Լոնդոնը և Անկարան քննարկում են Ուկրաինա զորքեր ուղարկելու հարցը

Բրիտանական կառավարությունը ծրագրում է հազարավոր զինվորներ անժամկետ ուղարկել Ուկրաինա՝ Մոսկվայի և Կիևի միջև հնարավոր հրադադարը վերահսկելու համար, The Times-ին հայտնել է բրիտանական կառավարության բարձրաստիճան աղբյուրը։ 

«Սա երկարաժամկետ պարտավորություն է լինելու, մենք խոսում ենք տարիների մասին։ Այնքան, որքան ժամանակ է պահանջվում խաղաղության համաձայնագրի պահպանման և Ռուսաստանին զսպելու համար»,- հրատարակությանը հայտնել է աղբյուրը։

Ինչպես գրում է The Times-ը, Բրիտանիան համաձայնել է Ուկրաինա զորքեր ուղարկել Ֆրանսիայի, Թուրքիայի, Կանադայի և Ավստրալիայի հետ միասին: 

Ավելի քան 30 այլ երկրներ համաձայնել են աջակցել առաքելությանը, այդ թվում՝ զենքով և նյութատեխնիկական ապահովմամբ: 

Ընդհանուր առմամբ, Ուկրաինային օգնել ցանկացողների կոալիցիան կարող է ուղարկել մինչև 30 հազար խաղաղապահ։ 

Սակայն այդ կոնտինգենտը կժամանի միայն այն ժամանակ, երբ Մոսկվայի և Կիևի միջև խաղաղության պայմանագիր կնքվի, ասվում է հրապարակման մեջ: