Հուսիկ Արա. Երբ արեւ էին արքաները
Սանասար եւ Բաղդասար.
«Սասնա ծռեր» էպոսի անդրանիկ ճյուղի
հեղինակային մշակում
(հատված)
Կռիվ Բաղդադի դեմ.
Ծովինարի ամուսնությունը
եւ հղիանալը Սուրբ ջրից
Սկիզբը Հայաստան աշխարհն էր`
Ծովերի երկիր Նաիրին`
մեր մեծ Արմենիան:
Վերջում եկածը մեր ախոյանն էր`
անհայտից ու անծագում,
որ մի բուռ հող, մի պատառ երկինք,
մի կում էլ ջուր` գետ ու առու,
քերել-կցել էր դեսուդենից
եւ տարածք գծել քարտեզի վրա,
թե երկիրն է իր:
Սրանք գալիս են աշնան քամու պես,
խառնում են տերեւ ու խաշամ ու գնում:
Միջնադարի մեծ երկնքի տակ
Բաղդադի խալիֆն էր հզոր,
մեկ էլ մեր Գագիկ արքան`
թիկնած գահին Հայկ Նահապետի:
Մեծ երկիր ուներ,
բերդաքաղաքներ, զենք ու բանակ
եւ մի դուստր ծովածին,
ծովի նման լազուրաչ,
որ լույս էր հոգիների մեջ ու երգ շուրթերի վրա`
բառուբանով մեր հայրենի հայրենների:
- Իմ հոգին երկինք`
արեւը դու ես,
իմ սիրտը անուշ գիշեր`
աստղ ու լուսին ես.
ես հարդագող`
Ծիր Կաթինը դու ես,
երբ առավոտ եմ,
իմ լուսաստղն ես:
Երգում էին տաքսերը Ծովինարի
գեղեցկությունը սրտակեր,
սեգ լեռներից մինչեւ քաղաք ու պալատ`
իշխաններ ու մշակ,
եւ պարմանիներ` ծնված սիրո համար:
Երգում էին գուսանները
Դեռ անխաթար ձայնով Ապոլոնի,
եւ վիպասացներ` փանդիռներով բազմալեզու,
տաճարներում ու պարտեզների մեջ`
Աստվածամոր տոնին եւ Անահիտի,
եւ չէին հոգնում առավոտից իրիկուն:
Ու երգը բերան-բերան, լեզվից լեզու
գնաց հասավ Բաղդադ,
ձայնեց պալատներից ներս հոռի ու ոսկեսպաս
եւ խալիֆի ունկից կախվեց շիջող օղի նման:
Սեր ընկավ սիրտը, մարմինը` դող ու կրակ,
կարմիր ածուխներ կայծկլտացին աչքերի մեջ.
վայրի կրքով տենչաց Ծովինարին,
ծովերի գեղեցկությանը` երկնքի ծավով լցված.
սե՞ր էր, թե՞ տիրելու քաղց ու մարմաջ,
միայն ինքը իմացավ:
Մենք հարկատու էինք զոռբա Բաղդադին:
Հարկահանները ագահ խալիֆի
տեսան պարտեզում ճեմող Ծովինարին`
արեւն այդքան մոտիկ,
եւ ուշաթափվեցին:
Հարկը մոռացած` հասան Բաղդադ,
կանգնեցին իրենց կարգով խոնարհ`
դեռ լրիվ ուշքի չեկած,
եւ բռնակալին տվեցին խորհուրդ նենգախոս.
- Թե տիրես երկիրը, քոնը կլինի աղջիկը:
Ու զորք հավաքեց, զենք ու զինվորներ,
եկավ բանակ դրեց
Հայաստան երկրի սահմանների մոտ
էն բռնակալը անագորույն ու բիրտ:
- Գագիկ թագավոր, խաչապաշտ արքա,
պիտի խոնարհվես ինձ եւ ընդունես քեզ տեր,
ոսկի պիտի տաս, վճարես հարկեր
եւ քո մինուճար աղջիկը ուղարկես ինձ կին,
որ արեւ աչքերով երեսն է երկինք:
Թե չենթարկվես, զենք ու զոռով
քեզնից կխլեմ պատերազմով.
քանդ ու ավեր կանեմ քո երկիրը,
քարերը ավազ կդարձնեմ,
կհավաքեմ փոշին եւ քամուն կտամ:
Մերժեց մեր արքան.
- Քեզ չունեմ տալու ոչ իմ երկրից մաս,
ոչ իմ գանձերը,
ոչ էլ դստերս ծովաչյա.
կյանքս կտամ, հոգի ու մարմին,
բայց իմ երկիրը, տունն ու դստերը
չեմ տա քեզ երբեք:
Ետ դարձան գլխիկոր
բանբեր ու սուրհանդակ
թշնամու բանակից եկած,
լուրը տարան խալիֆին:
Ու կռվեցին քառասուն եւ չորս օր
հայոց բանակն ու զորքը Բաղդադի,
բարձունքի վրա, բաց դաշտի մեջ ու խոր կիրճերում.
ժամանակի հզոր զենքերով խոցում մեկմեկու,
օդ ու ցամաքից, գետերից լայնահուն,
քաղաք ու գյուղեր դարձնում ավերակ,
հողին հավասար. եւ նույն հաշիվն էր, թե հազար, թե մեկ մարդ:
Տեսավ Ծովինարը արհավիրքն այդ սոսկալի,
մղձավանջը մարդասպան.
