Առաջարկվում են ՀՖՖ գործկոմի նոր թեկնածուներ

Երեկ ավելի քան չորս ժամ տևած Հայաստանի ֆուտբոլի ֆեդերացիայի (ՀՖՖ) գործադիր կոմիտեի նիստի ավարտին հայտնի դարձավ, որ հրաժարականի դիմում է ներկայացրել ֆեդերացիայի նախագահ Արթուր Վանեցյանը, իսկ  Ֆեդերացիայի գործկոմը հաստատել է Վանեցյանի հրաժարականը:

ՀՖՖ գործկոմի անդամ, Ազգային ժողովի «Իմ քայլը» խմբակցության պատգամավոր Ռուբեն Ռուբինյանն էլ նիստից հետո լրագրողների հետ զրույցում հայտնեց, որ կհեռանան նաև գործկոմի անդամները, և ֆեդերացիայի նոր նախագահին և գործկոմի անդամներին կընտրի գալիք ամիս գումարվելիք ընդհանուր ժողովը: Նիստը տեղի է ունենալու դեկտեմբերի 23-ին։
Երբ ուսումնասիրում ենք ՀՖՖ կանոնադրությունը պարզ է դառնում, որ ՀՖՖ յուրաքանչյուր անդամ կարող է  առաջարկել նախագահի և գործադիր կոմիտեի անդամի մեկական թեկնածու։ ՀՖՖ-ի յուրաքանչյուր անդամ գործադիր կոմիտեում կարող է ներկայացված լինել միայն մեկ անդամով։

Գործադիր կոմիտեի անդամի թեկնածու առաջադրվելու համար թեկնածուները, ըստ ՀՖՖ կանոնադրության, պետք է համապատասխանեն հետևյալ պահանջներին․

ա) մինչև թեկնածու առաջադրվելը վերջին հինգ տարիներից երկուսի ընթացքում ակտիվ դերակատարում ունենալ ֆուտբոլի բնագավառում(օր․՝ որպես խաղացող կամ պաշտոնատար անձ)․

բ) լինել Հայաստանի Հանրապետության քաղաքացի և բնակվել պետության տարածքում․

գ) լինել առնվազն 25 տարեկան և ՀՀ-ում ունենալ ընտրական իրավունք․

դ) տվյալ պաշտոնի հետ  անհամատեղելի  որևէ հանցագործության համար նախկինում դատապարտված չլինել․

Դեռ նոյեմբերի 20-ին Red Eagles ֆան շարժումը հանդիպում-քննարկում էր նախաձերնել, որին ներկա էին   ֆուտբոլային հասարակության, ակումբների ներկայացուցիչներ,մարզական լրագրողներ, ֆուտբոլային մեկնաբաններ և մի շարք երկրպագուներ:

Հնչեցին հայկական ֆուտբոլի ներկայով և ապագայով պայմանավորված մտահոգություններ, խոսվեց դրանց պատճառների մասին, եղան ստեղծված իրավիճակից դուրս գալու առաջարկներ, որոնց գերակշիռ մասով պահանջվում էր հենց  գործկոմի ամբողջական կազմով  հրաժարականը: 
Ներկաներից շատերն այն կարծիքին էին, որ ցանկացած ֆուտբոլային ակումբ պետք է ներկայացուցիչ ունենա ՀՖՖ գործկոմում, որպեսզի ակումբների խնդիրները լսելի լինեն ֆուտբոլի ֆեդերացիայում։ 

Այսօր արդեն, երբ հայտնի է, որ դեկտեմբերի 23-ին ՀՖՖ-ն նոր նախագահ և գործկոմ է ունենալու, ֆուտբոլային հասարակության որոշ ներկայացուցիչներ սկսել են անձամբ առաջարկել ՀՖՖ գործկոմի անդամների իրենց թեկնածուներին։ Օրինակ մարզական մեկնաբան Արման Առաքելյանն իր ֆեյսբուքյան էջում առաջարկել է ՀՖՖ գործկոմի նոր թեկնածուների հետևյալ անունները՝ Վարազդատ Ավետիսյան, Խորեն Քլաշյան, Աննա Թադևոսյան ,Ռոբերտ Արզումանյան,Դավիդ Աբրահամյան ։

Red Eagles ֆան շարժման հիմնադիր Դենիս Սարգսյանից հետաքրքվեցինք, թե հնարավո՞ր է նորից ֆուտբոլային հանդիպում-քննարկում կազմակերպվի, որի ընթացքում արդեն իրենք կառաջարկեն նոր գործկոմի իրենց թեկնածուներին։
«Մոտ օրերս հայտարարությամբ հանդես կգանք։ Այս պահին մենք իրավունք չունենք գործկոմի անդամի թեկնածուներ առաջարկելու»,-նշեց Սարգսյանը։