Իրենք էլ որոշել են կորոնավիրուսին «սատկացնել» հավելվածների ու ծրագրերի միջոցով

ՀՀ բարձրտեխնոլոգիական արդյունաբերության նախարարությունը, կորոնավիրուսի տարածման կանխարգելմանն ուղղված մարտահրավերների հաղթահարմանն աջակցելու նպատակով, դրամաշնորհների մրցույթ է հայտարարել։ 

Նախարար Հակոբ Արշակյանի ղեկավարած գերատեսչությունը, փաստորեն, որոշել է կորոնավիրուսի դեմ պայքարել տեղեկատվական տեխնոլոգիաների միջոցով։ Եթե հաշվի առնենք, որ վարչապետն էլ որոշել էր կորոնավիրուսին «սատկացնել» եղինջով ու տնական օղիով, ապա Արշակյանի այս նախաձեռնությունը, հիրավի, ավելի օգտակար գաղափար կարող է լինել այս հարցում։

Եվ դրա համար նախարարությունն իր բյուջեից 22 մլն դրամ է նախատեսել, որը կբաշխվի հինգ մասնակցի միջև՝ համապատասխանաբար 10 մլն, 5 մլն, 3 մլն, 2-ական մլն ՀՀ դրամ գումարի չափով։ Հաղթող կճանաչվեն նրանք, որոնք կորոնավիրուսի դեմ պայքարի նորարարական և արդյունավետ լուծումներ կառաջարկեն։ Հայտերը հնարավոր էր ներկայացնել առցանց, մինչև ս․թ․ ապրիլի 3-ը՝ ժամը 24։00, հետևյալ հղումով՝ shorturl.at/dyRY9:

Նախարարության մամուլի խոսնակ Սիրանույշ Գյուրջինյանը մեզ հետ զրույցում ասաց, որ բոլոր նրանք, ովքեր ունեն նախագիծ, որն այս կամ այն կերպ կարող է աջակցել կորոնավիրուսի դեմ պայքարին, կարող են դիմել և մասնակցել մրցույթին։ «Այսինքն՝ ցանկացած տեխնոլոգիական լուծում, որը որ այս կամ այն կերպ կարող է նպաստել կամ աջակցել մարտահրավերների հաղթահարմանը՝ դա կարող է լինել հավելված, ծրագրային լուծում, կարող է լինել Soft, Hard, որևէ սահմանափակում չկա»,-ասաց նա:

Հարցին՝ սա կարո՞ղ է կապ ունենալ ԱԺ-ի կողմից ընդունված հեռախոսներով քաղաքացիների շարժի վերահսկման կամ տեղորոշման նախագծի հետ, խոսնակը տվեց բացասական պատասխան։ Հարցին՝ ո՞ւմ գաղափարն է եղել նման մրցույթ հայտարարելը, Գյուրջինյանն ասաց՝ իրենց, և հիշեցրեց, որ իրենք «Գաղափարից մինչև բիզնես» խորագրով ծրագիր ունեն, որը հունվարին էլ է իրականացվել, և սա դրա շրջանակներում է։

«Քանի որ մեզ շատ էին դիմում ու մինչ այսօր էլ շատ են դիմում, ՏՏ ոլորտն ակտիվ է այս առումով շատ, ու մեզ դիմում էին, որ այս կամ այն կերպ կարող են աջակցել, ինչ-որ ծրագրային լուծում տալ, ու որպեսզի այդ ամենը կարողանայինք և հօգուտ հանրությանը, և՛ հօգուտ ՏՏ ոլորտի զարգացման իրականացնել, մենք նախաձեռնեցինք այս ծրագիրը»,-ասաց նա։

Նկատեցինք, որ ամբողջ աշխարհը միլիոնավոր-միլիարդավոր դոլարներ է ծախսում կորոնավիրուսի դեմ պայքարի համար, իսկ մենք 22 մլն դրամ ենք հատկացնում ինչ-որ ծրագրերի ստեղծմանը, որքանո՞վ կարող է դա արդյունավետ լինել, խոսնակը հիշեցրեց, որ այդ 22 միլիոնը մի քանի հոգու միջև է բաշխվելու, ապա հավելեց․ «Ինքը ծրագրային լուծում կարող է ունենալ, որն իրականում շատ մեծ ծախսեր չենթադրի։ Եթե ուշադիր նայել եք հայտի լրացման ձևը, այնտեղ կա, թե ինչ ծախսեր է ենթադրում, գուցե կան արդեն ձևավորված գաղափարներ կամ արտադրություն, որն ընդլայնման կարիք ունի, կամ ձևավորված Soft, որն իմպլեմենտացիայի կարիք ունի։ Այսինքն՝ անկախ նրանից, թե ինչ փուլում է իրենց նախագիծը գտնվում, կարող են դիմել։ Իհարկե, շատ լավ կլիներ, որ մեծ գումարներ լինեին, բայց մենք մեր դոնորների հետ էլ ենք աշխատում, և հնարավոր է՝ մեր միջազգային գործընկերներից էլի ռեսուրսներ ներգրավվեն այս նախագծի շուրջ»։