Պետդեպի հայտարարությունը ոչ թե զգուշացում կանվանեի, այլ բարի խորհուրդ

Պետդեպի հայտարարությունը ոչ թե զգուշացում կանվանեի, այլ բարի խորհուրդ
Հովհաննես Իգիթյան

 «Հրապարակ» -ի հարցազրույցը ԱԺ «Իմ քայլը» դաշինքի պատգամավոր, ԱԺ արտաքին հարաբերությունների հանձնաժողովի փոխնախագահ Հովհաննես Իգիթյանի հետ

-Պարոն Իգիթյան, Սիրիա հումանիտար առաքելություն գործուղելու կապակցությամբ ԱՄՆ դեսպանատան հայտարարությունը ինչպե՞ս եք գնահատում։ Համարո՞ւմ եք, որ չափացանց կոշտ էր և իրականացան  այն կանխատեսումները, որ Սիրիայում մեր հումանիտար առաքելության ռիսկեր ակնհայտ էին, իսկ Հայաստանի շահը՝ անհասկանալի։

-Երեք մասի կբաժանեի․ Պետդեպարտամենտի հայտարարության առաջին մասում նշված է, որ քրիստոնեական, բայց, ըստ էության, հայկական համայնքի համար իրոք խնդիր կա Սիրիայում։ Սա կարևոր է։

Երկրորդ․ նշել են, որ դա հասկանալի է և հասկանալի է, որ Հայաստանը հումանիտար միսիայով մասնակցում է այս խնդրի լուծմանը։

Երրորդ մասը, որը  ոչ թե հորդոր կամ զգուշացում, այլ բարի խորհուրդ կանվանեի։ Ես, ի դեպ, շատ դրական եմ համարում, երբ Պետդեպը խոսում է, որ չի պաշտպանի, will niot support թե՛ Հայաստանի առաքելության միսիան, թեկուզ այս մակարդակով, թե՛ Սիրիայի Զինված ուժերի հետ համագործակցությունը որևէ ձևով,  թե՛ Ռուսաստանի հետ ԶՈՒ համագործակցությունը որևէ ձևով։ Ես դա կհամարեի անգամ մեզ համար դրական, որովհետև ես էլ՝ որպես ՀՀ քաղաքացի չէի ցանկանա, որ զուտ մարդասիրական առաքելություն իրականացնող մեր քաղաքացիները օգտագործվեն այնտեղ որևէ զինված ուժի կողմից՝ որևէ նպատակով։ Այդ առաքելության միսիան ունի իր նպատակը, որն ուղղակի ձևով կապված է Հալեպի այդ մասում ապրող մեր հայրենակիցների հետ և այն խնդիրներին, որ հայ համայնքն առօրյա կյանքում ունի։ 

-Գոնե ձեզ կառավարությունը բացատրե՞ց՝ ո՞րն էր այդ հումանիտար առաքելությանը մասնակցելու Հայաստանի շահը։ Թեկուզ, եթե կոնֆիդենցիալ տեղեկատվություն է, բայց հասկացա՞ք՝ ո՞րն էր մեր շահը։ Նաև նախկինների կողմից մեկնաբանվեց, որ իրականում Սիրիայի և Հայաստանի միջև ռազմատեխնիկական համագործակցության համաձայնագրին հղումը անհեթեթ է, քանի որ, այդ պարագայում, մենք ամեն երկիր առաքելություն կարող ենք ուղարկել։ 

- Նախ, ոչ թե ինձ, այլ հայ ժողովրդին բացատրեցին։ Այն հայտարարությունը, որը հնչեց թե՛ Պաշտպանության, թե՛ Արտգործնախարարության կողմից, թե որն է իրավական բազան,որի հիման վրա այդ մարդասիրական առաքելությունը գտնվում է Սիրիայում։ Ըստ որում, այսօր որևէ երկրի կամ  քաղաքական խավի մոտ կասկած չկա, որ այս առաքելությունը մարդասիրական է։ Այն, պրովոկացիան, որը փորձեցին  նետել ոչ միայն մեր ժողովրդի շրջանում, այլև միջազգային հանրության, նախկինները, թե Զինված ուժերի խումբ է այնտեղ, դա արդեն հերքվեց։

-Դանիել Իոննիսյանն ասել էր, որ Ռազմական ոստիկանությունից մարդիկ կան, ինչի մասին իրեն հայտնել էին Պն-ից։

-Խոսքը առաքելական միսիայի մասին է՝ անկախ այն բանից՝ ովքե՞ր են այնտեղ գտնվում։ Ես էլ կարող էի լինել այդ միսիայում, բայց դա չէր նշանակելու, որ Աժ-ից մարդիկ են։ Այնտեղ, օրինակ, կարող է լինել ռազմական բժիշկ, բայց ինքը բժիշկ է, այլ ոչ թե ռազմական։

