թե ինչու է նման հայտարարություն արել, ԲԴԽ նախագահը բոլորին կոռեկտ ոճով նույն պատասխանն էր տալիս, բայց տեղ-տեղ՝ մանուկ, տեղ-տեղ՝ բեղավոր, տեղ-տեղ էլ՝ նախկիններից մնացած ներկա իշխանականները կարծես թե չէին կարողանում ընկալել նրա ասածը ու շարունակ նույնն էին կրկնում։ Բաբաջանյան Արման անունով մի «կիսակախյալ» երևույթ էլ անցավ կոռեկտության բոլոր սահմաններն ու Վարդազարյանին անվանեց «վնգստացող դատավոր», «արհավիրք», «պատուհաս» և այլն։

Երբ ավարտվել էր Վարդազարյանին «ոչնչացնելու» իշխանական արարը, հարց ուղղեցինք ԱԺ պետաիրավական հարցերի հանձնաժողովի նախագահ, իմքայլական Վլադիմիր Վարդանյանին, թե ի՞նքն էլ է համամիտ ԲԴԽ նախագահի այն մտքի հետ, որ այս իշխանության օրոք դատական համակարգն իրապես անկախացել է։

«Ես համարում եմ, այո, որ Հայաստանի Հանրապետությունում դատական համակարգն էապես առողջացած է և էապես անկախ է 2018 թվականից ի վեր»,-ասաց Վարդանյանը։

-Այդ դեպքում ինչո՞վ է պայմանավորված Ձեր թիմակիցների արշավը դատական համակարգի նկատմամբ։

-Գիտե՞ք, էստեղ ոչ թե դատական համակարգի նկատմամբ արշավ է, այլ պարզապես որոշակի պարզաբանումներ ու հայտարարություններ, որ Ռուբեն Վարդազարյանն էր արել 2020 թ․ նոյեմբերին, և որը առաջացրել էր շատերի շատ հակասական մոտեցումները։ Եվ այդ մոտեցումների հետ կապված՝ անկեղծ Ձեզ ասեմ, ես էլ եմ համապատասխան որակում տվել էդ հայտարարությանը, որովհետև իմ համար չափազանց կարևոր է ունենալ անկախ դատական համակարգ, անկախ դատական իշխանություն, և ապաքաղաքականացված դատական համակարգի հրամայականն է իմ համար ուղենիշը այս հարցում։

-Այսինքն՝ Ռուբեն Վարդազարյանի՞ նկատմամբ էր արշավը։

-Տեսեք, ասում եք՝ Ռուբեն Վարդազարյանի նկատմամբ արշավ էր։ Ռուբեն Վարդազարյանը առավոտվանից, մենք նախորդ օրվանից էինք քնարկումներն սկսել, ըստ էության՝ բազում տեսակի հարցեր ենք քննարկել աշխատանքային կարգով մեր աշխատասենյակներում, շփվել է Պետաիրավական հարցերի հանձնաժողովի անդամների հետ, Ռուբեն Վարդազարյանն էլ, իմ կարծիքով, այն դատավորներից է, որ երբեք չի վախենում հարցերից, այդ թվում՝ բարդ հարցերից։ Հիմա, գիտե՞ք, էնպես չի, որ Դուք ինձ ավելի հեշտ հարցեր եք տալիս հիմա, քան այն հարցերը, որ տալիս էին Ռուբեն Վարդազարյանին։

-Օրինակ, մի «բարդ» հարց տամ Ձեզ, պարոն Վարդանյան․ ես կարո՞ղ եմ Բաբաջանյան Արման անունով անկախ համարվող պատգամավորին համարել արհավիրք, քանի որ նա էլ Ռուբեն Վարդազարյանին է համարում «արհավիրք» և ասում է, որ նա «վնգստացող դատավոր է»։ Ես կարո՞ղ եմ ասել, որ Բաբաջանյան Արմանն էլ վնգստացող անկախ պատգամավոր է՝ ձեր  իշխանությանն առընթեր։

-Դուք իրավունք ունեք Ձեր կարծիքի ազատ արտահայտման շրջանակներում արտահայտել ցանկացած միտք, եթե այն չի զրպարտում կամ չի վիրավորում, իսկ վիրավորանքը և զրպարտությունն այն կատեգորիաներն են, որ անձն ինքը պետք է որոշի՝ վիրավորվո՞ւմ է այդ արտահայտությունից, թե՞ ոչ։

-Հիմա Բաբաջանյան Արման անունով անձը վիրավորե՞լ է Վարդազարյանին՝ նրան «վնգստացող» անվանելով, թե՞ չի վիրավորել։

-Ես արդարադատություն իրականացնող սուբյեկտ չեմ։ Արտահայտությունն ուղղված է եղել պարոն Վարդազարյանին, նա ինձանից, Ձեզանից շատ լավ գիտի` դատական պաշտպանության ինչ միջոցների կարելի է դիմել, եթե անհրաժեշտություն կա՝ դիմելու այդ միջոցներին, նա ազատ է դիմելու։

-Իսկ նորմա՞լ է, որ երկու օր շարունակ Ձեր խմբակցության պատգամավորները նույն հարցն էին ուղղում ԲԴԽ նախագահին։ Չբավարարեցի՞ն նրանց Վարդազարյանի պատասխանները, դժվա՞ր են բավարարվում ձեր պատգամավորները։

