Հայերի համար Հայաստան այցելելու ցանկությունը մեծ է. Իսպանիայում չեղարկվել են մի շարք միջոցառումներ

Իսպանիայում դեռ անցած շաբաթ կորոնավիրուսի հետ կապված խուճապն այդքան էլ մեծ չէր: Սակայն այսօր իրավիճակն ավելի քան մտահոգիչ է։ Երկրում արդեն  48 զոհ և 2097 վարակված կա: Իսկ, ահա, Իտալիայից և դեպի Իտալիա բոլոր չվերթները չեղարկվել են առնվազն մինչև մարտի 25-ը։ Բոլոր ֆուտբոլային և այլ սպորտաձևերի խաղերն անցկացվում են դռնփակ: Երեկ Վալենսիայում Չեմպիոնների լիգան նույն բախտին արժանացավ։ Չեղարկվեց նաև Վալենսիայի և Իսպանիայի գլխավոր տոներից մեկը՝ Ֆայասը, որը սկսվում է մարտի 15-ին և ավարտվում մարտի 19-ին։ Չեղարկվել են բոլոր միջոցառումները, որոնցում մասնակցությունը կարող է անցնել 500 հոգին։ Այսօր Ջիհադի կողմից 16 տարի առաջ իրականացված ահաբեկչական ակտի օրն է, որի հետևանքով 152 մարդ էր զոհվել։ Սրա հետ կապված բոլոր միջոցառումները նույնպես չեղարկվել են։ Մադրիդում, Ռիոխայում և Բասկերի երկրում ուսումնական հաստատությունները փակ են։ Իրավիճակի հետ կապված ` hraparak.am-ը զրուցեց Վալենսիայի հայ համայնքի նախագահ Արարատ Ղուկասյանի հետ՝ պարզելու, թե ինչպես են տրամադրված սփյուռքում գտնվող մեր հայրենակիցները, ինչպես են պաշտպանվում չարաբաստիկ վիրուսից: 
 

«Վալենսիայի Ֆայասն իր ավելի քան մեկդարյա պատմության ընթացքում միայն 5 անգամ է չեղարկվել։ Նախորդ չորս անգամները կապված են եղել պատերազմների հետ, այս վերջինը՝ կորոնավիրուսի։ Մեզ մոտ երկրի երրորդ կուսակցության գլխավոր քարտուղարն է վարակվել՝ մարտի 8-ին մարդաշատ միտինգին մասնակցելուց հետո։ Կոնգրեսը հետաձգել է բոլոր ակտերը, քանի որ այդ միտինգին մասնակցել են կուսակցության գրեթե բոլոր 52 պատգամավորները։ Վերջիններս ինքնամեկուսացման մեջ են: Խորհուրդ է տրվում ընդհանրապես չճամփորդել, խուսափել հատկապես ռիսկային երկրներ (Չինաստան, Իտալիա, Ճապոնիա, Կորեա...) այցելելուց։ Զգուշավորության մթնոլորտ է տիրում ամբողջ Եվրոպայում։ Օրինակ, հենց այսօրվանից իտալացիները չեն կարող այցելել Ավստրիա։

Հայաստան գնալու դեպքում խորհուրդ է տրվում դիմել բժշկի և վարակի առկայության դեպքում ինքնամեկուսացվել: Իսկ ընդհանուր առմամբ, Հայաստան այցելելու ցանկությունը մեծ է տեղի հայերի համար, բայց որոշ դեպքերում, հիմա արդեն զգուշանում են տոմս գնելուց: 
»,-պատմեց մեր զրուցակիցը՝ նշելով, որ, այնուամենայնիվ, հայերից դեռևս ոչ ոք  վերջնականապես հայրենիք վերադառնալու մտադրություն չի հայտնել:

Եթե եկել են, ապա միայն` որպես զբոսաշրջիկներ: «Իմ կարծիքով, հարկավոր է հիգիենա, զգուշավորություն և պատասխանատվության զգացում ունենալ, մի քիչ համբերություն ունենալ, և ամեն բան լավ կլինի»,-խոսքը լավատեսորեն ավարտեց մեր զրուցակիցը՝ ավելացնելով, որ չնայած Վալենսիայում այս օրերին բժշկական դիմակների և հիգիենայի մի շարք պարագաների գների կտրուկ աճ է նկատվում, դրանց պակաս երկրում չկա։