-Փաստորեն,խորհրդարանը ևս  առաքելության՝ Սիրիա գնալու մասին իմացավ վերջին պահին, ինչպես Պն-ից էին ասում՝ կլինի, կիմանաք։ Խորհրդարանական կառավարման մոդելի երկրում սա աբսուրդ չէ՞, որ պատգամավորներն էլ են վերջին պահին իմանում։ Միգուցե քննարկեի՞ք, այսօր էլ ԼՀԿ-ից մեղադրեցին, որ 7 տարվա մեջ առաջին անգամ կառավարությունը առանց խմբակցությունների հետ հանդիպելու ծրագիրն ուղարկել է ԱԺ։

-Նախ, ոչ թե ԼՀԿ-ի, այլ Էդմոն Մարուքյանի, հայտարարությանը շատ ուշադիր եմ հետևել։ Այսինքն՝ ես և մեր խմբակցությունն այստեղ չենք եկել օրենք խախտելու։ Մենք ինչ քայլ էլ անում ենք, փորձում ենք ԱԺ իրավաբանների հետ նախ հասկանալ։ Այն, ինչ ասում է Մարուքյանը, որ նախնական քննարկում պետք է լիներ, որևէ տեղ նշված չէ։ Սահմանադրության մեջ նշված է, որ  կառավարությունը ներկայացնում է ծրագիր։ Ձևաչափը, որ ծրագիրը մտնի խմբակցություններ կամ հանձնաժողովներ, չկա։ Չգիտեմ՝ սա սխա՞լ է, թե ճիշտ, բայց եթե սխալ է, ուրեմն՝պետք է միասին օրենսդրական բացը փակենք։ Եթե Էդմոն Մարուքյանը գտնում է, որ սա սխալ է, մենք կնստենք և կքննարկենք։

-Ավանդույթ է եղել։

-Ինձ էլ այլ ավանդույթ են ասել, որին կտրականապես դեմ եմ։ Որ վարչապետը կանչում էր իր մոտ խմբակցության ղեկավարներին և նրանք այնտեղ  կառավարությունում քննարկում էին ինչ-որ թեզեր։ Կրկնում եմ՝ ես փորձեցի հասկանալ՝ ինչ է նշանակում՝ ծրագիր, ես բոլոր օրենսդրական աղբյուրներով նայել եմ և գտա մի տեղ, որ ծրագիրը  կառավարության արտաքին և ներքին քաղաքականության հիմքն է, իսկ հետագայում բոլոր այդ կետերը՝ պետք է իրականան՝ օրենսդրական նախաձեռնությունների միջոցով, որոնք կգան թե՛ կառավարության,թ ե՛ մեր կողմից։

-Ռուսական կողմը մեծ աղմուկ է բարձրացրել Russia Today կայքի լրագրողների հետաքննության կապակցությամբ, երբ պարզվել է, որ այստեղ  campcamp ծրագրի շրջանակներում Հայաստանում անցկացվել են հեղափոխություններ իրականացնելու դասընթաց-սեմինար։ 
Այս թվում՝ ՌԴ-ում։ Ըստ որում, նշվում է, թե Հայաստանը դարձել է հեղախականների համար Մեքքա։ Մի կողմից,  «Իմ քայլին»մեղադրում են, որ կենտրոնացված եք միայն հայ-ռուսական հարաբերությունների վրա, փոխարենն անտեսվում են հայ-վրացականը, հայ-ամերիկյանը, մյուս կողմից, Երևանւմ լինում է նման սեմինար, որը քաղաքագետ պետք չի լինել՝ հասկանալու համար, որ ՌԴ-ին դա դուր չէր գալու։

-Ռուսաստան ասելով՝ ո՞ւմ նկատի ունեք, որովհետև Մարգարիտա Սիմոնյանին նույնիսկ Ռուսաստանում Ռուսաստան չեն համարում։ Դուք ուզում եք, որ ես մեկնաբանեմ լրագրողի կարծի՞քը։ Դուք լրագրող եք Դուք էլ մեկնաբանեք, Ձեր կոլեգան է՝ Ձեր կարծիքը հայտնեք։ Եթե Պետդումայի որևէ պատգամավոր կամ արտգործնախարարությունը որևէ հայտարարություն անի Հայաստանում սեմինարների անցկացման հետ կապված, ես էլ կանեմ իմ հայտարարությունը Ռուսաստանում սեմինարներ անցկացնել-չանցկացնելու վերաբերյալ։