Ոստիկանությունը հորդորում է հանձնե՞լ օրինական զենքերը․ ստուգումները շարունակվում են

Քաղաքացիների, ԶԼՄ-ների համար այդպես էլ շարունակում է անհայտ մնալ, թե Հայաստանում ովքե՞ր ունեն օրինական զենք եւ նրանց թիվը քանի՞սն է։ Մեզ տեղեկություններ են հասել, որ վերջերս ոստիկանությունը օրինական զենք ունեցողների ցուցակը վերանայում է, մասնավորապես՝ հանրությանը հայտնի դեմքերին հորդորում են բերել, հանձնել օրինական զենքերը։



Ոստիկանության լրատվական բաժնից տեղեկացրին՝ստուգումները մշտական բնույթ են կրել եւ կրում․ «Օրինական զենք ունեցողները, համենայնդեպս, որսորդական հրացանները, դրանց թույլտվությունը ժամկետով է տրվում։ Ժամկետը լրանալուց հետո իրենք պարտավոր են բերել, ժամկետը երկարացնել։ Բացի դա, ծառայողներ, տեսուչներ ունենք, ովքեր օրինական զենք ունեցողների բնակարաններ այցելելով, տարբեր մեթոդներով՝ ստուգում են զենքերի պահման կարգը, զենքի առկայությունն են ստուգում։ Դա միշտ գործող կարգ է»։



Ոստիկանության հասարակայնության հետ կապի և լրատվության վարչության պետ Աշոտ Ահարոնյանից էլ հետաքրքրվեցինք՝ Հայաստանում քանի՞ մարդ ունի օրինական զենք, նա կրկնեց՝ թիվը եւս գաղտնի է պահվում։



**Աննա ՊԱՊԻԿՅԱՆ**