հոգին փուլ եկավ, աչքերը մթնեցին,
կծկվեց սիրտը` քամվեց կրծքի տակ,
լույս ու գեղեցկություն ավերվեց դեմքին:
- Հազար-հազար ջահել ու պարմանի
խում դարձան արյան ծարավին
եւ հետնորդ չթողեցին,
հազար-հազար այր ու ամուսին
թողեցին որբ երեխա
եւ սիրուն կանանց` մենակ ծերացող:
Մայրերն են ոռնում խենթ ցավի մեջ:
Ես ինչպե՞ս տանեմ այսքան մեղք ու մահ,
ապրեմ` այսչափ արյուն, անեծք ինձ վրա.
նաժիշտ լինեմ, թե արքայադուստր,
պիտի կանգնեմ ատյան
եւ ընդունեմ վճիռը առանց ներման:
Ո՞վ սահմանեց այսքան մահեր,
ո՞վ է տալու այս կյանքերին պատասխան:
Խոկաց իր մեջ եւ իր սրտի մեջ
ու գնաց արքա հոր առաջ կանգնեց.
- Ինձ տուր կուռքեր պաշտող խալիֆային,
լավ է մի աղջիկ մատնես կորստյան,
քան մեր ազգը վերանա ու երկիրը մեր չքնաղ:
Գագիկ արքան, որ ծեր էր եւ իմաստուն մեծ,
դիմեց իր ժողովրդին,
եւ լսեց խոսքը շիտակ, սրտից եկած.
- Մենք կկռվենք, թեկուզ մեռնենք,
բայց արքայադստերը մեր չենք տա թշնամուն:
Լսեց Քեռի Թորոսին,
եպիսկոպոսին,
զորապետ ու իշխան
ու բոլոր նախարարներին.
- Տանք, կա՛մ մենք, կա՛մ աղջիկը մեր:
Բայց վճիռը արքայինն էր, եւ որոշեց.
- Հիմա զիջենք,
դաս առնենք կատարվածից
եւ ուժեղանանք:
Երբ կդառնանք հզոր, անպարտ,
ետ կբերենք մեր տվածն ու կորցրածը,
ուստրերի հետ` մեր դստերը:
Սա պատգամ էր,
այս էր պատվիրանը արքայի, քանզի
խելքով են հաղթում ամեն պատերազմ.
նախ միտքն է մղում կռիվը,
հետո է գծում զենքը սահման:
Այդպես մեր Հայկն է հաղթել սարսու Բելին`
զրահապատ, սպառազեն ու բյուրաբանակ,
եւ արել ցիրուցան:
Բայց պայման դրեց Ծովինարը խալիֆի առաջ
եւ խոսքը փոխանցեց կնքած գրով արքա հոր.
- Ես կմնամ հավատարիմ իմ լեզվին ու կրոնին,
մեր երկրի օրենքներին բոլոր,
առանձին դղյակում կապրեմ իմ կենցաղով,
կպահեմ վարք ու ավանդույթ
եւ անկողին չեմ մտնի քեզ հետ
մի ամբողջ տարի:
Համաձայնեց Բաղդադի մեծ տերը,
միայն թե Ծովինարին ամուսին
եւ փեսա դառնար Գագիկ արքային:
Ու թնդաց հարսանիքը արքայական,
ցնծությունը երկրից հասավ երկինք.
յոթ օր, յոթ գիշեր Լուսաստղը շողաց
Հայոց երկնակամարում Պսակի նման:
Երգում էին երկնասփյուռ սերը Ծովինարի,
տաք գեղեցկությունը ծովածավալ,
որ մեկ անգամ է տեսնում մարդը,
երբ երկինքն է հպվում երկրին:
Հարսանիք էր ու համբարձում:
Հավաքեց նաժիշտներին
եւ գնաց Ծովինարը
նրանց պարով շրջանակված`
ինչպես արեգակ արեւների մեջ,
վերջին անգամ տեսնելու
մեր ծաղկած սարերն ու հովիտներն ալպյան,
մնաս բարով ասելուց առաջ:
Նստեց ծովերի դուստրը
Կապույտ ծովի ավազին մոր սրտի պես փափուկ:
Ծովը տեսնում էր իրեն Ծովինարի աչքերի մեջ
եւ ծովի հայացքի մեջ Ծովինարն էր տեսնում իրեն.
միայն Աստված գիտեր`
ծո՞վն էր իր գույնը առել Ծովինարի աչքերից,
թե՞ Ծովինարն էր աչքերի գույնը առել ծովից:
Խոկում էր ծովերի դուստրը՝
բարի՞ն է աշխարհում շատ, թե՞ չարը.
ինքը ծովի մեջ էր, եւ ծովն էր իր մեջ:
Տոչոր զգաց նուրբ սրտում ու մաշող տապ
եւ ծարավեց Ծովինարը,
բայց աղի էր ծովի ջուրը,
խմելու համար անպիտան:
Լույս իջավ երկնքից այդժամ,
Աստծու կամքով ճեղքվեց ծովը
եւ ջուր բխեց ծովեզերքի մեծ քարից`
Կաթնով աղբյուրը:
Հանեց հագուստը ու մերկ գնաց․
մի ամբողջ բուռ ու կեսբուռ
խմեց Կաթնաղբյուրի Սուրբ ջրից
եւ հղիացավ Ծովինարը դեռ չտեսած ամուսին,
ինչպես մեր Տիրամայրն էր հղիացել Սուրբ Հոգուց:
Իսկ առավոտյան
արքայական օթյակի մեջ`
ոսկեկար բարձերին թիկնած, գնաց Բաղդադ,
քաղաք ե՛ւ սիրուն, ե՛ւ օտար, ե՛ւ խորթ:
Լուսանկարը` Սոնա Ադամյանի
«Մշակութային Հրապարակ» ամսաթերթ
Կարծիքներ