Դա կեղծ խաղաղասիրություն չէ, բա ի՞նչ է․ Թաթոյան (տեսանյութ)
Մարդու իրավունքների պաշտպան Արման Թաթոյանից հետաքրքրվեցինք, թե ինչ կասի այն մասին, որ եթե Ադրբեջանը ցանկանում է մասնակցել ԵԱՏՄ նիստերին, ապա Հայաստանը պետք է առաք քաշի գերիների վերադարձի հարցը։
Թաթոյանն ասաց, որ ինքն այդ հարին պատասխանելու իրավասություն չունի, բայց, առհասարակ, կարող է ասել մի բան, որ Ադրբեջանն այդ հարցն ակնհայտորեն քաղաքականացնում է և շահարկում է տարբեր հարթակներում։
«Ադրբեջանի նպատակն է նաև, օգտագործելով մեր հայրենակիցների՝ գերի լինելու փաստը, լարված պահել այստեղ մթնոլորտը։ Նրանք հասկանում են, չէ՞, որ սա կարող է այստեղ էլ շահարկումների հանգեցնի, լարվածություն առաջացնի և, ամենակարևորը, հոգեկան տառապանքներ պատճառի անհետ կորածների, գերիների ընտանիքներին, և մտադրված դա անում են՝ օգտագործելով հարցը քաղաքական նպատակներով»,- ասաց Թաթոյանը։
Ըստ Պաշտպանի՝ իրավունք չունի երկիրը նման կերպ վարվել, ռազմական գործողությունների դադարից հետո Ադրբեջանը պետք է անհապաղ վերադարձներ գերիներին՝ առանց նախապայմանների։
«Հետո էլ խոսում են խաղաղությունից։ Դա կեղծ խաղաղասիրություն չէ, բա ի՞նչ է»,- ասաց նա։
Hraparak.am-ի հարցին՝ ի՞նչ միջազգային կառույցներ կան, որոնք ունեն մանդատ և լծակ՝ ազդելու Ադրբեջանի այս վարքագծի վրա, Թաթոյանն ասաց․ «Գիտե՞ք, այստեղ պետք է լայնածավալ աշխատանք՝ միջազգային կառույցներով, հնարավոր բոոր ինստանցիաներով։ Օրինակ՝ Եվրախորհրդարանի ներկայացուցիչների հետ եղավ քննարկում, ես՝ ինքս, հատուկ զեկույց ունեի այնտեղ, և ես այդտեղ նշեցի, որ Եվրախորհրդարանի առանձին պատգամավորների հայտարարությունները, քննարկումները բավարար չեն, այստեղ պետք է ինստիտուցիոնալ միասնական արձագանք»։
Մանրամասն՝ տեսանյութում
Կարծիքներ