ԲԴԽ նախագահը՝ դատավո՞ր, թե՞ դիվանագետ

ԲԴԽ նախագահը՝ դատավո՞ր, թե՞ դիվանագետ

Բարձրագույն դատական խորհրդի նախագահ Ռուբեն Վարդազարյանը, որը դատավոր է աշխատել Քոչարյանի, հետո նաեւ Սերժի թվերին, այսօր էլ Նիկոլի ԲԴԽ նախագահն է, վստահ է, որ դատարաններն այսօր ավելի ազատ ու անկախ են, քան երբեւէ։ Թեպետ նա չի հիշում մի դեպք, որ նախկինում իրեն «վերեւներից» զանգած եւ ուղղորդած, ճնշած կամ կաշառած լինեն, բայց, միեւնույն է, «էսօր լավ է, քանց վուր էրեկ»։

Պարոն Վարդազարյանը նաեւ համառորեն չի ցանկանում մեկնաբանել վարչապետ Նիկոլ Փաշինյանի հնչեցրած հայտարարությունները՝ ուղղված դատական իշխանության դեմ, համարելով դրանք քաղաքական բնույթի, իսկ դատարանները շրջափակելու փաստն էլ նրա համար դատարանների դիմաց հանրահավաք է։ Թե որքանով է ինքը՝ Վարդազարյանը, այսօր իրեն հոգեպես ազատ ու անկաշկանդ զգում՝ որպես ԲԴԽ նախագահ, առաջարկում ենք դատել՝ կարդալով նրա հետ մեր զրույցը։

- Պարոն Վարդազարյան, Դուք Գյումրիում՝ Անկախության տոնին, ասել էիք, թե դատական համակարգը երբեք այսքան ազատ, անկախ չի եղել։ Կարո՞ղ եք մի քանի արգումենտ բերել, թե ինչի հիման վրա եք դա ասել։

- Իմ խոսքը պետք չի էդպես հասկանալ՝ երբեք ազատ, անկախ․․․ Դուք փորձում եք բառի բուն իմաստով իմ ասածն ընկալել։ Ես նկատի ունեմ, որ այսօր դատական իշխանությունն իրականում անկախ է, քանի որ որեւէ ճնշում իշխանության կողմից այս պահին ես չեմ տեսնում եւ չեմ նկատում։ Կատարվում են որոշ փորձեր՝ դատական իշխանության վրա ազդեցություն ունենալու, ճնշելու, դա, ո՞նց ճիշտ բացատրեմ, միտինգային, ամբոխային արդարադատություն է, երբ դատարանի առջեւ կանգնում են հակառակորդ կողմերը եւ փորձում են դատարանի վրա այդկերպ ճնշում գործադրել։

- Օրինակ՝ Քոչարյանի դատավարության ժամանակ Քոչարյանի աջակիցնե՞րն են ճնշել, թե՞ նրա դեմ կողմը, որն ուզում է, որ Քոչարյանը «նստի»։

- Ճնշողը փաստն է, որ նման պահանջներ են ներկայացնում։ Ճնշողը փաստն է, որ հավաքվում են եւ դատարանից պահանջում են։ Ես վստահ եմ, որ չկա Հայաստանում որեւէ դատավոր, որը կարող է այդ պահանջներով ղեկավարվի եւ իր որոշումը հիմնավորի բարձր վանկարկումներով։

- Հիմա, Քոչարյանի մասով վերջին որոշումը, որ Աննա Դանիբեկյանը կայացրեց, եւ Քոչարյանը կալանքից չազատվեց, այս դեպքում կարո՞ղ ենք ասել, որ նա տեղի տվեց մի կողմի ճնշումներին։

- Միանշանակ՝ ոչ։ Դատարանը գործել է բացառապես օրենքով եւ իրավունքի գերակայության սկզբունքի սահմաններում։ Որեւէ կողմի ազդեցությունը չի եղել, վստահ եմ։

- Իսկ վարչապետ Նիկոլ Փաշինյանի հայտարարությունները՝ ուղղված դատական իշխանության դեմ, ճնշումնե՞ր են, թե՞ հակառակը՝ խրախուսանքներ։

- Դրանք քաղաքական հայտարարություններ են, ես չեմ ուզում մեկնաբանել դրանք։

- Բայց գործադիր իշխանության ղեկավարը հայտարարություն է անում՝ ուղղված դատական իշխանությանը․․․

- Ես հարցին պատասխանեցի՝ համարում եմ, որ քաղաքական հայտարարություն է, եւ չեմ մեկնաբանում։

- Դատարանների դռները շրջափակելը ե՞ւս քաղաքական հայտարարություն է։

- Դուք նույն հարցը փորձում եք տարբեր եղանակներով տալ։

- Չէ, երբ դատարանների դռները շրջափակում են, դա կոնկրետ դրսեւորում է։ Հիմա դա ճնշո՞ւմ է դատական իշխանության դեմ, թե՞ ճնշում չէ։

