Մասնագետները հեռանում են տեսչությունից. ինչո՞ւ

ՀՀ կրթության տեսչական մարմնում վիճակն այնքան էլ բարվոք չէ՝ կադրերի արտահոսք կա, իսկ ուսումնական տարին շուտով կսկսվի, եւ տեսչության դերը շատ մեծ է արտակարգ դրության հետ կապված ուղեցույցի իրականացումը ստուգելու առումով: Միայն վերջին երկու ամսում տեսչական մարմնից ազատվել է երեք տեսուչ, որից երկուսը՝ գլխավոր մասնագետ: Վերջին մեկ տարում աշխատանքից ազատվել են 1 բաժնի պետ, 6 մասնագետ, գործավար, տնտեսվար եւ այլք։ Տեսչական մարմնից հետաքրքրվեցինք, թե ինչով են պայմանավորված այս հեռացումները, արտահոսքը, արդյոք իրենց դիմումների հիման վրա՞ են հեռանում, թե՞ մարմնի ղեկավար Ալեքսանդր Շագաֆյանն է ազատում աշխատանքից։

«Վերջին մեկ տարվա ընթացքում ՀՀ կրթության տեսչական մարմնից (այսուհետ` տեսչական մարմին) ազատվել է 7 աշխատակից, որից 6-ը՝ իրենց դիմումների համաձայն՝ այլ աշխատանքի տեղափոխվելու, իսկ մեկը՝ կենսաթոշակային տարիքը լրանալու հիմքով: Տեսչական մարմինը բաղկացած է 4 վարչությունից եւ 2 բաժնից: Առայսօր բաժնի պետերից որեւէ մեկը չի ազատվել զբաղեցրած պաշտոնից։ Այնուհանդերձ հավելենք, որ 2020 թվականի հունվար ամսին, իր դիմումի համաձայն այլ աշխատանքի անցնելու պատճառաբանությամբ, աշխատանքից ազատվել է տեսչական մարմնի նախնական եւ միջին մասնագիտական կրթության վարչության պետը:

Տեղեկացնում ենք նաեւ, որ 2020 թվականի հուլիսի 1-ից ՀՀ սփյուռքի գործերի գլխավոր հանձնակատարի գրասենյակը մեկնարկել է «Ի գործ» բացառիկ ծրագիրը, որը սփյուռքահայ մասնագետներին տալիս է հնարավորություն՝ աշխատելու Հայաստանի պետական մարմիններում: Ուրախությամբ տեղեկացնում ենք, որ այժմ տեսչական մարմնի աշխատանքներին աջակցելու, նոր կարգավորումների եւ գործիքակազմերի մշակմանը մասնակցելու համար տեսչական մարմինը ներգրավել է այս ծրագրի երկու մասնակցի»,- գրավոր պատասխանել են տեսչական մարմնից։