Կարեն Պետրոսյանը՝ նախարարի հետ մտերմության եւ մորեղբորը ռեկտոր նշանակելու մասին
Շուրջ մեկ տարի է՝ Շիրակի պետական համալսարանի ռեկտորի պաշտոնը Սահակ Մինասյանի հրաժարականից հետո թափուր է: Ռեկտորի պաշտոնի համար երկու անգամ մրցույթ անցկացվեց, սակայն ՇՊՀ հոգաբարձուների խորհուրդը երկու դեպքում էլ ռեկտոր չընտրեց: Իսկ ահա ԿԳ նախարար Արայիկ Հարությունյանի՝ ՇՊՀ-ի հնարավոր լուծարման կամ միավորման մասին վերջին հայտարարությունը տարատեսակ խոսակցությունների պատճառ է դարձել:
Ըստ պտտվող լուրերի՝ քաղակտիվիստ, «Նոր Հայաստան,նոր հայրապետ» շարժման առաջնորդ, ՀՊՏՀ-ի Գյումրու մասնաճյուղի ռեկտորի պաշտոնակատար Կարեն Պետրոսյանը նախարարի մտերիմն է, եւ հենց նրա մորեղբայրը՝ ՇՊՀ ռեկտորի ժամանակավոր պաշտոնակատար Երվանդ Սերոբյանն էլ պետք է դառնա բուհի ռեկտոր: Մեկ այլ խոսակցության համաձայն՝ ՇՊՀ-ի միավորման արդյունքում խոշորացված բուհի ռեկտոր կնշանակվի նույն ինքը՝ նախարարի մտերիմ Կարեն Պետրոսյանը: Գյումրու Երկխոսության մեդիա կենտրոնում հրավիրված ասուլիսի ընթացքում Կարեն Պետրոսյանը, լրագրողների հետ զրույցում անդրադառնալով խոսակցություններին, նշում է. «Խոսում են էն, ինչ մարդկանց հետաքրքիր է կամ մարդիկ ուզում են: Ես որեւէ անգամ իմ համար որեւէ ապագայի պաշտոնակռիվ չեմ արել, չեմ էլ պատրաստվում անել: Ինձ մեղադրել ռեկտորի պաշտոնակատարի զարմիկը լինելու համար, ծիծաղելի է: Ինձ համար մեծագույն պատիվ է Սերոբյան Երվանդի եգյանը կամ քրոջ որդին լինելու հանգամանքը, բայց չեմ կարծում, թե ինձ քաղաքում ճանաչում են որպես Սերոբյան Երվանդի զարմիկ, ինձ քաղաքում ճանաչում են որպես Պետրոսյան Կարեն, ով փորձել է տարիներ շարունակ իր լուման ունենալ իր երազանքի պետությունը, երկիրը կառուցելու գործում»:
Այնուհետև Կարեն Պետրոսյանն հիշեցնում է այն ժամանակները,երբ Երվանդ Սերոբյանը բուհի պրոռեկտոր նշանակվեց, ինքը նույն բուհում ամբիոնի վարիչ էր,սակայն իր մոտեցումների համար իրեն այնտեղից հեռացրեցին:Ինչ վերաբերում է նախարարի հետ մտերմությանը եւ նախնական պայմանավորվածություններին՝ ընդգծում է. «Ի ուրախություն մեզ՝ ՇՊՀ-ն ունի շատ գործունակ հոգաբարձուների խորհուրդ:Երբ որ դուք ասում եք պայմանավորվածություն, սա նսեմացնում է գործունակ հոգաբարձուների խորհուրդին:Նշանակում է,որ ուսանողները ենթարկվում են ոչ թե իրենց սկզբունքներին, այլ՝ ինձ, պետության ներկայացուցիչները ենթարկվում են ինձ:
Հեղինակություններ են հոգաբարձուների խորհրդի կազմում՝ Լևոն Բարսեղյանը,գործող պատգամավորներ,որոնց վրա ես պետք է ազդեի՞: Դուք կարծում եք, որ ես նախարարի հետ պետք է պայմանավորվածություն ունենայի՞, եւ նա այդ պրոցեսների վրա ազդե՞ր:Եթե այդպես եք մտածում,չարաչար սխալվում եք: Եթե հանրությունն ուզում է ինձ տեսնել էդ դերում, էդ ուրիշ խնդիր է,բայց եթե մարդիկ գեներացնում են պրոցեսը` ցույց տալով, որ ես շահագրգռված եմ այդ պրոցեսում, դա ընդամենը մարդկանց մոլորությունն է»:
Կարծիքներ