- Ես պատասխանեցի՝ քաղաքական հայտարարությունները չեմ մեկնաբանում։

- Ես հայտարարությունը նկատի չունեմ, նկատի ունեմ գործողությունը՝ իքս թվով մարդիկ շրջափակել էին դատարանների դռները եւ թույլ չէին տալիս, որ ձեր դատավորները մտնեն դատարան։ Սա դատական իշխանության նկատմամբ ինչպիսի՞ դրսեւորում է։

-  Հենց նոր պատասխանեցի այդ հարցին՝ դատարանի առջեւ հանրահավաք կազմակերպելը համարում եմ անթույլատրելի։

- Խնդիրը հանրահավաքը չէ, այլ դատարանների, նաեւ ԲԴԽ շենքն արգելափակելը, որ ոչ ոք ներս չմտնի։

- Ես բովանդակային ասացի՝ դատարանի առջեւ ցանկացած հավաք համարում եմ անթույլատրելի։

- Այսինքն՝ դատարաններն արգելափակելու ակցիան հանրահավա՞ք էր, եւ դա քրեաիրավական հետեւանք ենթադրո՞ւմ էր, թե՞ ոչ։

- ԲԴԽ նախագահը չի կարող պատասխանել այդ հարցին, թե դա քրեաիրավական հետեւանք առաջացնո՞ւմ է, թե՞ չէ։ Դրա համար կան հետաքննության եւ նախաքննության մարմիններ։

- Ինչպե՞ս են Ձեր հարաբերությունները Նիկոլ Փաշինյանի հետ։

- Որեւէ հարաբերություն չունեմ։

- Տպավորություն եւ խոսակցություն կա, որ Դուք այս պահին տեղավորվում եք Նիկոլ Փաշինյանի պատկերացումների մեջ՝ որպես ԲԴԽ նախագահ, ի տարբերություն, օրինակ, ՍԴ նախագահ Հրայր Թովմասյանի, որին ուզում են հեռացնել։

- Դա ո՞ւմ տպավորությունն է։

- Հանրության որոշ շրջանակների, նաեւ՝ իմ, օրինակ։

- Ձեզ մոտ տպավորություն է, որ տեղավորվո՞ւմ եմ։ Ուրեմն, մեկընդմիշտ պատասխանեմ այդ հարցին․ դատական իշխանությունն ամբողջությամբ, այդ թվում՝ ես, բացարձակ ապաքաղաքականացված է, 100 տոկոսով երաշխավորում եմ։ Եվ որեւէ քաղաքական ուժի հետ հարաբերություններ ունենալ՝ դատական իշխանությունը ո՛չ դրա ցանկությունն ունի, ո՛չ հնարավորությունն ունի, եւ դա օրենքով արգելված է։

- Այդ դեպքում ի՞նչն է Ձեզ խանգարում անկաշկանդ գնահատել թե՛ վարչապետի հայտարարությունները, թե՛ գործողությունները՝ ուղղված դատական իշխանության դեմ։

- Դուք իմ պատասխաններում կաշկանդվածությո՞ւն զգացիք։

- Այո, Ձեր բազմաթիվ կոլեգաներ քննադատում են վարչապետի քայլերն ու հայտարարությունները, որ չպետք է երկրի ղեկավարը կոչ անի, օրինակ՝ գնացեք եւ արգելափակեք դատարանների դռները, մինչդեռ Դուք խուսափում եք որեւէ գնահատական հնչեցնելուց։

- Ես ասում եմ ու չեմ խուսափում։ Ես ասում եմ, որ քաղաքական հայտարարությունները չեմ մեկնաբանում։ Դա խուսափե՞լ է։

- Ի դեպ, Նիկոլ Փաշինյանը հաճախ է ասում, որ նախկինում դատավորներն ուղղորդվել են Բաղրամյան 26-ից, ճնշումների են ենթարկվել։ Դուք տեղյա՞կ եք, եղե՞լ են նման դեպքեր։

- Ոչ, չեն եղել նման դեպքեր։

- Դուք դատավոր եք եղել, Ձեզ երբեւէ Բաղրամյան 26-ից փորձե՞լ են ուղղորդել, ճնշել։

- Երբեւէ, ոչ։

- Այդ դեպքում ի՞նչն է Ձեզ թույլ տալիս ասել, որ այսօր դատարաններն ավելի ազատ եւ անկախ են, քան նախկինում, եթե նախկինում էլ նման բան չի եղել։

- Ես բազմիցս զրուցել եմ իմ կոլեգաների, դատավորների հետ, ես նրանց հոգեվիճակից զգում եմ, որ նրանք ավելի ազատ են հիմա իրենց զգում։

- Այսինքն՝ նախկինում դատավորները հոգեպես ավելի՞ ճնշված էին։

- Միգուցե ավելի կաշկանդված են եղել, հիմա ավելի ազատ են։ Խոսքը փաստերին չի վերաբերում, հոգեվիճակին է վերաբերում։