Բաց ռեժիմն ազատություն չէ

Այսօր Վարդաշեն քրեակատարողական հիմնարկում հրավիրած ասուլիսում Շանթ Հարությունյանը հերքեց այն խոսակցությունները, թե իբր իրեն ազատել են պատժից, բայց ինքը հրաժարվում է: «Ժողովրդի մի մասին չեմ ուզում վիրավորել, բայց մյուս մասը կամ տգետ ա, կամ սրիկա, որովհետև եթե ինձ բանտից ազատեին, էս մարդիկ ինձ մի րոպե ավելի չէին կարա պահեին: Ու պրիտոմ ասում են, որ դա վարչապետն ա իրա կողմնակիցների մոտ ասել, ըտենց տարածվել ա: Ես պաշտոնապես ասում եմ՝ չի կարա ըլնի ըտենց բան, որ որևէ կալանավորի ազատեն, ինքը բանտից դուրս չգա: Բաց ռեժիմն ինքն ազատություն չի: Երբ որ մենք պահանջում ենք արդարացում, մենք ավելի շուտ նկատի ունենք արդարադատություն: Ես արդարադատություն եմ պահանջում, որովհետև ցանկացած մարդ, լինի հանցագործ, թե անմեղ մեղադրյալ, ինքն իրավունք ունի միշտ համարի, որ ինքն անմեղ ա»,- նշեց նա:



Շանթ Հարությունյանը, դիմելով վարչապետ Նիկոլ Փաշինյանին, հայտարարեց նաեւ, որ Մարտի 1-ի իր ելույթի համար են իրեն մեղադրանք առաջադրել։ «Ես ուզում եմ, որ Նիկոլ Փաշինյանը իմանա, որ Մարտի մեկին իմ դեմ մեղադրանք են ներկայացրել նաև Մարտի 1-ի իր ելույթը վերագրելով ինձ, իմ ելույթի տակ դրել են իր ելույթի հատվածը»,-ասաց Հարությունյանը։



Հարությունյանը հայտարարեց, թե Հայաստանը ղեկավարում է ռուսական КГБ-ն: «Չնայած ես գիտեմ, որ Հայաստանը չի ղեկավարում Նիկոլ Փաշինյանը, ինքը դերի մեջ ա, ղեկավարում է ռուսական КГБ-ն, ու դա ապացուցում է Վանեցյանի ասածը»: Իսկ ԱԱԾ տնօրեն Արթուր Վանեցյանը պարզվում է՝ Շանթին բաց ռեժիմ է առաջարկել, վերջինը չի համաձայնել. «Մի օր ԿԳԲ-ից էին եկել, ասում էին՝ ինչի՞ չես ուզում ներում գրես, ազատվես, ասի՝ բոքսե՞մ սրան, թե՞ ինչ: Ասում եմ՝ ուրեմն դու ինձ չես ճանաչո՞ւմ, որ տենց բան ես ասում: Սրանք մարդիկ են, որ չգիտեն՝ ում ինչ են ասում, պատվեր կատարող տգետներ են: Կամ էն օրն ասում ա՝ Վանեցյանը հեռախոսը վերցրել ա, ուզում ա քեզ առաջարկի բաց ռեժիմ դուրս գաս: ԿԳԲ պետը կարա գնա արդարադատության նախարարի կաբինետ, ասի առաջարկեք Շանթը դուրս գա բաց ռեժիմ»: