Հուսով եմ՝ արդեն կհասկանան, որ որքան հեռու էին իրական իրավիճակից
«Կառավարությանն ենք ներկայացրել արտակարգ դրության պայմաններում իրականացման ենթակա միջոցառումների վերաբերյալ առաջարկությունների փաթեթը»: Այս մասին մեզ հայտնեց ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը։
Իշխան Սաղաթելյանից հետաքրքրվեցինք, թե ինչ փաթեթ են ներկայացրել կառավարություն: «Մոտ 10 էջանոց ծավալուն փաստաթուղթ, որտեղ կան հստակ գործողություններ: Մենք այսօր ժամը 3-ին լայվով ներկայացնելու ենք մանրամասները: Ընդհանուր առաջարկությունները վերաբերում են տարբեր ոլորտների՝ հարկաբյուջետային քաղաքականությունից, արտակարգ դրության պայմանների խստացումից, վերջացրած կրթությունից եւ առողջապահությունից»:
Հարցին՝ կարծում եք կառավարությունը կընդունի՞ ներկայացված փաթեթը: Սաղաթելյանն ասաց. «Մենք մեր պարտքն ենք համարում շատ հիմնավորված մանրամասնություններով ներկայացնել, կառավարությունը կընդունի` դա արդեն կառավարության խնդիրն ա: Սա մեր տեսակետներն ու պատկերացնումներն են, որը հարկ ենք համարել ներկայացնել: Այս օրերին երկիրն ունի մարտահրավերներ, եւ յուրաքանչյուրն իր աջակցությունը պետք է բերի պետության եւ ժողովրդի համար: Մասնագիտական օգնությունից բացի, նաեւ գործնական օգնություն ենք ցուցաբերել: Անցած շաբաթ ԱՄՆ-ից որոշակի օգնություն հասել է Երեւան: Կանդայից եւս օգնություն կգա նաեւ Արցախ:
-Պարո՛ն Սաղաթելյան, ըստ Ձեզ, ի՞նչ քայլեր չի ձեռնարկել կառավարությունը, որ պետք է դա աներ մինչ օրս:
- Մենք հիմա չենք խոսում, չենք քննադատում, դետալների մեջ չենք մտնում: Մենք գտնում ենք, որ այն քայլերը, որ իրականացվում են, դրանք բավարար չեն: Հիմա ժամանակը չի դրա մասին խոսելու: Մենք, անշուշտ, դրան կանդրադառնաք այս ամենի ավարտից հետո: Մենք կառավարությանը ներկայացում ենք մեր տեսակետը, հիմա կառավարությունը կօգտվի՞, կգտնի՞, որ ճիշտ տեսակետ ենք ներկայացրել, շատ ավելի լավ:
-Այսօր մամուլում շրջանառվում է, որ հնարավոր է 30 օրով եւս երկարաձգեն արտակարգ դրությունը, ի՞նչ եք կարծում, Հայաստանը խոր տնտեսական ճգնաժամի առաջ կկանգնի՞:
-Իրոք, մենք դժվարությունների առաջ ենք կանգնած: Կառավարությունն ավելի շատ ինֆորմացիա եւ տեղեկություններ ունի երկրի իրավիճակի եւ ընդհանուր վտանգների վերաբերյալ: Ըստ դրա՝ որոշում պետք է ընդունի` երկարացնի՞ արտակարգ դրությունը, թե՞ ոչ: Իսկ որ մենք տնտեսական լուրջ խնդիրներ ենք ունենալու, դա ակնհայտ է, ու այն կարծիքը, որ օրեր առաջ սա նոր հնարավորություն է եւ այլն, հուսով եմ` արդեն կհասկանան, որ որքան հեռու էին իրական իրավիճակից:
Կարծիքներ