Նորայր Գրիգորյան․ Ամեն առավոտ
**Երեւան, թեկուզ՝ Էրեբունի**
Դեռ չէի հասցրել պառկել խոտին,
նայել երկնքին,
երբ ծառը փակեց երկնքի բոլոր մուտքերը,
ծառը՝ եռագույն պտուղներով:
Եվ երրորդ գույնի պտուղներից
յոթի կորիզներից մեկը բանալի էր,
որ բացում էր հայրենիքի կամ
դրախտի դուռը.
մնացածները սղոցներ էին,
որ անընդհատ սղոցում էին ծառի բունը՝
երկնքի պատկերը բացելու համար:
Այսպես, մի ձեռքում բանալի, մյուսում՝ սղոց,
կանգնած եմ ծառի տակ,
ասում են՝ արդեն 2800 տարի:
**Այս առավոտ**
Ես ապրում եմ կամ չեմ ապրում այս առավոտ,
ինչ էլ լինի, զարմանալի օրեր կան դեռ,
մի քիչ մնամ, վաղ է գնալ Տիրամոր մոտ,
գուցե գտնեմ կեսօրվա մեջ կորած մի սեր:
Ինչ էլ լինի, տե՛ս ծաղկում են ծառերը սեգ,
գուցե ապրեմ կամ էլ չապրեմ կեսօրվա մեջ,
իմ զրույցը կիսատ մնաց Տիրամոր հետ,
բայց երեկոն խոստանում է սերը գտնել:
Ես ապրում եմ կամ էլ մեռնում իրիկվա մեջ,
ինչ էլ լինի, օրերը տաք դեռ կհոսեն,
ինչքա՜ն սերեր դեռ կարթնանան գիշերվա մեջ,
երբ Տիրամոր արցունքները վրաս հոսեն:
**Անհասցե**
Ես կրակում եմ օրվա այտին.
-Համբերությունը կյանք է,-ասում է օրը,
ու մյուս այտը շրջում դեպի ինձ:
Ես կրակում եմ համբերության դեմքին..
-Լիցքավորի՛ր զենքդ,-ասում է համբերությունը,
և ինձ մեկնում փամփուշտներով լի պահունակը:
Ես կրակում եմ հիշողության սրտին.
-Սիրտս նման է էն դատարկ տներ,-
երգում է հիշողությունը ու անհետանում:
Ես կրակում եմ անհայտության վրա,
և ճանապարհները մոլորեցնում են ինձ:
Ես կրակում եմ մոլորության վրա,
ու մոլորությունը բռնում է ձեռքս:
Արդեն քառասուն և ավել տարի
ես թափառում եմ նույն վայրում.
առանց դեմքի, առանց համբերության,
առանց զենքի, ուր ճանապարհները
հեռանում են անհասցե,
ինձ էլ թողնում անհասցե մի տեղում:
*******
Երկնաջրերում ես թափառեցի
և իջա երկիր:
Մի ծառ ինձ ասաց.
-Մոտ արի, գարուն,
ես այն աղջիկն եմ,
որ մնաց այնտեղ,
ինձ կապույտ ծաղկե
շորեր հագցրու,
որ լողամ քո թաց
թևերի վրա:
-Ինձ ծառ դարձրու,-
ասացի նրան:
*******
Քարի մեջ արյուն կա,
ամպի մեջ՝ անձրև,
մանուկ էր՝
քար նետեց
ամպի մեջ անձև...
*******
Համբուրեցի ձեռքդ,
որ սրտիդ հասնեմ,
աչքդ, որ լույսիդ հասնեմ,
ճակատդ, որ մտքիդ հասնեմ,
քեզ, որ Աստծուն հասնեմ:
*******
Առաջ ես ծառի վրա էի ապրում,
երբ թռչունները վերադարձան,
իջա հողին:
Ինչքան այնտեղ ապրեցի, չգիտեմ,
հիմա ինձ վրա թռչուններն են ապրում:
*******
Երբ դատարկվում է համբերանքի բաժակը
կամ սեղանից ընկնում ու ջարդվում,
ձիերը հարթավայրի լույսը
տանում են դեպի լեռները,
ուր մանուկները ոտաբոբիկ են,
մերկանդամ, կարմրաթուշ,
և զատիկի ձվեր են գլորում
լեռնագագաթներից դեպի հարթավայր.
ամեն առավոտ, ամեն առավոտ...
**Նորայր Գրիգորյան-բանաստեղծ**
**Հրապարակ մշակութային հավելված**
Դեռ չէի հասցրել պառկել խոտին,
նայել երկնքին,
երբ ծառը փակեց երկնքի բոլոր մուտքերը,
ծառը՝ եռագույն պտուղներով:
Եվ երրորդ գույնի պտուղներից
յոթի կորիզներից մեկը բանալի էր,
որ բացում էր հայրենիքի կամ
դրախտի դուռը.
մնացածները սղոցներ էին,
որ անընդհատ սղոցում էին ծառի բունը՝
երկնքի պատկերը բացելու համար:
Այսպես, մի ձեռքում բանալի, մյուսում՝ սղոց,
կանգնած եմ ծառի տակ,
ասում են՝ արդեն 2800 տարի:
**Այս առավոտ**
Ես ապրում եմ կամ չեմ ապրում այս առավոտ,
ինչ էլ լինի, զարմանալի օրեր կան դեռ,
մի քիչ մնամ, վաղ է գնալ Տիրամոր մոտ,
գուցե գտնեմ կեսօրվա մեջ կորած մի սեր:
Ինչ էլ լինի, տե՛ս ծաղկում են ծառերը սեգ,
գուցե ապրեմ կամ էլ չապրեմ կեսօրվա մեջ,
իմ զրույցը կիսատ մնաց Տիրամոր հետ,
բայց երեկոն խոստանում է սերը գտնել:
Ես ապրում եմ կամ էլ մեռնում իրիկվա մեջ,
ինչ էլ լինի, օրերը տաք դեռ կհոսեն,
ինչքա՜ն սերեր դեռ կարթնանան գիշերվա մեջ,
երբ Տիրամոր արցունքները վրաս հոսեն:
**Անհասցե**
Ես կրակում եմ օրվա այտին.
-Համբերությունը կյանք է,-ասում է օրը,
ու մյուս այտը շրջում դեպի ինձ:
Ես կրակում եմ համբերության դեմքին..
-Լիցքավորի՛ր զենքդ,-ասում է համբերությունը,
և ինձ մեկնում փամփուշտներով լի պահունակը:
Ես կրակում եմ հիշողության սրտին.
-Սիրտս նման է էն դատարկ տներ,-
երգում է հիշողությունը ու անհետանում:
Ես կրակում եմ անհայտության վրա,
և ճանապարհները մոլորեցնում են ինձ:
Ես կրակում եմ մոլորության վրա,
ու մոլորությունը բռնում է ձեռքս:
Արդեն քառասուն և ավել տարի
ես թափառում եմ նույն վայրում.
առանց դեմքի, առանց համբերության,
առանց զենքի, ուր ճանապարհները
հեռանում են անհասցե,
ինձ էլ թողնում անհասցե մի տեղում:
*******
Երկնաջրերում ես թափառեցի
և իջա երկիր:
Մի ծառ ինձ ասաց.
-Մոտ արի, գարուն,
ես այն աղջիկն եմ,
որ մնաց այնտեղ,
ինձ կապույտ ծաղկե
շորեր հագցրու,
որ լողամ քո թաց
թևերի վրա:
-Ինձ ծառ դարձրու,-
ասացի նրան:
*******
Քարի մեջ արյուն կա,
ամպի մեջ՝ անձրև,
մանուկ էր՝
քար նետեց
ամպի մեջ անձև...
*******
Համբուրեցի ձեռքդ,
որ սրտիդ հասնեմ,
աչքդ, որ լույսիդ հասնեմ,
ճակատդ, որ մտքիդ հասնեմ,
քեզ, որ Աստծուն հասնեմ:
*******
Առաջ ես ծառի վրա էի ապրում,
երբ թռչունները վերադարձան,
իջա հողին:
Ինչքան այնտեղ ապրեցի, չգիտեմ,
հիմա ինձ վրա թռչուններն են ապրում:
*******
Երբ դատարկվում է համբերանքի բաժակը
կամ սեղանից ընկնում ու ջարդվում,
ձիերը հարթավայրի լույսը
տանում են դեպի լեռները,
ուր մանուկները ոտաբոբիկ են,
մերկանդամ, կարմրաթուշ,
և զատիկի ձվեր են գլորում
լեռնագագաթներից դեպի հարթավայր.
ամեն առավոտ, ամեն առավոտ...
**Նորայր Գրիգորյան-բանաստեղծ**
**Հրապարակ մշակութային հավելված**
Կարծիքներ