Նիկոլից ավելի Նիկոլ

Երբեմն թվում է, թե Հայաստանում Նիկոլ Փաշինյանից ավելի ապաշնորհ, ավելի թերուս, ավելի կարճամիտ, ավելի պարզունակ, զբաղեցրած պաշտոնից գլուխ չհանող ու աթոռից կառչած մեկը չկա, բայց պարզվում է՝ կա: Խոսքը Հայաստանի Ֆուտբոլի ֆեդերացիայի նախագահ Արմեն Մելիքբեկյանի մասին է: Այս մարդը տարիներ շարունակ Արևմուտքից գրանտներ է ստացել ու իր ղեկավարած լրատվական կայքում արևմտյան արժեքներ է քարոզել:

Երբ դեռ տարիներ առաջ իշխանության թեթև ձեռքով նա դարձավ Ֆեդերացիայի նախագահ, անվերջ մի միտք էր ինձ տանջում՝ ի՞նչ կապ ունի այս գրանտներ ստացող պարոնը ֆուտբոլի հետ: Ի՞նչ է հասկանում ֆուտբոլից: Մտավախություն ունեի, որ առանց այն էլ դժվարությամբ շնչող հայկական ֆուտբոլի վերջին շունչը կփչի, նրա թեթև ձեռքով: Ցավոք, մտավախություններս դառնում են իրականություն:

Մելիքբեկյանի` ՀՖՖ նախագահ ընտրվելուց հետո հայկական ֆուտբոլը բացառապես պարտություններ է արձանագրում, իսկ ֆուտբոլասերներն ու ֆուտբոլի երկրպագուները երազում են, որ գոնե լինի հաշիվը ոչ ոքի, դա համարելով փոքրիկ նվաճում: Այսօր Վրաստանում կրկին Հայաստանը խայտառակ պարտություն կրեց:

Չորս օր առաջ տեղի ունեցած 3-0 խաղի պարտությանը, Հայաստանն այսօր լուրջ «հավելում» արեց` արձանագրելով հերթական 6-1 պարտությունը: Տևական ժամանակ է ֆուտբոլի երկրպագուները վանկարկում են՝ «Մելիքբեկյան հեռացի՛ր»:

Մելիքբեկյանը չի հեռանում, ճիշտ իր շեֆի՝ Նիկոլի նման: Տեսնես ինչպե՞ս է Նիկոլ Փաշինյանն իրեն այսքան նման, երբեմն անգամ իրեն գերազանցող կադրեր գտնում….