Նիկոլ Փաշինյանին՝ «հարգելի պարոն վարչապետ», հեգնանքով ենք դիմել

ԱԺ-ում կառավարության հետ վերջին հարցուպատասխանի ժամանակ Նիկոլ Փաշինյանն ընդդիմության, այդ թվում՝ «Լուսավոր Հայաստանի» պատգամավորների հարցերին պատասխանում էր ակնհայտ հեգնանքով, հաթաթա տալով, ընդդիմությանն իր տեղն էր ցույց տալիս, թե ով են, որտեղից են եկել, ինչ են ուզում, իսկ որոշ դեպքերում էլ ուղղակի չէր բարեհաճում անձամբ պատասխանել իրեն ուղղված հարցերին, և, իր փոխարեն, փոխվարչապետերից մեկին էր ուղարկում ամբիոնի մոտ:

«Ես չէի ասի, որ ինքը մեր տեղը ցույց էր տալիս, որովհետև կառավարության հետ հարցուպատասխանի ժամանակ շատ հստակ երևաց իր խուսափողական դիրքորոշումը այն պարագայում, երբ որ պատգամավորների մեծ մասը հարցեր էին ուղղում հենց վարչապետին, իսկ կառավարության ղեկավարը պատասխանը գցում էր կա՛մ փոխվարչապետերի, կա՛մ կառավարության մյուս անդամների վրա, որոնք որ էդ հարցերի հասցեատերը չեն: Հաթաթա տալու հարց չէր, որովհետև վարչապետն ինքն իր ամպլուայի մեջ էր, այսինքն՝ այն, ինչ տեսել ենք այս երեք տարվա ընթացքում, որևիցե փոփոխություն չի եղել: Նույնիսկ, եթե հաշվի առնենք երկրում էս իրավիճակը, թվում էր, թե վարչապետը մի փոքր նաև պիտի ոչ միայն հանդուրժողականություն, այլև հանգստություն ցուցաբերեր»,- մեր դիտարկումներին ի պատասխան՝ ասաց «Լուսավոր Հայաստան» խմբակցության պատգամավոր Աննա Կոստանյանը:

- Բայց տեսնում ենք, որ չի ցուցաբերում, և, տարբերություն ձեզ, որ դուք նրան գրեթե «մեծարգո պարոն վարչապետ»-ով էիք դիմում...

- Հեգնանքով, Վահե ջան, «հարգելի պարոն վարչապետ» շեշտադրմամբ և հեգնանքով:

- Բայց այդ հեգնանքը չէր զգացվում ձեր կողմից, փոխարենը իր կողմից էր զգացվում ակնհայտ հեգնանք և նվաստացնող վերաբերմունք ձեր հանդեպը, և սա առաջին դեպքը չէ:

- Չէ, չէի ասի՝ նվաստացնող, սրանք մի փոքր ուռճացված որակումներ են, հակառակը, ես վարչապետի պատասխանների մեջ տեսնում եմ ավելի շատ ընկճվածություն, ինչ-որ տեղ նաև վախ, խուսափողական կեցվածք:

- Նրա ագրեսիայի մեջ որտե՞ղ նկատեցիք այդ վախը:

- Որոշակի հարցերում՝ հա, հնարավոր է ագրեսիա, որովհետև էնպիսի հարցեր են հնչել, որոնք իր հոգեվիճակը երևի խառնել են իրար, որովհետև մարդը էդ հոգեվիճակում էնպիսի բաներ ասաց, մեկը՝ Շուշիի վերաբերյալ, որ, չգիտեմ...

- Դո՞ւք էլ եք համարում, որ նա իր այդ ասածով սպասարկում է Ադրբեջանի շահը:

- Էսպես ասեմ, քանի դեռ ինձ մոտ իրավական առումով փաստեր չկան կուտակված՝ արդյոք դա ում շահն է, համենայնդեպս, դա պետական շահի սպասարկում չէր: Էդպիսի հայտարարություն անելը չեմ համարում պետականամետ գործչի խոսք: