«Հրապարակ»․ Չե՞ն փոշմանել

ՀՀԿ խմբակցության ղեկավար Վահրամ Բաղդասարյանը մեր դիտարկմանը, թե չե՞ն փոշմանել, որ Սերժ Սարգսյանի հագով «կարած» սուպերվարչապետական Սահմանադրությունն այսօր փաստացի Նիկոլ Փաշինյանն է «հագնում», ասաց․ «Բարով մաշի»։



Ապա հիշեցրեց, որ Փաշինյանը հայտարարել է, որ պետք է լիազորությունների վերաբաշխում կատարի՝ ԱԺ եւ ՀՀ նախագահների լիազորությունների մեծացման հետ կապված, բայց իրենք առաջարկներ չեն ստացել։ Իսկ հիմա չե՞ն փոշմանել, որ նախագահին օժտել են ավելի լայն լիազորություններով, իսկ վարչապետին՝ ավելի քիչ։



«Ինձ թվում է՝ այն Սահմանադրությունը, ինչը որ ընդունել ենք, ելնելով մեր երկրի քաղաքական իրավիճակից եւ աշխարհաքաղաքական դիրքից, պետք է ունենայինք որոշումներ կայացնող անձ, որը լիազորել էինք վարչապետին։ Դա այս իրավիճակի համար ճիշտ էր։ Երբ վերջակետ դրած կլինենք ղարաբաղյան խնդրին, լուրջ փոփոխություններ կարող ենք կատարել ոչ միայն Սահմանադրության, այլեւ շատ այլ հարցերում»։