-Սա Ազգային ժողով է, և, ի վերջո, մենք քննարկում ենք այստեղ դատական համակարգի հետ կապված հարցերը։ Իսկ դատական համակարգի հետ կապված հարցերը քանի որ շատ են եղել, և պարոն Վարդազարյանը, ի պաշտոնե որպես Բարձրագույն դատական խորհրդի նախագահ, մի կառույցի նախագահ, որը պարտավոր է երաշխավորել դատարանների անկախությունը, պատասխանում էր հարցերին։ Եթե հարցերը կրկնվում են, գիտե՞ք, պատգամավորներ կարող են լինել, որ անընդհատ կրկնում են նույն հարցերը։

-Գուցե ընկալմա՞ն խնդիր կա որոշ պատգամավորների մոտ, որ անընդհատ կրկնում են նույն հարցերը։

-Գիտե՞ք, այդուհանդերձ, մենք չկարողացանք ստանալ մի շարք հարցերի պատասխաններ, և եթե անձը չի կարողացել ստանալ իր հարցի պատասխանը, նա իրավունք ունի այլ եղանակով էլ ձևակերպել։

-Դուք կցանկանայի՞ք, որ Ռուբեն Վարդազարյանի փոխարեն հիմա այլ մարդ լիներ ԲԴԽ նախագահի պաշտոնում, օրինակ՝ Գագիկ Ջհանգիրյանը;

-Ես շատ բան կարամ ցանկանամ, բայց ես ցանկանում եմ, որ այս երկրում գործեն Սահմանադրությունը և օրենքները, իսկ Սահմանադրությունն ասում է, որ Բարձրագույն դատական խորհրդի նախագահ հաջորդաբար ընտրվում են ԲԴԽ դատավոր-գիտնական անդամներից, և ԲԴԽ անդամների կամարտահայտության արդյունքն է։ Այսքանը։

-Ձեր ներսում Վարդազարյանի պաշտոնանկությանը հասնելու պրոցես չկա՞։

-Ամենամեծ խնդիրը և ամենամեծ նպատակը, որ ես դրել եմ իմ առջև, որպեսզի դատական համակարգն այն աստիճան անկախ լինի, որը զերծ լինի ցանկացած տեսակի ազդեցությունից, կլինի դա գործադիրից, օրենսդիրից կամ արտաքին գործընթացներից։

-Ռուբեն Վարդազարյանն ասում է, որ ջինը շշից դուրս է եկել, Դուք չե՞ք կարծում, որ ջինը շշից դուրս եկավ այն ժամանակ, երբ Նիկոլ Փաշինյանը մտավ դատական համակարգի տիրույթ ու սկսեց գնահատականներ տալ, ասաց՝ վնգստացող դատավորներ կան, որոշեց դատարանների դռներն արգելափակել։

-Եթե էդպես վերցնենք, ջինը շշից դուրս է եկել շատ ավելի վաղ, երբ, ըստ էության, գործադիր իշխանությունը և օրենսդիրը բավարար ուշադրություն չդարձրեցին դատարանների անկախության այդ կարևոր էլեմենտին։

-Նկատի ունեմ, չե՞ք կարծում, որ նաև ձեր թիմակիցների ու հատկապես վարչապետի թույլ տվածն է, որ այսօր նման բառամթերքով են արտահայտվում դատական իշխանության հասցեին։

-Խորհրդարանում կարա հնչի ցանկացած կարծիք, և այդ կարծիքը պետք է լինի այն սահմաններում, որը չի վիրավորի դիմացինին։

-Այդ սահմանը չի՞ անցել Բաբաջանյան Արմանը։

-Խնդրեմ, դիմեք էթիկայի հանձնաժողով։

-Ինչո՞ւ եք ամեն գնով արդարացնում կամ պաշտպանում Բաբաջանյան Արմանին, նա կարծես թե անկախ պատգամավոր է։

-Ես չեմ պաշտպանում, ես համարում եմ հետևյալը, որ խորհրդարանում կարա հնչի ցանկացած կարծիք։

-Եթե լիներ մեկ այլ անկախ պատգամավոր, օրինակ՝ Ձեր ֆրակցիայից անկախացած մեկը, որոնք հիմա ձեզ դեմ են, դուք չէի՞ք քննադատի նրանց վարքը։

-Հիմա տեսեք, Դուք ինձանից փորձում եք կորզել պատասխաններ Արման Բաբաջանյանի և Ռուբեն Վարդազարյանի․․․

-Ես արդարություն եմ ուզում Ձեզանից կորզել, արդարամիտ մոտեցում և գնահատական եմ ուզում կորզել։

-Արդարամիտ մոտեցումը հետևյալն է, ես գտնում եմ, որ կոռեկտությունը խորհրդարանում կարևոր գրավական է խորհրդարանական կառավարումն ապահովելու համար։ Եվ միաժամանակ նաև պետք է վերահաստատեմ, որ խորհրդարանում պատգամավորները պետք է հնարավորություն ունենան ազատ լինել իրենց հարցադրումների մեջ, կոռեկտության շրջանակներում, բայց ազատ լինեն իրենց հարցադրումների մեջ։